Salmo 119

₁Ovy'a ete 'rã iky'a e'ỹa rupi oiko va'e,

Senhor guigua lei rupi ae.

₂Ovy'a ete 'rã oikuaa uka va'ekue rupi oiko va'e,

opy'a ha'e javi py onhe'ẽ rendu va'e.

₃Ha'e va'e kuery ma mba'emo vai rupi e'ỹ ikuai,

Nhanderuete guigua tape rupi anho.

₄Rejapo uka va'e reikuaa uka

rojapopa ete aguã.

₅Aguataa toĩ atã

ndeayvu reja va'ekue rupi aiko aguã.

₆Ha'e rami vy axĩmba aguã rami e'ỹ 'rã aiko

rejapo uka va'e ha'e javi re aikuaa pota vy.

₇Peteĩ rami xepy'a reve roguerovy'a 'rã,

ha'evea rami ndeayvuague aikuaa rire.

₈Xee ma ajapo 'rã ndeayvu reja va'ekue.

Xereja eme ke.

₉Mba'exa vy nda'u kunumigue onhemongy'a e'ỹ re oiko 'rã?

Ndeayvu rupi oiko ri vy tema.

₁₀Xee ma xepy'a ha'e javi py roeka va'e.

Ejapo eme rejapo uka va'ekue gui ajepe'a aguã rami.

₁₁Xepy'a re amoĩ 'rã ndeayvuague

nderovai ajejavy e'ỹ aguã.

₁₂Senhor, xee ma rogueroporaei 'rã.

Xembo'e ke ndeayvua reja va'ekue rupi aiko aguã re.

₁₃Xeayvu tema xema'endu'a vy

reikuaa potaa rupi ndeayvuague ha'e javi re.

₁₄Opa mba'e porã gui

arovy'ave ndee reikuaa uka va'ekue.

₁₅Anhembo'e aikovy ndee orembo'ea re,

aikuaa pota 'rã reikoa re.

₁₆Ndeayvua reja va'ekue re xee avy'a.

Ndaxerexarai 'rã ndeayvuague re.

₁₇Ejapo porã xee nerembiguai pe,

aikove ha'e ndeayvuague rupi aiko aguã.

₁₈Eipe'a ke xerexa jokoa,

aexa kuaa aguã ndeguigua lei re iporã ete va'e oĩ va'e.

₁₉Ko yvy re aikoa ja hekoa e'ỹ va'e rami aiko.

Eikuaa uka e'ỹ eme ke rejapo uka va'ekue.

₂₀Xepy'a py aendu nda'evei etea,

ne'arandua rupi ndeayvuague aenduxe riae vy.

₂₁Ndee ma ojejou porã rei va'e ha'e ayvu vaipy kuery pe ndeayvu ete va'e.

Ha'e kuery ojepe'a okuapy rejapo uka va'ekue gui.

₂₂Eipe'a ke xere ijayvu reia ha'e ovy'a reia,

mba'eta xee ma reikuaa uka va'ekue rupi aiko ramo.

₂₃Xere huvixa kuery ijayvu aguã nhomboatypa teĩ

xee nerembiguai aikuaa pota aikovy ndeayvu reja va'ekue re.

₂₄Reikuaa uka va'ekue ma xembovy'a va'e.

Ha'e va'e ma xemongetaa guive.

₂₅Yvy rupi xereitya ma.

Xemoingo porã ju ke ndeayvuague rami vy.

₂₆Xerekokue amombe'upa ramo ndee xembovai.

Xembo'e ke ndeayvua reja va'ekue rupi aiko aguã.

₂₇Eikuaa uka ke renhombo'eague rami aiko aguã,

ha'e xee aikuaa pota 'rã iporã ete va'e reikuaa uka va'e re.

₂₈Xepy'a py xeporiau ndavy'avei vy.

Xemombaraete ju ke ndeayvuague rami vy.

₂₉Xepe'a ke ijapu va'e kuery rape gui.

Xemboaxy ke ndeguigua lei re oĩa rami vy.

₃₀Aiporavo tape vy'aa katygua,

amoĩ ne'arandua rupi aiko aguã.

₃₁Reikuaa uka va'ekue rupi pota aiko.

