Deuteronômio 33

— Senhor ma Sinai yvyty katy gui ou vy

ha'e kuery pe ojekuaa Seir katy gui ko'ẽmba'i ouvya rami,

Parã yvyty guive hexakãmba ouvy.

Mbovy rei e'ỹ ojeupegua iky'a e'ỹ va'e kuery reve ou.

Oiporu kuaa regua re tata rami ojekuaa ha'e kuery pegua lei.

₃Anhetẽ ete ae ra'e reayvu heta va'e kuery.

Ndevygua kuery iky'a e'ỹ va'e ndepo py meme ikuai.

Ndepy yvy'iry ha'e kuery onhemboja okuapy vy

onhembo'e uka 'rã ndeayvua re.

₄Moisés ombopara va'ekue

Jacó guigua kuery peguarã lei.

₅Ha'e gui Senhor ae oĩ guembiayvu kuery ruvixarã,

ha'e kuery regua yvatekueve onhemboatya py,

Israel kuery regua ha'e javi reve.

₆— Rúben kuery ma tokuave, tomanomba eme.

Ha'e va'e regua avakue mbovy'i e'ỹ ta'ikuai.

₇Judá kuery renonderã ma po rami omombe'u:

— Senhor, endu ke Judá kuery ojerurea,

epena heta va'e kuery ikuaia py ju ojevy aguã rami.

Ndepo py ke ejoguero'a ha'e kuery repya rupi,

eipytyvõ hovaigua kuery rovai rupi.

₈Ha'e gui Levi kuery va'e regua pe aipoe'i:

— Xeruete, Tumim ha'e Urim rupi ejekuaa uka ke

ndevygua ava ojeroviapy va'e pe.

Ha'e va'e reko ma Massá py reikuaa porã raka'e,

ha'e Meribá yakã py ixupe ndeayvu ete.

₉Ha'e va'e ma oxy ha'e nguu pe aipoe'i va'ekue

peteĩgueve oexa e'ỹa rami,

neĩ guyvy kuery oexa e'ỹ va'ekue,

gua'y kuery re voi openaa rupi ndoikoi.

Ha'e rami 'rãgue py ojee omoĩ porã ndeayvuague,

ha'e ndereve guarã rejapo va'ekue rupi anho oiko.

₁₀Ha'e vy ne'arandua re ombo'e oikovy Jacó kuery,

Israel kuery ombo'e ndeguigua lei re.

Oapy avi heakuã porã va'e rejou porã aguã,

mymba kuery voi oapy ndevygua altar áry.

₁₁Senhor, emoingo porã ke ha'e kuery imbaraete aguã,

erovy'a avi opo py ojapo va'e.

Ha'e rã emoingo axypa ha'e kuery re ija'e e'ỹ vy opu'ã rei va'e,

raka'eve rã opu'ã ve'ỹ aguã.

₁₂Ha'e gui Benjamim kuery va'e regua pe ma aipoe'i:

— Senhor rembiayvu oĩ porã ete 'rã hexeve.

Ára nhavõ Senhor opena porã 'rã.

Ha'e ramo opytu'u 'rã ijyva áry rupi.

₁₃Ha'e gui José kuery va'e regua pe ma aipoe'i:

— Senhor tomoingo porã pendeyvy,

yva gui ho'a va'e iporãgueve py,

yxapy ha'e yy yvy guy rupi oĩ va'e py guive,

₁₄kuaray omboaju va'e iporãgueve,

ha'e jaxy nhavõ hi'a va'e py,

₁₅ha'e gui yvyty ymave guare,

ha'e yvy'ã raka'eve rã peve oĩ va'e rupi henhoĩ porãgueve va'e py,

₁₆yvy gui oiko va'e iporãgueve va'e ha'e javi py,

yvyra'a iporãgueve va'e py voi.

Ha'e nunga ha'e javi tou José kuery re,

tyvy kuery yvateve va'e rã.

