Deuteronômio 32

₁— Yva, xeayvu rã ejapyxaka ke ndeapyxa py.

Yvy, endu ke xejuru gui ayvu oẽ va'e.

₂Xe'arandua ma opa rupi too oky otykya rami,

xeayvua tanhomoingo porã yxapy yvy omoakỹa rami,

nhuũ áry oky rayvi'i, ha'e mba'ety áry rupi otykya rami.

₃Mba'eta amombe'u porãve 'rã Senhor rery.

Amboyvate ete 'rã Nhanderuete.

₄Ha'e ma itaova! Ha'e ojapo va'e ma ha'evea ramigua meme,

oikoa ha'e javi rupi oexa uka gueko porãa.

Nhanderuete ma ojeroviapy, hexe noĩ 'rã mba'emo vai.

Heko porã va'e vy ha'evea rami joguereko.

₅Ha'e rã peẽ kuery ma hovai rupi pendekuai, ojeroviaa rupi e'ỹ.

Ha'e rami vy ta'y kuery regua e'ỹ ma peiko,

ha'e rã iove ramigua rive.

Peẽ kuery ma ha'eve e'ỹa rami pendekuai teko vai rupi.

₆Ha'e rami ete teve pemboekovia Senhor pendererekoa re,

inhakã porã e'ỹ ha'e oikuaa e'ỹ rei va'e peiko va'e?

Ha'e'ỹ nda'u Penderu ojeupe guarã pendejoguaare,

penemoingoare ha'e penemombaraetea?

₇Penema'endu'a ke ára ymave rupi oiko va'ekue re,

peikuaa pota na ma'etỹa oaxapa rei ma va'ekue rupi ikuai va'ekue re.

Peporandu ke penderu kuery pe, ha'e ramo omombe'u porãve 'rã.

Penemongeta va'ety kuery pe peporandu rã omombe'u avi 'rã.

₈Mba'eta Yvate ete va'e yvy regua ikuai aguã ome'ẽ-me'ẽ raka'e,

avakue ra'y kuery joegui omboja'o vy.

Ha'e va'e jave py oa'anga raka'e ha'e kuery rekoarã,

Israel ra'y kuery regua mbovy pa ikuaia rami vy.

₉Mba'eta Senhor pegua oĩ va'e ma ixupegua kuery,

Jacó kuery ae ikuai ixupegua regua.

₁₀Yvy ipirupa reia py ojou va'ekue ojeupe guarã,

peteĩ henda tekoa e'ỹa hi'ãgue-'ãgue nhendua py.

Ha'e vy ojoko herekovy vy opena ha'e kuery re,

opena porã imoiny guexa ra'yĩ re rami ae.

₁₁Taguato minha gua'y kuery ombo'e vy

ha'e kuery áry rupi oveve oikovy va'e rami,

opepo oipyo vy ojopy imoiny vy opepo áry ogueraa va'e rami,

₁₂ha'e rami ae Senhor nhanderereko, ha'e anho'i.

Hexeve ndoikoi amboae regua tuuete.

₁₃Ha'e vy yvyty áry rupi ojapo kavaju árygua rami oje'oi aguã rami.

Ojapo mba'ety rupi ikuai va'e gui okaru okuapy aguã rami,

ei itaova re ikuai va'e oipyte aguã, ha'e azeite itaty reia rupi ikuai va'e,

₁₄vaka kamby kekue, vexa'i kamby gui,

ha'e gui vexa ra'y kyrakue,

kavara ha'e kavara ava Basã py ikuai va'e gui,

trigo porãgueve va'e gui ae.

Ojapo uva rykue oy'u aguã rami, pytã porã va'e.

₁₅Ha'e rami teĩ hymba hembiayvu va'e ikyrapa ma vy opyvoi hexe.

Ikyrapa, tuvixapa, oguerekopa ma vy

hexaraipa Nhanderuete imoingoare gui,

ndoipotavei itaova gueraa jepeare.

₁₆Mba'eta amboae regua tuuete re rive ha'e kuery oo vy ojapo Senhor nda'evei etea oendu aguã rami,

ojeguarupy omboetea py ombopoxy.

₁₇Anha kuery pe rive ome'ẽ okuapy mba'emo, Nhanderuete pe e'ỹ.

Amboae regua tuuete ndoikuaai rei va'ety pe,

tuuete ojapoa pyau va'ekue pe,

tuu kuery omboete va'ety pe e'ỹ.

₁₈Hexaraipa okuapy itaova ha'e kuery re ta'y va'e gui,

nguuete imoingoare gui ae hexarai.

₁₉Ha'e nunga Senhor oexa vy nopenavei,

ta'y kuery ha'e tajy kuery ombopoxy rire.

₂₀Ha'e vy aipoe'i: “Ha'e kuery pe ndajexa ukavei 'rã.

Aexa 'rã opaa py ha'e kuery re oiko va'e.

Mba'eta ha'e kuery ma teko vai rupi ikuai va'erã ae,

ta'y kuery ojeroviapy e'ỹ.

₂₁Ha'e rami vy nguuete pe rai'i ra'aga e'ỹ ikuai vy xeapo nda'evei etea aendu aguã rami,

mba'emo ra'angaa pe rive ikuai vy xembopoxy.

Ha'e nunga rupi xee ju ajapo 'rã ha'e kuery nda'evei etea oendu aguã rami peteĩ regua e'ỹ ikuai va'e arua py,

inhakã porã e'ỹ va'e regua arekoa py xee ajapo 'rã ha'e kuery ivai aguã rami.

