Jó 20

₂— Aikuaa va'e re xeayvuxe vy

ajapura rombovai aguã.

₃Xee aendu ndeayvu etea xemoxĩmba va'e,

xenhe'ẽ py aendu aikuaa va'e rupi rombovaixea.

₄Ndee ndereikuaai teve ha'e javi oiko ypy guive,

yvy re avakue omoingo ypya guive

₅heko vai va'e kuery xapy'a'i rive ovy'a okuapya,

ojerovia e'ỹ va'e kuery ovy'a xapy'a'i 'rãa?

₆Ha'e kuery ojejou porãa yva re peve oo,

ha'e arai re peve oakã oupi teĩ ae ma

₇hu'ũmba 'rã raka'e rã peve guarã, hepoxi rami rive.

Ha'e rã oexa va'ety kuery “Mamo tu ikuai?” he'i 'rã okuapy.

₈Ha'e kuery ma oexa ra'u pyre rami okanhymba 'rã,

ha'e rã ndojouavei 'rã.

Omonhaa 'rã imondovy pyávy mba'emo oexa pyre rami.

₉Hexaare kuery ndoexavei ma 'rã,

ikuaiague py ae teĩ ha'e kuery re na'ima'endu'aavei ma 'rã.

₁₀Ta'y kuery ju onhea'ã 'rã iporiaukue'i oguerorya rupi,

ha'e vy opo py ae ome'ẽmba ju 'rã imba'e rei-rei oipe'aa va'ekue.

₁₁Ikãgue kunumi jave rami imbaraete teĩ,

imbaraete reve 'rã itui yvy ku'i rupi.

₁₂— Ha'e kuery pe rã ijuru py mba'emo vai he'ẽ 'rã,

ha'e vy oapekũ guy py oguereko.

₁₃He'ẽ ramo nomokõxei vy

oguereko ranhe 'rã ojuru py.

₁₄Ha'e rami teĩ hyepy py ma amboae rami 'rã ojeapo.

Mboi guigua rami 'rã iro vaikue ojeapo hyepy py.

₁₅Mba'emo oguerekopa va'e omokõ va'ekue ombojevypa ju 'rã.

Nhanderuete ae 'rã ojapo guyepy gui ombojevypa aguã rami.

₁₆Mboi guigua veneno oy'u rire

inhapekũ ae ju ojuka 'rã.

₁₇Ha'e kuery ndoguerovy'ai 'rã yakã'i oexa vy,

neĩ ei ha'e kamby yakã rami oxyry va'e.

₁₈Mba'eta omba'eapoague repy ojou va'ekue omokanhymba ju 'rã

mba'eve ho'u e'ỹ re.

Ojeupe guarã ojopy va'ekue regua peteĩve henda py ndojoui 'rã ombovy'aarã,

₁₉ha'e kuery iporiaukue'i omoingo axy ha'e noipytyvõi rire,

ha'e oo ojapo va'ekue'ỹ gui mba'emo oipe'apa rire.

₂₀— Oipotapa reia gui ndojepe'ai rire

nda'evei 'rã mba'emo oipota va'ekue ogueraa jepe aguã.

₂₁Oipotapa reia gui ndopytu'ui rire

imba'e rei-rei noĩ arei 'rã.

₂₂Ojoupa ete maa py ae 'rã ojexavai.

Ha'e kuery re ou 'rã opa marãgua imomboriauarã.

₂₃Ha'e kuery rye monyẽarã Nhanderuete ombou 'rã opoxy etea.

Tembi'u 'rãgue py ha'e nunga anho ombou 'rã oky rami ha'e kuery áry.

₂₄Tembiporu ferro guigua gui ha'e kuery ojava teĩ

guyrapa overa va'e guigua py 'rã onhyvõa.

₂₅Ha'e ramo okupe gui hu'y oekyi rã

overa rei 'rã huguy re.

Ha'e ramo oendu 'rã onhemondyia.

₂₆Ha'e kuery peguarã omoĩa 'rã opa marã ojexavai aguã.

Tata omomba 'rã avave rei oipeju e'ỹ teĩ,

hoo py opyta va'ekue-'ekue omomba peve.

₂₇Yva gui oikuaa ukaa 'rã heko vaia.

Ha'e rã yvy gui ma opu'ã 'rã hovai guarã.

₂₈Ngoo py oguerekopa va'ekue oipe'apaa 'rã

Nhanderuete poxya ára py, yy onhoẽa va'e rami.

₂₉Ha'e ramigua ae 'rã avakue heko vai va'e ojopy Nhanderuete po gui.

Ha'e nunga anho ha'e kuery peguarã oĩ Nhanderuete ijayvuague rami vy — he'i.