Senhor, xeapo eme axĩmba aguã rami.

₃₂Anha 'rã avy tape rejapo uka va'ekue oĩa rupi,

xepy'a py xembovy'a rire.

₃₃Senhor, xembo'e ke ndeayvua reja va'ekue rupi aiko aguã.

Ha'e va'e rupi aiko 'rã opa peve.

₃₄Xemo'arandu ke, ha'e ramo aiko 'rã ndeguigua lei rupi.

Xepy'a ha'e javi py 'rã ajapo.

₃₅Xerereko ke tape rejapo uka va'ekue oĩa rupi,

mba'eta ha'e va'e anho arovy'a.

₃₆Xepy'a re emoĩ reikuaa uka va'ekue rupi aiko aguã,

mba'emo ajoupave aguã rupi e'ỹ.

₃₇Xemoma'ẽ eme ovare e'ỹ va'e re.

Xembopy'a guaxu ke ndeguigua tape rupi.

₃₈Nerembiguai pe emoĩ atãve ndeayvuague,

nerenonde ojererokyjea rupi ikuai va'e pe reme'ẽ rire.

₃₉Eipe'a ke xere ijayvu reia xemongyje va'e,

mba'eta ne'arandua anho ha'eve.

₄₀Ma'ẽ, ndee xembo'ea rami anho aikoxe va'e.

Xembopy'a guaxu ke ndereko porãa rupi.

₄₁Senhor, exa uka xemboaxya.

Xereraa jepe guive ndeayvuague rami vy.

₄₂Ha'e ramo 'rãe ambovai kuaa xembojaru rei okuapy va'e,

ndeayvua re ajerovia vy.

₄₃Xejuru gui eipe'a eme ayvu anhetẽ rupigua,

mba'eta xee ma arõ aikovy ne'arandua.

₄₄Ha'e rami vy ndeguigua lei rupi aiko riae 'rã,

raka'e rã peve.

₄₅Aiko 'rã aa jepea rupi,

ndee xembo'ea rupi pota aiko vy.

₄₆Huvixave kuery renonde voi axĩ e'ỹ re

amombe'u 'rã reikuaa uka va'ekue.

₄₇Xee arovy'a 'rã rejapo uka va'ekue,

xee ayvu vy.

₄₈Rejapo uka va'ekue ayvu vy aupi 'rã xepo,

ndeayvua reja va'ekue re aikuaa pota 'rã guive.

₄₉Nema'endu'a ke xee nerembiguai pe ndeayvuague re,

mba'eta xeapo arõ aguã rami.

₅₀Ajexavaia py xembovy'a va'e ma pova'e:

ndeayvu xembopy'a guaxua.

₅₁Ojejou porã rei va'e kuery xejojai riae,

teĩ xee ndajepe'ai ndeguigua lei gui.

₅₂Xema'endu'a ymave ne'arandua rupi ndeayvuague re.

Ha'e va'e ma xembopy'a guaxu, Senhor.

₅₃Xee aendu xevaia,

heko vai va'e ndeguigua lei rupi ve'ỹ ikuai ramo.

₅₄Mamo rã aguataa rupi oo py akea py

aroporaei aikovy ndeayvua reja va'ekue.

₅₅Senhor, pyávy xema'endu'a 'rã nderery re.

Ha'e rami vy ndeguigua lei rupi 'rã aiko.

₅₆Pova'e ma xevy guarã oĩ va'e,

ndee xembo'ea rupi aiko aguã.

₅₇Senhor ae xevygua oiko.

Ha'e ramo aipoa'e: “Ajapo 'rã ndeayvuague”, ha'e.

₅₈Xepy'a ha'e javi py ajerure xemboaxy aguã.

Xemboaxy ke ndeayvuague rami vy.

₅₉Xee ae aikoa re aikuaa pota vy

ajevy ju ndee reikuaa uka va'ekue rupi aiko aguã.

₆₀Anhea'ã 'rã, namboarei guive

rejapo uka va'ekue ajapo aguã.

₆₁Heko vai va'e kuery nhuã xejura

teĩ ndaxerexarai 'rã ndeguigua lei gui.

