Salmo 31

₁Senhor, ndere ae anhemi va'e.

Taiko eme oxĩmba rei va'e.

Xereraa jepe ke ndereko porãa rupi vy.

₂Endu ke ndeapyxa py, xereraa jepe pojava aguã.

Enhemoĩ xevy oo ikorapa va'e,

oo imbaraete vaipa va'e aa jepe aguã.

₃Mba'eta ndee ae xe'itaova ha'e oo ikorapa va'e reiko.

Nderery remboete ukaa rupi vy xerereko ha'e xembo'e 'rã.

₄Xepe'a 'rã nhuã nhemi rupi omoĩ mbyre gui,

mba'eta ndee ma xemombaraetea.

₅Ndepo py ae amboaxa xenhe'ẽ.

Senhor Xeruete anhetẽ va'e, ndee ae xerepy.

₆Rejou vai mba'emo ra'angaa ombojerovia va'e.

Ha'e rã xee ma Senhor re anho ajerovia.

₇Xee roguerovy'a, ajou porã 'rã ndeporayvua,

mba'eta reikuaa pota ajexavaia re,

reikuaa xenhe'ẽ oiko axya.

₈Naxemboaxai xerovaigua kuery po py.

Xemopu'ã imo'amy peteĩ henda tuvixaa py aiko aguã.

₉Senhor, ajexavaia aendu rã xemboaxy ke.

Xeporiau reia gui xerexa voi opa ovy.

Xerekove, xerete guive opa.

₁₀Xerekovea ma iporiaua re anho oaxa ovy,

xepoaẽa rupi tema aiko ma'etỹa nhavõ.

Ajejavypa rire naxembaraeteive-ive avy,

xekãgue voi opa ovy.

₁₁Xerovaigua kuery ha'e javi ojeguaru aguã rami aiko,

xero katy'i ikuai va'e kuery voi onhemondyipa xegui.

Xerexa va'ety kuery ndaxerexa xeveipa okuapy,

tape rupi xerexa va'e onha xegui.

₁₂Xegui ha'e kuery hexaraipa ma opy'a py, omanogue gui rami,

karo nhae'ũ guigua vokue rami aiko.

₁₃Mba'eta xee aendu heta ijayvu mbegue okuapy ramo,

xeyke jovaive rupi ikuai xemongyjexe vy.

Xere ijayvu mbegue vy

onhembopy'a okuapy xerekove oipe'a aguã.

₁₄Ha'e rã xee ma ajerovia Senhor re.

Ndevy pe “Ndee ma Xeruete” ha'e.

₁₅Ndepo py oĩ xe'ára.

Xepe'a ke xerovaigua kuery po gui,

xerakykue monhaa kuery xejukaxea gui.

₁₆Emoexakã ke nderova xee nerembiguai áry.

Xemboaxy vy xereraa jepe.

₁₇Senhor, ndevy pe ajapukai rire

ejapo eme axĩmba aguã rami.

Toxĩmba heko vai va'e kuery ae,

tokyrirĩmba omanoa py.

₁₈Emokyrirĩ ijapu va'e kuery,

heko porã va'e re opa marã rei ijayvu va'e,

onhemboarai rei, ojee ae ojerovia okuapy va'e.

₁₉Ndeporayvua ma yvate ete va'e,

nerenonde ojererokyjea rupi ikuai va'e pe rexa uka aguã rereko va'e.

Ha'e va'e ma rexa uka 'rã avakue ra'y kuery gui ndere onhemi va'e kuery pe anho.

₂₀Ha'e kuery renhomi 'rã ndejee ae avakue ojapo vaixea gui.

Ha'e py renhomi 'rã opa marãgua ayvu gui.

₂₁Ta'ima'endu'a porãa Senhor re!

Mba'eta xemboaxy ete

peteĩ tetã py xejokopaa ramo.

₂₂Xee ajapura reve

“Navaẽvei ma 'rã nerenonde py” ha'e va'ekue.

Ha'e rami teĩ ndee rendu ajapukaia,

xereraa jepe aguã re ajapukai ramo.

₂₃Senhor pegua iky'a e'ỹ va'e ha'e javi, peayvu ke.

Senhor ndoity ukai 'rã hexe ojerovia va'e.

Ha'e rã heko vai va'e ma ombopaga vaipa 'rã.

₂₄Senhor pearõ va'e kuery,

penembaraete ke, pendepy'a guaxu tema!