Jó 19

₂— Raka'e peve 'rã tu pemoingo axy xenhe'ẽ,

ha'e ayvu py xemou'ũmba rive?

₃Dez-kue ma pendeayvu rei xere,

xembojexavai aguã napexĩ vy.

₄Xapy'a rei anhetẽ xee ajejavy va'e rire

xere anho 'rãgue oĩ ajejavyague re apaga aguã.

₅Xapy'a rei xerovai penhemboyvatexe,

ha'e xemo'yvyĩ'iague re pendeayvu reixe vy,

₆peikuaa porã pota aỹ pova'e re:

Nhanderuete ae xemoingo axy va'ekue okya py xejoko vy.

₇Ajapukai: “Xemomba ta!” ha'e teĩ noenduai.

“Xepytyvõ ke!” ha'e teĩ ndoikoi xemboeko porãarã.

₈Xerape ha'e ojoko rã nda'evei aave aguã.

Xee aa aguã rupi ha'e omoĩ pytũa.

₉Omboetepy aikoague gui xepe'a vy

xeakã gui omboi xembojeguaarã oĩ va'ekue.

₁₀Jova-jovaive gui xereity rire aa ma ainy.

Xegui oipe'a arõ va'ekue yvyra hi'aĩague gui oapo'o va'e rami.

₁₁Xerovai hendy ipoxya,

ngovaigua rami xerereko ramo.

₁₂Ixondaro kuery ou okuapy xere.

Xerupity aguã ha'e kuery oguereko katu guaperã,

ha'e vy xero yvýry rupi xejoko okuapy.

₁₃Xegui ha'e oipe'a xeryvy kuery mombyry.

Xekuaa va'e kuery voi ojepe'apa xegui, xerexa va'ety e'ỹ rami rive.

₁₄Xeretarã kuery xerejapa oje'oivy,

ha'e xekuaa va'e kuery hexaraipa ma xegui.

₁₅Xero py amovaẽ va'ekue ha'e xerembiguai kuery ma amboae yvy regua rami xekuaa,

ha'e kuery pe rã yvy mboae regua aiko.

₁₆Amongakuaa va'ekue ma aenoĩ teĩ naxembovaivei,

mba'emo re xee ae ajerure porã'i teĩ.

₁₇Xera'yxy ma noetũxevei ma xepytuẽa,

ha'e xeryvy kuery pe ojeguarupy aiko xereakuã vaikue va'e vy.

₁₈Kyrĩgue voi naxemovaẽxevei,

xee apu'ãxe rã xejojai rei okuapy.

₁₉Xerayvu ete va'ekue xembojeguarupa okuapy,

ha'e xee ayvu va'ekue voi xerovaigua onhemoingo.

₂₀Xepire ojapa ma xekãgue ha'e xero'o re,

ha'e haxy'i py aa jepe nho.

₂₁Xemboaxy ke, xerembiayvu kuery.

Xemboaxy, mba'eta Nhanderuete po xerupity.

₂₂Mba'e re tu xemonha rei pekuapy Nhanderuete xemonhaa rami?

Mba'e re tu ndapepytu'ui ri xero'o pemombaa gui?

₂₃Xeayvua omboparaa va'e rire!

Kuaxia re ipara oiny va'e rire!

₂₄Ferro rakua ha'e chumbo reve

ita re ipara va'e rire raka'e rã peve guarã!

₂₅— Mba'eta xee aikuaa xerepyarã oikoa,

ha'e opaa py opu'ã 'rã kova'e yvy re.

₂₆Ha'e va'e rire kova'e xepire ivaipa ma teĩ

xero'o reve ae 'rã aexa Nhanderuete.

₂₇Aexa 'rã xee ae, xerexa py ae aexa 'rã, amboae nda'ei.

Aexaxe ete rã

xekuraxõ na'imbaraetevei ma xeryepy py.

₂₈Xapy'a rei aipopeje 'rã: “Marã rami 'rã tu romoingo axy?

Ndekáuxa ae upe va'e mba'emo vai oiko”, peje teĩ

₂₉pejererokyje ikyxe gui,

mba'eta xere pendeayvua re ou 'rã ipoxya,

pendere oikuaa pota va'erã oikoa peikuaa aguã — he'i.