₆₂Pytũ mbyte jave teĩ apu'ã 'rã roporaei aguã,

ne'arandua rupi ndeayvuague anhetẽ va'e meme ramo.

₆₃Anhemoirũ 'rã nerenonde ojererokyjea rupi

ha'e rembo'eague rami ikuai va'e reve.

₆₄Senhor, yvy jave re rexa uka ndeporayvua.

Xembo'e ke ndeayvua reja va'ekue re.

₆₅Senhor, xee nerembiguai pe rejapo porã,

ndeayvuague rami vy.

₆₆Xembo'e ke 'arandu ha'e aikuaa aguã re,

rejapo uka va'ekue rupi ajerovia ramo.

₆₇Ajexavai e'ỹ mbove ha'eve e'ỹa rami aiko va'ekue,

teĩ aỹ ma ajapo aikovy ndeayvua.

₆₈Ndee ma heko porã ha'e ojapo porã va'e.

Xembo'e ke ndeayvua reja va'ekue re.

₆₉Ojejou porã rei va'e kuery ma xere ijayvu rive

teĩ xepy'a ha'e javi py ajapo renhombo'eague.

₇₀Ha'e kuery ma ipy'a ratã va'e.

Ha'e rã xee ma arovy'a ndeguigua lei.

₇₁Ajexavaiague ma ojapo porã xevy,

ndeayvu reja va'ekue aikuaa nho aguã.

₇₂Mbovy e'ỹ ouro ha'e prata guigua oĩ va'e rire

xevy pe ovareve 'rãgue ndejuru gui lei oẽ va'e.

₇₃Ndepo py ae xeapo ha'e xemoingo raka'e.

Xembo'e ke aikuaa aguã rejapo uka va'ekue.

₇₄Nerenonde ojererokyjea rupi ikuai va'e xerexa vy ovy'a okuapy,

ndeayvuague re ajerovia ramo.

₇₅Senhor, xee aikuaa porã ha'evea rami ndeayvua,

ojeroviapy reikoa rupi ae xemoingo axy va'ekue.

₇₆Tou ha'vy ndeporayvua xembopy'a guaxu aguã,

xee nerembiguai pe ndeayvuague rami vy.

₇₇Xere embou xemboaxya aikove aguã,

mba'eta ndeguigua lei re xee avy'a.

₇₈Ojejou porã rei va'e kuery toxĩmba, mba'e py e'ỹ xembojexavai rire.

Ha'e rã xee ma aikuaa pota 'rã ndee xembo'ea re.

₇₉Nerenonde ojererokyjea rupi ikuai va'e toupa xeirũrã,

reikuaa uka va'ekue oikuaa va'e guive.

₈₀Xepy'a py tajapopa ndeayvu reja va'ekue,

axĩmba e'ỹ aguã.

₈₁Ndee xereraa jepe aguã arõ vy xenhe'ẽ ikangy.

Ha'e rami teĩ arõ tema ndeayvuague.

₈₂Xerexa ikane'õmba ma ndeayvuague arõ rã.

“Raka'e 'rã tu xembopy'a guaxu?” ha'e.

₈₃Tata áry hyru ipirekue guigua omoĩ mbyre ipirupaa ramigua aiko,

teĩ ndaxerexarai ndeayvu reja va'ekue gui.

₈₄Mbovy ára teri 'rã nda'u xee nerembiguai aikove?

Raka'e nda'u xerepy 'rã xerakykue monhaa kuery gui?

₈₅Ojejou porã rei va'e kuery ndeguigua lei rupi e'ỹ ikuai va'e ma

yvykua ojo'o okuapy xembo'a aguã.

₈₆Rejapo uka va'ekue ma anhetẽ va'e meme.

Xerepy ke mba'e py e'ỹ xerakykue monhaa kuery gui.

₈₇Ha'e kuery xemomba rai'i ma ko yvy re.

Ha'e rami teĩ xee ndajepe'ai 'rã renhombo'ea gui.

₈₈Xembopy'a guaxu ke xemboaxya rupi vy,

ha'e rã ajapo 'rã ayvu ndejuru gui oẽ va'e.

₈₉Senhor, yva re ndeayvuague oĩ atã 'rã

raka'e rã peve guarã.

