Provérbios 17

₁Nhandero py jajoguero'apa rei reve xo'o ja'u vaipa 'rãgue py

ha'eveve nhandekuai rivea py peteĩ'i mbojape ja'u.

₂Ta'y kuery oxĩmba aguã rupi ikuai va'e gui ma tembiguai kuery hi'arandu va'e ipo'akave 'rã,

ha'e rami vy ojopy 'rã ta'y kuery peguarã va'ekue ae.

₃Prata ma hi'angaarã py 'rã nhamoĩ, ha'e ouro ma tata py,

ha'e rã nhandepy'a re oikuaa pota va'e ma Senhor ae.

₄Heko vai va'e ojapyxaka 'rã mba'emo vai rupi ijayvu va'e re,

ijapu va'e oenduxe vai 'rã ayvuxe.

₅Iporiaukue'i jojai reia kuery ma Imoingoare re voi ijayvu rei rire

jexavaia oguerovy'a rei va'e ndopaga e'ỹi 'rã.

₆Tamoĩ kuery oguerovy'a 'rã guamymino kuery,

ha'e rami ae avi ta'y kuery oguerovy'a 'rã nguu kuery.

₇Hi'arandu e'ỹ va'e nda'ijayvu porã kuaai 'rãe,

ha'e huvixa kuery nda'evei ijapu aguã.

₈Ha'eve'ỹa rami ojapo ukaxe vy mba'emo ome'ẽ va'e oikuaa teĩ oipota va'e rei ita ojapoa rami,

mba'eta mamo rã oikoa py tema oipotaa oiko 'rã.

₉Amboae kuery ojejavyague ndoikuaa ukai va'e oexa uka oayvua,

ha'e rã mba'ekue omboaxa-axa rei va'e ma ojapo 'rã joe irũve va'ety joegui oja'o aguã rami.

₁₀Hi'arandu e'ỹ va'e cem-kue oinupãa teĩ noendui 'rã merami,

ha'e rã hi'arandu va'e ma omongetaa rã oenduxe ete 'rã.

₁₁Nanhonhe'ẽ rendui va'e kuery onhea'ã mba'emo vai re anho.

Ha'e nunga rupi ha'e kuery rovai omboua 'rã imbojexavaiarã.

₁₂Urso gua'y'i re inharõ va'e reve nhanhovaexĩa gui nda'eveive

hi'arandu e'ỹ va'e ijarakuaa rupi e'ỹ ikuai va'e reve nhanhovaexĩ.

₁₃Amongue pe ojapo porãa 'rãgue py mba'emo vai re omboekovia rire

hoo py oiko riae 'rã mba'emo vai.

₁₄Yy ombotyague gui oxyry xapy'aa rami avi jajoguero'a ypya.

Ha'e nunga rupi ha'eveve japytu'u voi, joegui jaja'o e'ỹ aguã.

₁₅Senhor ndojou porãi 'rã heko vai va'e omboeko porã rivea rã,

neĩ heko porã va'e ombopaga rivea rã guive.

₁₆Hi'arandu e'ỹ va'e o'arandurã ojoguaxe vy merami peráta oguereko opo py,

nai'arandui ae ma va'eri.

₁₇Nhaneirũ kuery nhanderayvu 'rã jaikoa jave re,

ha'e rami vy jajexavaia py onhemoingo 'rã nhaneretarã ae'i rami.

₁₈Avakue hi'arandu e'ỹ va'e onhemoĩ vai uka rive vy

ojea katy'igua orevea opaga aguã rami ikuai.

₁₉Joguero'a reixe vai va'e ojejavy reia rupi rive 'rã ikuai,

ha'e ngokẽ ombotuvixa va'ekue py ae 'rã ojeity uka.

₂₀Anhetẽ rupi e'ỹ ipy'a va'e ndojoui 'rã ha'eve va'e,

peteĩ rupi e'ỹ ijayvu va'e ho'a 'rã mba'emo vai py.

₂₁Ta'y hi'arandu e'ỹ va'e omomboriau 'rã nguu kuery.

Ndoiko kuaai rei va'e ru kuery ma ndovy'ai 'rã.

₂₂Nhandepy'a py vy'aa ma moã porã rami 'rã oĩ,

ha'e rã nhanenhe'ẽ py nhandekueraia oĩ vy ma omombirupa 'rã nhanekãgue.

₂₃Heko vai va'e onhevende nhemi 'rã peráta re,

ha'eve e'ỹa ramigua rupi joguereko aguã.

₂₄Mba'emo oikuaa va'e onhea'ã 'rã hi'aranduve aguã anho,

ha'e rã hi'arandu e'ỹ va'e ma yvy re mba'emo ikuai va'e re rei 'rã oma'ẽ oikovy.

₂₅Ta'y hi'arandu e'ỹ va'e omomboriau 'rã nguu,

omonguerai rei avi 'rã hereko'iare.

₂₆Heko porã va'e nhambopaga aguã nda'evei,

huvixa nhamoingo axy reia ma ha'eve'ỹ va'e ae.

₂₇Ayvu py ojejoko va'e ma hi'arandu va'e,

oiko rive'i va'e ma oiko kuaa va'e ae.

₂₈Hi'arandu e'ỹ va'e teĩ okyrirĩ oiny rã jaikuaa 'rã hi'arandua rami,

ijayvua py ojejoko va'e jaikuaa 'rã oiko kuaa va'e rami ae.