Cântico 7

₁Huvixa rajy, ndepy regua reve reguataa ma iporã meme.

Neretyma ku'a ma mbo'y hembiapo kuaa va'e rembiapo rami iporã.

₂Nepuru'ã ma karo ojere va'e vinho oĩ riaea rami.

Ndeku'a ma trigo omboaty pyre yvoty ombojerepy rami.

₃Nekã mokoĩve ma guaxu ta'y'iague meme rami.

₄Ndeaju'y ma torre marfim guigua rami iporã.

Nderexa ma yy omboty pyre Hesbom py, Bete-Rabim rokẽ yvy'iry oĩ va'e rami.

Nexĩ ma Líbano yvy re torre Damasco katy ooa py hi'aĩ va'e rami.

₅Neakã ma Carmelo yvyty rami.

Nde'a ma púrpura rami iporã.

Huvixave ojejopy uka nde'a reipopẽ va'ekue re.

₆Ndee ma neporã ha'e arovy'a vaipa,

xembovy'a ete xerayvua py.

₇Nde'yvia ma pindo rami,

ha'e rã nekã ma guapytã rami.

₈Xee aipoa'e: “Ajeupi rã pindo re,

ajopy 'rã ixã rapo re”, ha'e.

Nekã toĩ xevy uva arupỹ xã rami,

nepytuẽa taeakuã porã maçã rami.

₉Xerayvua ma vinho iporã va'e rami.

Ha'e va'e vinho ma xerembiayvu toy'u tema,

toxyry ovy ijuru ha'e haĩ rupi.

₁₀Xee ma xerembiayvu mba'e,

ha'e rã ha'e xepota.

₁₁Eju xerembiayvu, jaa nhuũndy rupi jaiko,

pytũ jaaxa aguã tekoa'i rupi.

₁₂Ko'ẽmba'i ramove javy voi vy jaa uvaty re nhama'ẽ vy.

Jaexa uva poty ojepe'a ma paa,

ha'e yvyra hi'a va'e henhoĩ paa.

Ha'e py ma xee aexa uka 'rã roayvu etea.

₁₃Mandrágora reakuã nhaetũ,

ha'e nhanerokẽ rupi ikuai yvyra'a iporãgueve,

ipyau ha'e yma guare guive.

Xerembiayvu, ha'e nunga ha'e javi xee amoĩ porã ndevy peguarã.