Salmo 41

₁Ovy'a ete 'rã iporiaukue'i mboaxya kuery.

Ha'e va'e kuery Senhor ogueraa jepe 'rã nda'eveia ára.

₂Senhor oepy ha'e opena porã 'rã hekovea re.

Ojapo 'rã yvy re ovy'a aguã rami.

Nomboaxai 'rã hovaigua kuery po py ojavyky rei aguã.

₃Senhor omombaraete ju 'rã imba'eaxya gui.

Imba'eaxy teĩ hupa ituia rejapo ha'eve rei'i aguã rami.

₄Ha'e gui xee aipoa'e: “ Senhor, xemboaxy ke!

Emonguera xerekovea, ndevy ajejavy rire teĩ” ha'e.

₅Xerovaigua kuery xere ijayvu vai vy

“Raka'e tu omano 'rã, ha'e hery na'ima'endu'aavei 'rã?” he'i okuapy.

₆Ha'e kuery regua xerexa aguã ou vy ovare'ỹ va'e rupi 'rã ijayvu.

Opy'a re mba'emo vai anho omoĩ.

Oẽ vy ha'e nunga re teri rive 'rã ijayvu.

₇Ndaxerayvui va'e kuery ijayvu mbegue rei 'rã xere.

Mba'emo vai rupi xere ijayvu vy

₈“Mba'eaxy vaikue hexe oĩ va'e gui rima imba'eaxy oupy,

nopu'ãvei ma 'rã guive” he'i okuapy.

₉Xeirũ ayvuve vy ajeroviave va'ety voi

opu'ã avi xerovai, xereve okaru va'ety ae.

₁₀Ha'e rã ndee Senhor xemboaxy ke.

Xemopu'ã ju, ha'e kuery ambopaga aguã ojapo vaiague re.

₁₁Ha'e nunga rupi xee aikuaa ndee xemboaxya,

mba'eta xerovaigua kuery pe ndaxereity ukai.

₁₂Ha'e rami 'rãgue py anhetẽ rupi aikoa py xemombaraete,

ha'e xemoĩ nerenonde raka'e rã peve guarã.

₁₃Senhor Israel kuery Ruete toiko ima'endu'a porãmby

jypy'i guive raka'e rã peve.

Amém, amém.