Messias oiko axy rire ipo'aka ju aguã re ijayvua
Jogueroporaei va'e pe Davi ombopara va'ekue, “Guaxu aje'ivegua” he'ia py oporaeia rami oporaei aguã.
1Xeruete, Xeruete, mba'e re tu xereja ri?
Mba'e re tu ajexavaia rupi ajapukai teĩ
mombyry ri repyta xegui xereraa jepe e'ỹ aguã?
2Xeruete, ára py ajapukai ramo naxembovai,
pyávy voi ndapytu'ui ae.
3Ha'e rami teĩ ndee ma iky'a e'ỹ va'e reiko.
Nerenda repenaaty py reguapy reiny Israel kuery oporaei okuapy va'e mbyte.
4Oreramoĩ kuery ma ndere ojerovia raka'e.
Ojerovia ramo reraa jepe.
5Ndevy pe ha'e kuery ojapukai ramo reo jepe raka'e.
Ndere ojerovia, nda'eve e'ỹi nho guive.
6Ha'e rã xee ma taxo, ava e'ỹ merami,
mba'eta avakue pe ovare e'ỹ va'e,
heta va'e kuery oipota va'e'ỹ aiko.
7Xerexaa kuery ha'e javi xejojai rei.
Hembe'a rei reve oakã ombovava vy aipoe'i:
8“ Senhor re rejerovia ramo tanderepy.
Ha'e ae tandereraa jepe, hexe ndererovy'a ri vy”, he'i okuapy.
9Ha'e rami teĩ ndee ma xetui'i aguã rami xeapo va'ekue.
Xere repena porã va'ekue akambu'i teri jave.
10Xetui'i guive ndevy aiko.
Xeryru'i py aĩa pyve ndee Xeruete reiko.
11Aỹ ma enhemombyry eme xegui,
mba'eta ovaẽ ma ajexavai aguã,
ha'e xepytyvõarã ndoikoi.
12Heta ikuai toro nharõ rami xejoko va'e,
toro mbaraetekueve Basã pygua xembojere rei okuapy.
13Xere ha'e kuery ijuru jai,
guary nhomboa'ypa va'e rami okororõ.
14Yy rami anheẽ,
ha'e xekãgue ha'e javi oku'epa,
xeryepy re xekuraxõ ma ei raity hykupa va'e rami ojeapo.
15Yapo guigua pẽgue ipirupaa rami
xembaraetea voi opa ma,
xeapekũ guive xejurupy re oja ma oiny.
Ha'e rami py ndee xereity yvy ku'i rupi amano aguã.
16Jagua kuery xembojere rei okuapy,
joapo vai va'ety kuery nhomoirũmba va'e.
Xepo ha'e xepy ombokuapa.
17Aexapa xekãgue ha'e javi'i.
Ha'e kuery xere oma'ẽ okuapy xere ovy'a reia py.
18Xeao jomeme omboja'opa ma.
Xekamixa puku re oexa okuapy xortea.
19Ha'e rã ndee Senhor, ejepe'a eme xea gui.
Xemombaraetea, ejapura ke xerepy aguã.
20Eraa jepe xerekove ha'e kuery kyxe gui,
jagua kuery oipe'a ta va'e gui.
21Xereraa jepe ke guary juru gui,
búfalo rakua gui guive.
Tá, ndee ma xembovai ma!
22Ha'e rami rire xeryvy kuery oendua py xema'endu'a 'rã nderery re,
heta va'e kuery mbyte rogueroporaei 'rã, po rami:
23“ Senhor renonde pejererokyjea rupi pendekuai va'e, peroporaei.
Pembojerovia, peẽ Jacó ramymino kuery ha'e javi.
Israel ramymino kuery ha'e javi, pemboete pekuapy.
24Mba'eta ha'e naxemboaxy e'ỹi ajexavai rã,
ndojeguarui guive aiko axya gui,
ngova voi nomo'ãi xegui.
Ha'e rami 'rãgue py oendu xereraa jepe aguã ajapukai ramo”, ha'e 'rã.
25Mba'eta ndegui ae ou ijaty va'e kuery mbyte xee rogueroporaei aguã.
Nerenonde ojererokyjea rupi ikuai va'e oexaa py ajapo 'rã anhemboayvuague.
26Ha'e ramo iporiaukue'i okaru 'rã okuapy hevyatãmba peve.
Senhor oeka va'e oguerovy'a 'rã okuapy.
Ha'e kuery kuraxõ toikove riae!
27Ha'e nunga rupi yvy apy peve ima'endu'aa 'rã Senhor re,
ixupe guarã ojeko rerova 'rã okuapy.
Henonde guenapy'ã re yvy regua kuery ha'e javi oĩmba 'rã okuapy.
28Mba'eta Senhor pegua ae ipo'aka aguã.
Ha'e ae 'rã opena yvy regua kuery re.
29Yvy regua oguerekopa rei va'e kuery voi okaru vy ombojerovia 'rã okuapy.
Yvy re onhono porã mbyre ha'e javi 'rã oĩ guenapy'ã re henonde,
guekove ae'i re nopena kuaai va'ekue.
30Tamymino kuery voi ha'e oipotaa rami 'rã ikuai.
Mba'eta raka'eve rã ikuai va'e pe ijayvua 'rã Senhor reko re.
31Ha'e kuery ou vy omombe'u 'rã ixuguigua teko porã.
Raka'eve rã ikuai va'erã pe omombe'ua 'rã ha'e ojapo va'ekue.
