Salmo 135

₁Aleluia!

Peporaei Senhor rery rupi,

peroporaei Senhor, hembiguai pendekuai va'e,

₂ixupegua oo rupi pemba'eapo va'e,

Nhanderuete pegua roka rupi guive.

₃Peroporaei ke Senhor, porayvu va'e ramo.

Peporaei hery rupi, iporã ete ramo.

₄Mba'eta ojeupe guarã Senhor oiporavo Jacó,

oiporavo Israel kuery oguereko aguã.

₅Xee aikuaa ae Senhor yvate ete va'ea,

mba'eta tuuete ikuai va'e áryve Nhanderuete oiko.

₆Senhor ma oipota va'e ha'e javi ojapo va'e,

yva ha'e yvy re, ye'ẽ py ha'e iguýry rupi.

₇Arai omopu'ã 'rã heruvy yvy apy katy gui,

overa va'e voi oguereko katu 'rã oky aguã.

Yvytu ma ojapo 'rã oĩa gui oipeju aguã rami.

₈Egito yvy re ha'e ae ojukapa va'ekue ta'y kuery jypy guare,

avakue ha'e mymba kuery guive.

₉Ha'e py ojapo hexa pyrã ha'e nhomondyipaarã

Faraó ha'e hembiguai kuery rovai.

₁₀Senhor ma heta regua omomba va'ekue,

huvixave ipo'akapa va'e guive ojuka.

₁₁Ojuka amorreu kuery ruvixa Seom

ha'e Basã pygua huvixa Ogue,

ha'e gui Canaã yvy regua huvixa kuery ha'e javi.

₁₂Ha'e gui ma ijyvykue

ojeupegua Israel kuery pe omboaxapa.

₁₃Senhor, nderery oĩ 'rã raka'e rã peve,

raka'e rã ikuai va'e voi ima'endu'a 'rã ndere.

₁₄Mba'eta Senhor ma ojeupegua kuery re oikuaa pota 'rã,

omboaxy 'rã guembiguai kuery.

₁₅Ha'e rã yvy regua kuery ruete kuery ma

prata ha'e ouro guigua rive, avakue ae opo py ojapo va'ekue meme.

₁₆Ijuru va'eri nda'ijayvui,

hexa va'eri ndoexai,

₁₇ijapyxa va'eri noendui,

ipytuẽ aguã voi nda'evei.

₁₈Ijapoare kuery ma ha'e rami ae ju 'rã ikuai,

hexe ojerovia va'e kuery ha'e javi guive.

₁₉Israel ramymino kuery, penema'endu'a porã Senhor re!

Arão ramymino kuery, penema'endu'a porã Senhor re!

₂₀Levi ramymino kuery, penema'endu'a porã Senhor re!

Senhor renonde pejererokyjea rupi pendekuai va'e, penema'endu'a porã Senhor re!

₂₁Sião tetã guive ta'ima'endu'a porãa

Senhor Jerusalém py oĩ va'e re.

Aleluia!