₉₀Ojeroviapy riae 'rã reiko raka'e rã peve guarã.

Yvy renhono rire ha'ekue py ae oĩ.

₉₁Ndeayvuague rami vy opa mba'e oĩmba porã aỹ peve,

mba'eta ndevygua meme ikuai.

₉₂Ndeguigua lei re'ỹ avy'a va'e rire

yma ma amano 'rãgue aiko axy vaipa vy.

₉₃Xee ma ndaxerexarai 'rã renhombo'eague re,

ha'e va'e rupi xemoingove rire.

₉₄Xereraa jepe ke ndevygua aiko ramo,

mba'eta aeka renhombo'eague.

₉₅Heko vai va'e kuery xerarõ okuapy xemokanhy aguã,

ha'e rã xee ma aikuaa pota 'rã reikuaa uka va'ekue re.

₉₆Xee aexa rã iporãgue ikuai va'e ha'e javi opa va'erã.

Ha'e rã rejapo uka va'ekue ma opa va'erã e'ỹ.

₉₇Xee ma ayvu ete ndeguigua lei!

Ára pukukue re hexe anho aikuaa pota.

₉₈Rejapo uka va'ekue ojapo xerovaigua kuery gui xe'aranduve aguã rami,

xepy'a re amoĩ riae ramo.

₉₉Xembo'ea kuery ha'e javi gui xee aendu kuaave,

reikuaa uka va'ekue re aikuaa potaa rupi vy.

₁₀₀Tujakue gui voi xe'aranduve,

renhombo'eague rami aiko vy.

₁₀₁Tape vai ha'e javi gui xee ajepe'a,

ndeayvuague re aikuaa pota aguã.

₁₀₂Ha'e rã ndeayvuague gui ma xee ndajepe'ai 'rã,

ndee xerekombo'e ramo.

₁₀₃Ndeayvu aa'anga rã he'ẽ va'e ramigua,

ei gui he'ẽve xejuru pe.

₁₀₄Renhombo'eague rupi vy xe'arandu 'rã.

Ha'e rã tape anhetẽ e'ỹ va'e ma ajeguarua meme.

₁₀₅Ndeayvu ma tataendy oĩ aguata aguã,

aikoa rupi omoexakã va'e.

₁₀₆Aura karamboae, ha'e auraague amoĩ atã guive,

ha'evea rami ndeayvuague rupi aiko aguã.

₁₀₇Xee ma aiko axy vaipa ma.

Senhor, xemoingove ke ndeayvuague rami vy.

₁₀₈Senhor, ejopy ke ame'ẽxea'i py xeayvu ame'ẽ va'e,

ha'e xembo'e ndeayvuague re.

₁₀₉Xejukaxea kuerya rupi riae aiko,

teĩ ndeguigua lei gui ndaxerexarai 'rã.

₁₁₀Heko vai va'e kuery ma nhuã omoĩ xerovai,

teĩ xee ndajepe'ai 'rã renhombo'ea gui.

₁₁₁Reikuaa uka va'ekue ma raka'e rã peve guarã amoĩ xejee,

mba'eta xepy'a py arovy'a.

₁₁₂Xepy'a re amoĩ ndeayvu reja va'ekue rupi aiko aguã,

raka'e rã ha'e opa peve.

₁₁₃Mokoĩ rupi rei ijayvu va'e ma xee ajou vai.

Ha'e rã ndeguigua lei ma arovy'a.

₁₁₄Ndee ma anhemiaty ha'e mba'emo vai jokoa reiko.

Ndeayvua re ae ajerovia.

₁₁₅Mba'emo vai rupi pendekuai va'e, pejepe'a ke xea gui.

Xee ma ajapoxe Xeruete ojapo uka va'e.

₁₁₆Xepytyvõ ke ndeayvuague rami vy, aikove aguã.

Emoingo e'ỹ eme arõ va'e, axĩmba e'ỹ aguã.

₁₁₇Xemombaraete ramo 'rãe aa jepe,

ha'e ndeayvu reja va'ekue rupi aiko.

₁₁₈Rejou vai ndeayvuague gui ojepe'a va'e,

mba'eta apu py ae ha'e kuery nhombotavypa 'rã.