₁₇Ha'e kuery ipo'aka 'rã vaka jypy guare va'e rami,

hakua ma vaka ka'aguy regua rakua rami.

Ha'e va'e py ma ipo'aka 'rã yvy regua ha'e javi re,

yvy apy peve voi.

Ha'e rami ae mbovy e'ỹ ta'ikuai Efraim

ha'e Manassés regua kuery.

₁₈Ha'e gui Zebulom kuery va'e regua pe ma aipoe'i:

— Pevy'a ke Zebulom kuery, ye'ẽ rembe rupi peoa py,

ha'e peẽ Issacar kuery voi pendekoa py peĩa rupi.

₁₉Ha'e kuery mokoĩ regua ma oenoĩ 'rã amboae regua kuery yvyty áry oupa aguã.

Ha'e py ma Nhanderuete pe ome'ẽ 'rã ha'evea ramigua.

Mba'eta ha'e kuery okaru porã 'rã ye'ẽ rupigua re,

ha'e mba'emo iporãve va'e ita ku'ia guýry oĩ va'ekue gui.

₂₀Ha'e gui Gade kuery va'e regua pe ma aipoe'i:

— Tovy'a porã Gade kuery yvyrã omboetavea rupi.

Ha'e kuery ma guary kunha rami 'rã ikuai,

jojyva ha'e nhoakã omboa'ypaa rupi.

₂₁Ha'e vy omba'erã ojopy 'rã iporãve va'e,

huvixa kuery peguarã ha'e py omoĩ porã mbyre.

Ha'e vy heta va'e kuery renonde rupi oguata vy

ojapo 'rã Senhor oipotaa ha'evea ramigua,

Israel kuery re ijayvuague rami vy.

₂₂Ha'e gui Dã kuery va'e regua pe ma aipoe'i:

— Dã kuery ma guary'i

Basã gui opo va'e rami 'rã ikuai.

₂₃Ha'e gui Naftali kuery va'e regua pe ma aipoe'i:

— Naftali kuery ma Senhor omoingo porãa rupi 'rã ovy'a okuapy.

Opa mba'e py Senhor ogueroayvu porãa rami vy

hekoa 'rã yupa rupi, kuaray puku-a katy.

₂₄Ha'e gui Aser kuery va'e regua pe ma aipoe'i:

— Aser kuery ma ta'ikuai porãve Jacó ra'y kuery ikuaia mbyte.

Tyvy kuery rembiayvuve toiko,

ha'e ipy rupi tomoakỹ azeite py.

₂₅Ha'e kuery retã rokẽ jokoa ma ferro ha'e overa va'e guigua toĩ.

Ta'ikuai porã okuave teria ja.

₂₆— Hembiayvu peiko va'e, Penderuete ramigua mboae ndoikoi.

Yva áry rupi ha'e ou 'rã penepytyvõ aguã,

yvatevea rupi ou arai áry.

₂₇Nhanderuete imarã e'ỹ va'e re ae 'rã pendekoa,

ha'e ramo ojyva áry rupi penekuavã 'rã raka'e rã peve guarã.

Penerenonde katy gui oipe'a 'rã penderovaigua kuery

“Pemomba katu”, he'i vy.

₂₈Ha'e ramo Israel kuery ikuai porã 'rã,

Jacó ramymino kuery, ygua oĩ ae'i va'e rami 'rã ikuai,

yvy mba'emo aju ha'e vinho oĩa va'e re.

Yva gui ma ho'a 'rã yxapy imoakỹarã.

₂₉Israel kuery, pevy'a ete 'rã!

Marã ramigua tu ikuai peẽ kuery ramigua?

Senhor ogueraa jepe va'e peiko.

Ha'e ma mba'emo vai jokoa oĩ penepytyvõarã,

ha'e kyxe penembopo'akaarã.

Ha'e rami rire penderovaigua kuery ma peipotaa rami meme 'rã ikuai,

ha'e rã peẽ ma pepyrõ 'rã ha'e kuery ombojeroviaaty yvy'ã re ojapo va'ekue áry.