₂₂Mba'eta xepoxya rupi amoendy 'rã tata

manoa guyve katy peve hendy va'erã.

Ha'e va'e omomba 'rã yvy ha'e mba'ety ikuai va'e,

yvyty guy rupi peve 'rã amoendy.

₂₃Ha'e kuery rovai heta 'rã ambou mba'emo vai.

Xeru'y amombo 'rã ha'e kuery re.

₂₄Ha'e ramo okanhymba 'rã karuai gui,

omano 'rã pire raku ha'e mba'eaxy vaikue gui.

Ha'e kuery rovai ambou 'rã mymba haĩmba rei va'e,

ha'e mboi vaikue yvy ku'i rupi onhembotyryry va'e.

₂₅Oka rupi omanomba 'rã kyxe gui,

ha'e rã ngopy rupi ma ho'apa 'rã nhemondyi gui,

kunumigue ha'e kunhataĩgue,

kyrĩgue'i okambu'i ha'e tujakue hi'a xiĩmba'i va'e voi.

₂₆Xee aipoa'e 'rãgue opa rupi romoaĩmba aguã rami,

ajapo 'rãgue pendere avave ima'endu'aa ve'ỹ aguã rami,

₂₇va'eri xee ndaipotai penderovaigua kuery ovy'a rei,

penderovaigua kuery ojekore vy

aipoe'i e'ỹ aguã: ‘Nhandepo py ae jaity,

Senhor e'ỹ rima ha'e nunga ha'e javi ombou va'ekue’, he'i okuapy e'ỹ aguã.

₂₈Mba'eta xevygua kuery ma imongetaarã va'e'ỹ merami ikuai,

ha'e kuery re noĩ 'arandu.

₂₉Ha'e kuery ma hi'arandu va'e tamo ra'e ikuai!

Ha'e rami va'e rire ma oikuaa 'rãgue ha'e nunga,

oikuaa pota 'rãgue opa taa re.

₃₀Mba'exa vy tu peteĩ'i va'eri ha'e kuery va'e regua mil omondyi,

e'ỹ vy mokoĩ'i va'e dez mil omondyi.

Ha'e kuery repyarã itaova oĩ va'ekue oeja ramo ae oiko ha'e rami,

ha'e jopo py Senhor omboaxa ramo.

₃₁Mba'eta hovaigua kuery pegua itaova ma nhande'itaova rami e'ỹ,

nhanderovaigua eteve voi oikuaa.

₃₂Mba'eta ha'e kuery uvaty ma Sodoma py ikuai va'e ramigua,

ha'e imba'ety ma Gomorra regua.

Ha'e kuery uva ma veneno rami jojukaarã,

ha'e ijaju va'e voi iro va'e meme.

₃₃Ha'e kuery uva rykue ma onhembotyryry va'e veneno rami iro va'e,

mboi guigua rami ete nda'evei va'e.

₃₄Ha'e rami aguã ma xejee e'ỹ ri ty'y amoĩ imoiny,

mba'emo moĩ porãaty py rami?

₃₅Mba'eta anhombopaga aguã rami aiko mba'emokue amboekovia vy,

ha'evea ára py ha'e kuery onhepyxanga jave.

Mba'eta ovaẽ rai'i ma ha'e kuery ojexavai aguã ára,

ha'e kuery renonderã ou pojava.”

₃₆Mba'eta Senhor oikuaa pota 'rã ojeupegua kuery re,

ha'e vy omboaxy 'rã guembiguai kuery,

ha'e kuery mbaraeteague opa ma ovya ha'e oexa vy,

mba'eta ha'e kuery va'e regua nonhenduvei 'rã, escravo ha'e escravo e'ỹ va'e ma voi.

₃₇Ha'e ramo aipoe'i 'rã: “Mamo tu ikuai tuuete ramigua pemboete va'ekue,

ha'e itaova re pejeroviaa va'ekue?

₃₈Ha'e va'e tuuete kuery nda'u ho'u 'rã mba'emo kyra peme'ẽ va'e,

ha'e oy'u 'rã vinho peme'ẽ va'e?

Ha'e kuery ae ha'vy topu'ãmba penepytyvõ aguã,

peẽ kuery penhemi atyrã ojeapo vy!

₃₉Pexa ke aỹ, xee ae, xee anho'i aiko.

Amboae regua tuuete ndoikoi, xee e'ỹ vy.

Xee ma ajojuka ha'e anhomoingove 'rã.

Xee anhomoingo axy ha'e anhomonguera ju 'rã.

Ndoikoi guive xepo py ho'a va'ekue reraa jepearã.

₄₀Yvate katy xepo aupi reve

xee ae rekove opa va'erã e'ỹ rupi aura vy aipoa'e:

₄₁Xekyxe hendy rei va'e aĩmbe'e,

ha'e xepo'akaa rupi aikuaa pota vy

ambopaga 'rã xerovaigua kuery,

amboekovia 'rã xere nda'ija'ei va'e kuery ojapoague.

₄₂Ajapo 'rã xeru'y tuguy omoẽ aguã rami,

(xekyxe voi omomba 'rã ho'o,)

omanogue ha'e ombo'a pyre kuery ruguy,

penderovaigua kuery akã hi'a vuku va'e regua voi”, he'i.

₄₃Amboae regua kuery, perovy'a ke ixupegua kuery,

mba'eta Senhor nhombopaga 'rã guembiguai kuery ruguy omoẽa ague re,

ombopaga 'rã hovaigua kuery,

ha'e vy oiky'a'o ju 'rã ojeupegua kuery yvy.