1Yy oxyry va'e gui guaxu oy'uxe va'e rami
xenhe'ẽ py xee avi roeka, Xeruete.
2Xepy'a py aendu Nhanderuete re nda'evei etea, Nhanderuete oikove va'e re.
Raka'e nda'u aa 'rã Nhanderuete renonde aĩ aguã?
3Ara py ha'e pyávy xerexay re anho aiko akaru e'ỹ re.
Ha'e ramia ja xevy aipo'ea riae: “Mamo tu oĩ Nderuete?”
4Ymave rupi aikoague re xema'endu'a vy
xepy'a vai aikovy xenhe'ẽ py guive,
mba'eta xema'endu'a heta va'e kuery reve aa ague re.
Ajogueraa va'ekue Nhanderuete pegua oo katy.
Rovy'aa rupi rojapukai rovy va'ekue roporaei reve,
heta orekuai ngarua py.
5Xenhe'ẽ, mba'e re tu ndeporiau ri?
Mba'e re tu nda'evei rei reĩ xepy'apy py?
Earõ tema Nhanderuete, mba'eta aroporaei nho 'rã.
Ha'e ma Xeruete xepytyvõa oiko.
6Xepy'a py aendu nda'evei etea.
Ha'e nunga rupi ndere xema'endu'a aikovy
Jordão yvýry aikoa py, Hermom yvyty re ha'e Mizar yvy'ã'i re.
7Peteĩ yvykua gui onhendu amboae yvykua peve ytu revovo.
Ha'e rami aendu ndeguigua yai xe'áry oaxa-axa va'e.
8Ha'e rami teĩ ara nhavõ Senhor oexa uka 'rã xemboaxya,
ha'e pytũ nhavõ ou 'rã ixupe aporaei aguã,
xenhe'ẽ Ruete pe anhembo'e aguã.
9Nhanderuete xe'itaova pe aipoa'e:
“Mba'e re tu nderexarai xegui?
Mba'e re tu ajexavai aikovy xerovaigua kuery xeavyky rei rã?” ha'e.
10Mba'eta aendu xekãgue ha'ypa va'e rami,
xerovaigua kuery xere ijayvu rei ramo.
Ha'e kuery ijayvu vy
“Mamo tu Nderuete oĩ?” he'i okuapy.
11Xenhe'ẽ, mba'e re tu ndeporiau ri?
Mba'e re tu nda'evei rei reĩ xepy'apy py?
Earõ Nhanderuete, mba'eta aroporaei nho 'rã.
Ha'e ma Xeruete xepytyvõa oiko.
