Rromanodeniza 6

₁Arri uima imittarrarope madirra uimasiri denima inanemaneraha Deocca touati uanehena madirraza denima dacorarraro. Nazama iape nerrecoma inaniuarrine? Deocca touati uanehetoui inezape uimasiri inananiuarrinequi? ₂Poni! Uimasiri inana-rrerana! Pina arra madirra zoqqueza uimasiri ssamo tarrarissa inarraro. Nema inezape uimasiri inana-zanaponiuarrinequi? Nouerani. ₃Passo dopaniza niquinarracca uimape nauatoqquiri tiquenerrerarraroqui? Passo dopaniza niquinarra icarrizape Zeso Cristo pouaza irrariqquirraro. Pina poua tezerre ecotarrarossa narraro. ₄Passo dopaniza ia niqui izanemanezape pina Cristo tezerre ia ppa izemanarrarossa narraro. Arra Cristo ppa izemanaraha Abi Deo pocca deni torrehe bicabotema Cristo inauatonirrari. Ia naqui Cristo poua tezerre ecoteraha poua tezerre inauatonirrarossa narraro. Narraroa arri madie zati icarrirraroparri.

₅Cristoza irrariqquirrarope pina poua uatiarrarissa inarraro. Cristo nauatoniza naco pina poua tezerre inauatonirrarossa inarraro. ₆Arrirraro uima nauatoqquiri inarraro: Icca madie rradani naqui pina Cristo aua porimacossaniza uatiarrarissa narraro. Narraro rriquezape ia touini inanicca uaidirehe naqui rricarraro. Iaza arrimani torrezape pina ia zossedessa napoma-rrerani. Nema nezape uimasiriza imadizanapo-rreranitoui. ₇Pina madirra zoqqueza uimasiri denima inananiuarrine ssamo tarrarissa inarraro. ₈Cristo poua tezerre ecotarrarope parrissa poua tezerre imadinitoui, inarraro. ₉Iape nauatoqquiri inani: Cristo uatiaraha nauatonirraripa uatiapoma-rrarauitoui, inarraro. Ehetia narrarocca uimape dacoreraha Cristozape dacora-rrerani. ₁₀Cristopa zoqqueui orrari naraha narraroza uimasiricca dacorehe pouaza rricanissa tani. Nazapa camittemaniza Deocca deni torrehe auato taniuarrine madirrari. ₁₁Nazama iape ibodiza arrima inana: Pina ecotarrarossa nazana uimasiricca dacorehe iaza rricani. Rridapanape Zeso Cristoza irrariqquizape Deo Poua toui nauiccara inananiuarrinena imadirraro.

₁₂Arri uimasiripe tessiredeni zoqqueqque taniccaza zossede dacorarraro. Uaidirehe tinanemananiuarrine tiadeni zosse zosse narrarossa narraro. Narraroza poni tiquenarri, timedeniza touini tiquenanicca tinanemana-rreraniuarrine. ₁₃Tessiredeni uima uaidira taniccaza teccoremana terrerarri. Tessiredeni Deozara teccoremanarri. Tiadenipe pina madirra zoqqueraha nauatoniza madirrarissa tiquenarraro. Nezape tessiredeni uima bicanizana teccoremanarri. ₁₄Nema tiquenezape uimasiri tiadeniza dacora-rreranitoui. Rridapanape Moizecca marinarraza timadimana-rrerani. Deocca touati uanehezana timadimanarraro.

₁₅Rridapanape Moizecca marinarraza imadi-rrerani. Deocca touati uanehezana imadirraro. Nema ineraha uimasiri inanani bica taqui? Bica terrerani. Poni! Nema inerrerana. ₁₆Tiadenipe nauatoqquiri tiquenarraro. Madirracca zozosse tabaqqui tiquerrenezape pina tiadeni zossede attissa tinanemananiuarrine pouaza tiadeni teccoremanarraro. Tiadeni zossede attiza iboraqquiri tiquenezape pocca zozosse tiquerrenarraro. Narraro uimassa narraroa uaidirehe tinanemananiuarrine iboraqquiri tiquenezape pina uimasiricca zozosse tiquerrenarrarossa narraro. Nema tiquenezape parri tirricarinitoui. Naraha Deozara iboraqquiri tiquenezape Pouaza uima bicani tinanemana-zanaponitoui. ₁₇Uima bicani ticatterrizemanezape Deoza ouatizeza: —Rrehe Abi Deo, tirrine bica tani −onarraro. Taidepe pina uimasiricca zozosse tabaqquissa tiquenaporaha rridapanape Zeso Cristo tauimari tiadeni mari tocanabaqqui-manazana ticcadeni uatizehema iboraqquiri tiquenarraro. ₁₈Nezape uimasiricca zozosse tabaqquissa tiquenerreraniuarrine Deo tiadeni todinibaqquizapa uima bicanizara tizepedeni irrimanarraro. ₁₉Arri uati uati onarrarope timittemananiuarrine narro tani oneza arrirraro namicca uima tazarrani tiadeni mari ocanabaqquirraro. Taidepe tessiredeni uananeheza teccoremanaporraro. Uima onihi uaidira tarraroza naqui tessiredeni teccoremanezape pina uimasiricca zozosse tabaqquissa tiquenapode. Naraha rridapanape Zeso Cristorrine ticcadeni uima cacarriqquimerani. Tessiredeni uima bicanizara teccoremanarri. Nani bicaqquiri tiqueneza Deotouira timadimana-zanapozape pocca zossenirrizara iboraqquiri tiquenaniuarrine.

₂₀Pina uimasiricca zozosse tabaqquissa tiquenapozape uima bicaniza tizepedeni irrimana-rreraccade. ₂₁Naraha uimasiri tinanemanezape nerrecora bica tanicca titicarrimana narrarotte? Nouerani. Rridapanepe arri uimasiri tinanemanaporrarozape ticappinemanani. Narraro uimasirizape zoqquehe rriquerreranicca narrizoueza timadimana-zanaponitouiraha. ₂₂Rridapanape pina uimasiricca zozosse tabaqquissa tiquenerrerani. Deozara tizepedeni irrimanani. Narraro uimana deni torranicca ticarrimanarraro. Rrehe, Deozara tizepedeni irrimana-zanapozape bicaqquiri tiquenaza Pouatouira timadimana-zanaponiuarrine. Nani camittehe rriquerreranicca naqui ticarrimana-zanaponiuarrine. ₂₃Icca uimasiri manaconipe zoqquehe rriquerreranicca. Naraha Deocca danirripe camittehe rriquerreranicca. Ia Zozossede Zeso Cristoza iquerrenezape Deocca danirri icarrini.