Salmo 118

₁Perovy'a ke Senhor, porayvu va'e ramo.

Mba'eta nhomboaxya opa va'erã e'ỹ.

₂Israel kuery aipo te'i:

“Tá, nhomboaxya opa va'erã e'ỹ.”

₃Arão ramymino kuery aipo te'i:

“Tá, nhomboaxya opa va'erã e'ỹ.”

₄Senhor renonde ojererokyjea rupi ikuai va'e ha'e javi aipo te'i:

“Tá, nhomboaxya opa va'erã e'ỹ.”

₅Ha'e gui xee ma ajexavaia py ajapukai Senhor pe.

Ha'e ramo Senhor oendu vy xerepy karamboae.

₆Xereve Senhor oiko ramo xee ndakyjei 'rã.

Mba'e tu avakue ojapo 'rã xere?

₇Senhor xereve oiko xepytyvõarã.

Ha'e nunga rupi aexa 'rã xere ija'e e'ỹ va'e kuery re aipotaa ojeupity ramo.

₈Avakue re jajerovia 'rãgue py

ha'eveve Senhor re nhanhemi.

₉Huvixa kuery re jajerovia 'rãgue py

ha'eveve Senhor re nhanhemi.

₁₀Ha'e javi regua xembojere rei okuapy,

teĩ Senhor rery rupi amomba.

₁₁Jova-jovai gui xejokopa,

teĩ Senhor rery rupi amomba.

₁₂Eiru rami ete xeao'i okuapy,

teĩ tata py juu okaia rami okaipa.

Senhor rery rupi amomba.

₁₃Opoxya rupi xemoanha ratã heravy xereity aguã,

teĩ Senhor xepytyvõ.

₁₄Senhor ma xemombaraetea oiko, aroporaei va'e guive,

xereraa jepe rire.

₁₅Heko porã va'e rekoa rupi onhendu

heraa jepeare oguerovy'a va'e:

“ Senhor opo'akaa rupi ojapo mba'emo porã!

₁₆Senhor opo oupi vy

mba'emo porã ojapo” he'i va'e.

₁₇Xee ma namanovei 'rã.

Ha'e rami 'rãgue py aikove 'rã,

Senhor ojapo va'ekue amombe'upa aguã.

₁₈Senhor xembopaga ete,

teĩ manoa pe naxemboaxai guive.

₁₉Peipe'a ke xevy teko porã rokẽ,

ha'e va'e rupi aike vy Senhor aroporaei aguã.

₂₀Ha'e va'e ae ma Senhor rokẽ,

ha'e va'e rupi heko porã va'e anho 'rã oike.

₂₁Xee rogueroporaei 'rã,

xepytyvõ vy xereraa jepe rire.

₂₂Oo apoa kuery ita omombo va'ekue ma

yvatevea py opyta iporãvea pyguarã.

₂₃Ha'e nunga ma Senhor ae ojapo,

ha'e jaexa rã iporã ete va'e.

₂₄Kova'e ára ma Senhor omoingo va'ekue.

Ha'e ramo javy'a ha'e jarovy'a 'rã.

₂₅Senhor, orereraa jepe ke, rojerure!

Oremoingo porã ke, Senhor!

₂₆Ima'endu'a porãmby toiko Senhor rery rupi ou va'e!

Senhor pegua opy peẽ kuery ha'e javi peike va'e rogueroayvu porã.

₂₇Senhor ma Nhanderuete ha'e nhanemoexakãa.

Ngaru oiko aguã py pembojegua mba'emo rogue py,

altar apy peve.

₂₈Ndee ma Xeruete, xee rogueroporaei 'rã.

Ndee Xeruete, xee aikuaa uka 'rã ndeyvatea.

₂₉Perovy'a ke Senhor, porayvu va'e ramo.

Mba'eta nhomboaxya opa va'erã e'ỹ.