Salmo 32

₁Ovy'a ete 'rã heko vaiague omboguepaa va'e,

ojejavyague ojao'ipaa ma ramo.

₂Ovy'a ete 'rã ava ixupe Senhor “Heko vai va'e” nde'i ramo,

ipy'a re onhenhomi aguã noĩ va'e.

₃Xee ma ajejavyague namombe'ui teri jave

xekãgue voi inhymave ovy ko'ẽ nhavõ xepoaẽ ramo.

₄Mba'eta ara py ha'e pyávy xere aendu va'ekue ndepo poyia.

Ha'e ramo xembaraetea opa ovy kuaray puku py yy typaa rami.

₅Ha'e gui ma ajejavyague amombe'upa ndevy,

xereko vaia nanhomivei.

Xejeupe aipoa'e: “Amombe'u 'rã Senhor pe xereko vaia.”

Ha'e ramo remboguepa ajejavyague.

₆Ha'e ramo ndevygua kuery ha'e javi tojapukai ndevy

ndejou aguã ha'eve teria ja.

Ha'e rami vy ha'e kuery re yy tyguaxu ouvy teĩ ndoguerovyi 'rã.

₇Ndee ma anhemiaty.

Xereraa jepe 'rã ajexavaia gui,

ha'e xereraa jepeague re remoĩ avy'a reve rogueroporaei aguã.

₈Aipo're: “Romo'arandu ha'e rombo'e 'rã tape reo aguã re.

Ndere ama'ẽ ha'e romongeta 'rã.

₉Kavaju, mburika rami e'ỹ eme eiko.

Ha'e kuery ijuru xã, e'ỹ vy hova regua reve vy 'rãe rereko.

Ha'e rami e'ỹ ramo ndoikoi 'rã reipotaa rami” 're.

₁₀Heko vai va'e ma ojexavai ete 'rã.

Ha'e rã Senhor re ojerovia va'e ma omboaxya rupi 'rã oguereko.

₁₁Pendereko porã va'e, perovy'a ke Senhor, pevy'a ete.

Pevy'aa rupi peporaei atã,

pendepy'a re teko porã oĩa va'e ha'e javi.