Rromanodeniza 5

₁Ia Zozossede Zeso Cristo itoui zoqquerraricca uimaza parrissa inezape Deopa: —Tiadeniza uima nouerani −narrari. Narraroa arri Deo tezerre icarronerarraroparri. ₂Cristoza parrissa inezape pouarrine Deo ia catize taui. Narraroa arri Deo Pouaza dameraqquiri inarraroparri. Niza Deo zamariuarripe pocca deni torrehe iaza torranitoui ineza ehetize narraro. ₃Naraha itezerremacca uima bicanizaha etizeni orrari-rrerani. Arri ocasserani erraroza naqui etizeniuarrine. Arrirraro uima nauatoto inani: Ocasserani errarope denima idacocorani naniuarrine, ocasserehe tonauanade iattaniuarrine. ₄Idacocorani nezape Deopa: —Tirrinedeni bica tani −narrari. Nezape irrine Deoza bica tani nauatoto inezape itezerremacca uima bicani iaza torraniuarrine naqui ibodiza auato tarraroparri. ₅Arri itezerremacca uima bicani touini imadirrarope maizehe torra-rreranitoui. Deo Poua Corime iaza da inarraripa ibodiza pocca touati uanehe inananissa tarraro.

₆Iape irrine icassiuaueraniuarrine iparrire-rrerezape touati nauanaqquiri inapode. Naraha Deo uima inanarroraporrarocca uada bacco taza Cristo zoqquerraripa madirra uimasiri sseqquiri narraridenicca uimasiri manaconi zoqquerrari. ₇Madirrapa poua tesseza uima oppina tehe torraza pouaza: —Zoqquena −quenaza poua tesse tossiuauauiuarrine: —Ouara ozoqquena −nauiuarrinepa cappina taui. Poua ccaccorarra, poua ccaccora-rrararra nauitide. Naraha poua tesse madieri bica taraha pouaza: —Zoqquena −quenazapa narrari tossiuauauiuarrine madirra orrari orrari naha poua ccaccora taui. ₈Naraha Deo iaza uati cauanari canaui nauatoqquiri inaniuarrinepe uimasiri sseqquiri ineraha Cristopa itoui poua ccaccorarrari. ₉Icca uimasiri manaconi Cristo emene toccarrarorrinena Deo iaza: —Rridapanape ticcadeni uima ouaza tobicani −narrari. Niza pocca narrizouecca uada bacco tezape uima bicani denima icarrinitoui. Pocca narrizoue iaza ssonari-rreranitoui. ₁₀Taide uimasiri icarrie imadipozape Deo tezerre icauadirehe imadipoccade. Nema inaza imadiporaha Deo Poua Bedi icca uimasiri manaconi zoqquezana Deo Poua tezerre icarronerarraroparri. Rridapanapa Cristo nauatonia camitta taha madizapa ia tonassiuauabaqquiuitoui, inarraro. ₁₁Narraro uima bicania iaza orrari-rrerani. Deoza naqui uatizehe imeni icarrini. Ia Zozossede Zeso Cristorrinena Deo tezerre icarronerarraro.

₁₂Zama nauatoponipe Adaoa madiporrari. Adao pouana iboueza uimasiri inanaporraro. Adaopa orrari naha madiporaha pouarrine madirra bazimaza uimasiri touapi rizerre narronaponi narraroparri. Narraria arra madirra uapima uimasirima madi-rronemanazapa rradaui tocarremanaza uatiemanarra narronapoui narrariparra. ₁₃Uimasiripe Moizecca marinarra noueraccazama taide madirra uimasiri inanarizemanaporraro. Arri Moizecca marinarra noueraccazape madirraza: —Uimasiri ticarrini −quenauiuarrine noueraccani. ₁₄Naraha nema nehe Adao madipozama uimasiri inanemanarrarodenipa zoqquehe inauanarronemanarraroa arri Moizecca marinarraza bacco toquenarrariparra. Adao natti madimanarraridenirrinepe pina Adaorrine uimasiri torrarrarossa nerreraraha nama naha uimasiri carrimanarrari.

Adaopa madirra ouaha zotode ccarronauiuarrine tauimari auato inanaporrari. Narraripa Deocca danirri Zeso Cristoparra. ₁₅Naraha Adaocca danirripe pina Deocca danirrissa nerrerani. Adaopa orrariraha pocca uimasirirrine arri bazima ehetia narraroparri. Deopa madirraza uati cauanari canaza manaconi rrirehe icca uima tobicaniuarrine pocca erredeni Zeso Cristo da inarrari. Pouapa orrariraha pouarrine camittehe icarrirraro. ₁₆Deocca danirripe pina madirra orrariacca uimasirissa nerrerani. Adaocca uimasiri orrari napozape Deo madirra uapimaza: —Uimasiri ticarririzemanani. Nanarrizo tiquerrenanitoui −narrari. Madirrapa uimasiri sseqquiri naraha Deocca danirri-rrinena bazimacca uimasiri rricarizarraro. Nazapa Deo madirraza: —Tiadeniza uima nouerani −narrari. ₁₇Madirra orrariacca uimasirirrinea ehetia narraroparri. Zoqquehepe arrirraro zama nemaneheza dacorarraro. Bazimaza deni torrarraro, pina tamine deni torrarrarissa narraro. Narraro uimassa naraha uima denima bica tarrarope madirra orraria Zeso Cristona pocca madirraza camittehe zati da inarraro. Nazapa pouadenina zoqqueheza deni toquerrenarrari. Nama quenauiuarrinepa Deo pouadenitoui uati cauanari canaza poccadeni uima manaconi rrirehe inaparrirenissa tarraro.

₁₈Adaocca uimasirirrine madirra uapimaza narrizoue torrarraro. Narrarossa narraro Zeso Cristocca uima bicanirrine madirra narrizoueza zori tocanirerrari. ₁₉Madirra orraria Deoza ibo tazapa madirra bazimaza uimasiri torrarizarraro. Naraha madirra orraria Deoza ibora tazapa pouaza parrissa quenarraridenicca uimasiri Deorrine rricarizarraro. Pouadeniza Deo Attia: —Rridapanape ouaza bicaqquiri tiquenani −narrari.

₂₀Deo pocca zossenirri Moizeza da inarrarope madirracca uimasiri pouadeniza denima auato taniuarrine. Nezape uimasiri denima inanemaneraha Deocca touati uanehena deni torrarraro. Deopa madirraza uati cauanari cazanaporrari. ₂₁Uimasiri dacorarrarorrinea arri ehetia narraroparri. Naraha Deocca touati uanehe denima dacoratezape Deo poua icazosseza ia Zozossede Zeso Cristorrine icca uimasiri rricarraro. Nezape icca uima Deoza tobicarraro. Ia Zozossede Zeso Cristorrine camittehe rriquerreranicca icarrizanaponitoui, inarraro.