₁₁₉Yty rami rive remombo 'rã heko vai va'e yvy jave re ikuai va'e.

Ha'e nunga rupi xee arovy'a reikuaa uka va'ekue.

₁₂₀Nerenonde ajererokyje vy xero'o pirĩmba,

ndeayvua re ae ajererokyje.

₁₂₁Xee ma anhetẽ ha'e teko porã rupi ajoguereko va'e.

Xemboaxa eme ke xerovaigua kuery po py.

₁₂₂Xee nerembiguai xerepy ke aiko porãve ju aguã.

Xembojexavai uka eme ojejou porã rei va'e kuery pe.

₁₂₃Xerexa ikane'õmba ma xereraa jepearã arõ riae vy,

ndereko porãa rupi ndeayvuague ojeupity aguã guive.

₁₂₄Ereko nerembiguai remboaxya rupi.

Xembo'e ke ndeayvu reja va'ekue re.

₁₂₅Xee ma nerembiguai aiko.

Xemo'arandu ke reikuaa uka va'ekue aikuaa aguã.

₁₂₆Senhor, ovaẽ ma reikuaa pota aguã ára,

mba'eta ndeguigua lei rupi nda'ikuaiai ramo.

₁₂₇Xee ma ouro gui arovy'ave rejapo uka va'ekue,

ouro oiky'a'o pyre gui voi.

₁₂₈Ha'e nunga rupi renhombo'eague pe “Anhetẽ va'e meme” ha'e.

Ha'e rã ijapu va'e kuery reko ma ajou vai.

₁₂₉Reikuaa uka va'ekue ma iporã ete.

Ha'e va'e rupi aiko xepy'a ha'e javi py.

₁₃₀Ndeayvu reikuaa uka ramo omoexakã vy

omo'arandu 'rã hi'arandu e'ỹ'i va'ekue.

₁₃₁Xejuru aipe'a vy xepytuẽ atã,

rejapo uka va'ekue aikuaa porãvexe vy.

₁₃₂Eju ju xea py, ha'e xemboaxy,

nderery oayvu va'e kuery pe rejapoaty rami vy.

₁₃₃Emoĩ atã ke ndeayvuague rupi aikoa.

Ha'e rã teko vai va'e guive rã ta'ipo'aka eme xere.

₁₃₄Xerepy ke avakue xemoingo axy reia gui,

ha'e ramo aiko 'rã renhombo'eague rami.

₁₃₅Xee nerembiguai áry taexakã nderova,

ha'e xembo'e ndeayvu re.

₁₃₆Xerexay ma yakã rami oxyry,

ndeguigua lei rupi e'ỹ avakue ikuai rã aexa vy.

₁₃₇Senhor, ndee ma ndereko porã va'e,

ndeayvua guive anhetẽ va'e meme.

₁₃₈Reikuaa uka va'ekue ma anhetẽ rupi reja,

ojeroviapy guive.

₁₃₉Ndeayvu gui xerovaigua kuery hexaraipa rã aexa vy

nda'evei etea aendu va'e xemomba rai'i.

₁₄₀Ndeayvua ma iky'a e'ỹ ete va'e.

Ha'e nunga rupi xee nerembiguai arovy'a.

₁₄₁Xee ma yvyĩ'i va'e, oayvupy e'ỹ aiko va'eri

ndaxerexarai renhombo'eague re.

₁₄₂Ndeguigua teko porã ma opa va'erã e'ỹ,

ndeguigua lei ma anhetẽ va'e meme.

₁₄₃Xe'áry jexavai ha'e ndavy'ai etea ou teĩ

rejapo uka va'ekue ma xembovy'a kuerei.

₁₄₄Reikuaa uka va'ekue ma ha'evea ramigua meme raka'e rã peve guarã.

Xemo'arandu ke ha'e va'e rupi, ha'e ramo aikove 'rã.

₁₄₅Xepy'a ha'e javi py xee ajapukai ndevy.

Senhor, xembovai ke, ha'e ramo ajapo 'rã ndeayvu reja va'ekue.

₁₄₆Ndevy ajapukai. Xereraa jepe ke,

ha'e ramo aiko 'rã reikuaa uka va'ekue rupi.

