Salmo 4

₁Xeruete xemboeko porãa, xembovai ke ajapukai ramo.

Xee ajexavai ramo xemoingo porã jevy va'ekue.

Xemboaxy jevy ke, ha'e endu anhembo'ea.

₂Peẽ avakue, raka'e peve 'rã tu axĩmba aguã rami xeapo pekuapy xemboete 'rãgue py?

Raka'e peve 'rã ovare e'ỹ va'e rive pejou porã,

ha'e peikuaa pota apu re?

₃Peikuaa pota ke pova'e re:

Senhor pe ikuai va'e kuery ma ha'e oiporavo 'rã ojeupe guarã.

Ha'e rami vy Senhor oendu 'rã ixupe ajapukaia.

₄Pendevai teĩ pejejavy eme.

Peneakãngyta áry pendetui vy

pendepy'a py penhemongeta, ha'e pepytu'u.

₅Peme'ẽ ha'evea ramigua,

ha'e pejerovia Senhor re.

₆Heta ikuai aipoe'i va'e: “Mava'e nda'u nhandevy ombou 'rã mba'emo porã?”

Senhor, ore kuery pe exa uka nderova rexakãa.

₇Xepy'a re ma remoĩ avy'a aguã.

Ha'e kuery mba'emo ra'yĩ ha'e vinho ojou reta vy ovy'a okuapya gui

xee avy'ave.

₈Xepy'a porã reve anheno vyve ake 'rã,

mba'eta Senhor, ndee anho xemombytu'u porã.