Provérbios 16

₁Nhande nhanhembopy'a 'rã mba'emo jajapo aguã,

ha'e rã Senhor gui ae 'rã ou nhambovai kuaa aguã.

₂Nhandevy ma jaikoa ha'e javi ha'evepa rei teĩ

Senhor oikuaa pota 'rã nhandepy'a re.

₃Emboaxa Senhor po py mba'emo rejapoxe va'e,

ha'e ramo omoingo 'rã reipotaa ha'e javi.

₄Senhor opa mba'e omoingo ha'e ae oipotaa rami,

heko vai va'e voi omoingo ojexavai aguã.

₅Opy'a py ojejou porã rei va'e gui Senhor ojeguaru vy

nombopaga e'ỹi 'rãe.

₆Nhanhomboaxya ha'e anhetẽ rupi jaiko ramo jajejavyague ojao'ipaa 'rã,

Senhor renonde jajererokyjea rupi vy jaa jepe 'rã mba'emo vai gui.

₇Xapy'a rei ava oikoa Senhor oguerovy'a vy

ojapo 'rã ngovaigua kuery reve voi irũ jevy aguã rami.

₈Jarekopa rei reve teko vai rupi jaiko 'rãgue py

ha'eveve mboapy'i jareko reve teko porã rupi jaiko.

₉Jaiko aguã re nhande nhanhembopy'a teĩ

jaguataa rupi nhanderereko va'e ma Senhor ae.

₁₀Huvixa ijayvu 'rã oikuaapaa rupi ae.

Ha'e ramo nemboayvu rã ejavy eme ndeayvua py.

₁₁Senhor gui ae 'rã ou ha'evea rami mba'emo japeja ha'e nha'anga aguã,

voko py ha'evea ramigua poyia oĩ va'e ma ixuguigua meme.

₁₂Huvixa kuery ojeguaru 'rã teko vai ha'e javi gui,

gueko porãa rupi ae 'rã opena oiny.

₁₃Anhetẽ rupigua ayvu huvixa oendu vy oguerovy'a 'rã,

oayvu 'rãe anhetẽ rupi ijayvu va'e.

₁₄Huvixa ipoxya nhaendu vy jaikuaa 'rã jojuka ukaxea,

teĩ ha'e ramia gui hi'arandu va'e omombytu'u kuaa 'rã.

₁₅Huvixa ovy'a ramo jaikuaa nhomoingove ju aguã.

Iporayvua ma ára pyau py arai gui okya rami.

₁₆Ouro jajoua gui ha'eveve nhane'arandurã jajou,

prata gui ha'eveve va'e ma jaiko kuaavea.

₁₇Heko porã va'e oikoa ma teko vairã katy e'ỹ 'rã oo,

oiko aguã oikuaa pota porã va'e ma ogueraa jepe 'rã guekove.

₁₈Jajejou porã reia ma opaa py nhanembojexavai 'rã,

ha'e nhandepy'a py nhanhemboyvate reia ma nhandereityarã oĩ.

₁₉Yvatekueve reve mba'emo jajoupa va'ekue nhamboja'o 'rãgue py

ha'eveve yvyĩgueve'i reve nhanhemo'yvyĩ'i.

₂₀Ombo'ea rã ojapyxaka va'e ojou 'rã mba'emo porã,

ha'e Senhor re ojerovia va'e ovy'a ete 'rã.

₂₁Okuraxõ py hi'arandu va'e pe “Oiko kuaa va'e” 'ea 'rã,

ha'e ijayvu porã kuaa va'e ma nhombo'e porã 'rã.

₂₂'Arandu ojou va'e pe ma tekove me'ẽarã oĩ,

ha'e rã hi'arandu e'ỹ va'e ma opaga 'rã nda'ijarakuaai reiague re.

₂₃Hi'arandu va'e okuraxõ py onhembo'e ranhe 'rã ijayvu kuaa aguã,

ha'e ramo onhe'ẽ rendu pavẽ 'rã.

₂₄Ayvu porã ma ei he'ẽa rami oĩ nhanekuraxõ re,

moã nhanderete moexaĩa rami guive.

₂₅Oĩ tape avakue oexa rã ha'eve rei va'e merami teĩ

opaa py ma manoa katy 'rã ogueraa.

₂₆Omba'eapo va'e ma nhembyayi gui ae 'rã omba'eapo,

okaruxea ae omokyre'ỹ.

₂₇Avakue vare'ỹ va'e onhea'ã 'rã okuapy teko vai re anho,

ha'e ijayvua ma tata mba'emo rapyarã.

₂₈Avakue heko vai va'e ojapo 'rã joguero'a rei aguã rami,

ijayvu rei va'e ma joe irũ porã va'ekue teĩ omomboi 'rã joegui.

₂₉Avakue ojerovia rei va'e oirũ kuery ombotavy vy

oguereko 'rã tape vai rupi.

₃₀Oxapymi rei va'e onhembopy'a 'rã oiny teko vai re,

ha'e gui onhembexu'u reve ojapo ete 'rã.

₃₁Omboetepy 'a xiĩa ma ijeguarã oĩ,

tape teko porã katy oo va'e rupi oje'oi va'e pegua ae.

₃₂Joe nhapu'ã rei aguã re jajerovia rei 'rãgue py ha'eveve nhandevai vyvoi e'ỹa,

tetã ha'e javi re nhandepo'aka 'rãgue py ha'eveve nhande ae jajejoko kuaa.

₃₃Xortea jaexa teĩ

Senhor gui meme ou jaikuaa aguã.