Salmo 97

₁Senhor ma huvixave oĩ.

Tovy'a yvy re ikuai va'e!

Tovy'a ypa'ũ heta ikuai va'e regua!

₂Ijyvýry rupi oĩ arai ha'e pytũ reia.

Tenda openaaty ytarã ma teko porã ha'e ha'evea rami joguerekoa oĩ.

₃Henonde oo 'rã tata

hovaigua kuery ijyvýry ikuai va'e rapypaarã.

₄Ixuguigua overa va'e ma omoexakã 'rã yvy.

Ha'e ramo yvy oexa vy oryryipa 'rã.

₅Yvyty ikuai va'e voi ei raity rami 'rã tykupa

Senhor yvy jave re ipo'aka va'e renonde.

₆Yva ma oikuaa uka 'rã heko porãa.

Ha'e ramo ha'e javi regua oexa 'rã hexakãa.

₇Tove mba'emo ra'angaa pe ikuai va'e ha'e javi nda'evei nho ta'ikuai,

mba'emo ra'angaa rive oguerovy'a va'e.

Senhor renonde toĩmba tuuete ramigua ikuai va'e Senhor guenapy'ã re.

₈Sião tetã rupi ha'e nunga oendu vy ovy'aa 'rã okuapy,

Judá regua tekoa ikuai va'e rupi voi ovy'apaa 'rã,

Senhor, ndereko porãa rexa uka ramo.

₉Mba'eta ndee anho Senhor Yvate ete va'e reiko,

yvy jave re ndepo'aka va'e.

Ndee ma tuuete ikuai va'e áryve reĩ va'e.

₁₀Peẽ kuery Senhor peayvu va'e, pembojeguaru ke teko vai.

Mba'eta onhangareko 'rã ojeupegua kuery iky'a e'ỹ va'e nhe'ẽ re,

ogueraa jepe 'rã guive heko vai va'e po gui.

₁₁Heko porã va'e pe ma ome'ẽ 'rã hexakã va'e,

ha'e anhetẽ rupi ipy'a va'e pe ome'ẽ 'rã ovy'a aguã.

₁₂Pendeko porã va'e, perovy'a ke Senhor.

Peporaei hery iky'a e'ỹ va'e rupi!