₁₄₇Ko'ẽ e'ỹ mbove'i ajapukai,

ndeayvua arõ ajerovia reve.

₁₄₈Pytũ mbukukue re xerexa ndokei,

ndeayvuague re aikuaa pota aguã.

₁₄₉Senhor, ndeporayvua rupi endu ke xeayvua.

Ndeayvuague rami vy xemoingove.

₁₅₀Teko vai rupi ikuai va'e ovaẽ rai'i ma xea py.

Ha'e kuery ma ndeguigua lei gui ojepe'a va'e.

₁₅₁Senhor, mombyry e'ỹ ndee reiko,

rejapo uka va'ekue ma anhetẽ va'e meme.

₁₅₂Yma ma aikuaa ndeayvuague

raka'e rã peve guarã reja va'ekue.

₁₅₃Eikuaa pota ke aiko axya re, xereraa jepe guive,

mba'eta xee ma ndeguigua lei gui ndaxerexarai 'rã.

₁₅₄Xerepy ke, ha'e xereraa jepe.

Ndeayvuague rami vy xemoingove.

₁₅₅Heko vai va'e kuery ma oo jepe aguã gui mombyry ikuai,

ndeayvu reja va'ekue ndoikuaaxei vy.

₁₅₆Senhor, opa mba'e py ndee oremboaxy 'rã!

Ndeayvuague rami vy xemoingove.

₁₅₇Heta ete ikuai xerovaigua kuery xerakykue monha va'e,

teĩ xee ndajepe'ai 'rã reikuaa uka va'ekue gui.

₁₅₈Ojerovia e'ỹ va'e kuery aexa vy aendu ndajou porãia,

ndeayvuague rami e'ỹ ikuai rã.

₁₅₉Eikuaa pota ke renhombo'eague arovy'aa re.

Senhor, ndeporayvua rupi xemoingove.

₁₆₀Ndeayvua ma jypy guive anhetẽ va'e meme.

Ha'evea rami ndeayvuague raka'e rã peve guarã.

₁₆₁Huvixa kuery mba'e py e'ỹ xemoingo axy

teĩ xepy'a py ajererokyjea va'e ma ndeayvu ae.

₁₆₂Mba'emo rejapo aguã re ndeayvuague aendu vy avy'a,

amongue ojou reta va'e rami.

₁₆₃Xee ma ajeguaru apu gui, ajou vai ete guive.

Ha'e rã ndeguigua lei ma arovy'a.

₁₆₄Ára nhavõ sete-kue kuerei 'rã rogueroporaei,

ndeayvuague ha'evea ramigua meme ramo.

₁₆₅Ndeguigua lei oguerovy'a va'e ma ovy'a ete 'rã,

ndoikoi 'rã guive ha'e kuery reityarã.

₁₆₆Senhor, arõ aikovy ndee xereraa jepe aguã,

rejapo uka va'ekue ajapo reve.

₁₆₇Xepy'a py aiko reikuaa uka va'ekue rupi,

arovy'a ete vy.

₁₆₈Renhombo'eague ha'e reikuaa uka va'ekue rupi aiko,

mba'eta nerenonde ojekuaa aikoa ha'e javi.

₁₆₉Senhor, ajapukaia tovaẽ ndea peve.

Xemo'arandu ke ndeayvuague rami vy.

₁₇₀Nerenonde py tovaẽ ajerurea.

Xereraa jepe ke ndeayvuague rami vy.

₁₇₁Xejuru tandereroporaei,

mba'eta xembo'e ndeayvu reja va'ekue re.

₁₇₂Xeayvu py tarovy'a ndeguigua lei,

mba'eta rejapo uka va'ekue ha'evea ramigua meme.

₁₇₃Embou ndepo xerepy aguã,

renhombo'eague aiporavo rire.

₁₇₄Senhor, arõ ete xereraa jepe aguã.

Ndeguigua lei anho arovy'a.

₁₇₅Emoingove xenhe'ẽ rogueroporaei aguã.

Ndeayvuague taxepytyvõ.

₁₇₆Vexa'i kanhygue rami aiko. Xereka ke,

mba'eta xee nerembiguai ndaxerexarai 'rã rejapo uka va'ekue gui.