1—Nazama zodeo iquerrenarrarope uima nerrecoma narrarona iaza denima bica tarraro? Iape ponima zodeo madirra iquerrenaqui? −tiquenanitiderra. —Zopori cotani eteroni uissinarracca uima icarrizape Deorrine iazana denima uima bica tanicca icarriqui? −tiquenanitiderra. 2Rrehe, uima bicanipe ia zodeodenizana onihi, onihi nehe Deorrine icarriporraro. Uima bicani deni torraniccape Deorrine icca madirrazana Poua Atti torraporraro. Narraroa arri Poua Atti cacauade iquerrenarraroparri. 3Naraha icca madirra motana Deo Atti ecauemana-rrerarraro. Nama quenaraha Deopa ia zodeodeniza Poua Attissa inana-rrerapazerre? 4Noueraui. Deopa maizera tarrari. Madirra bazimapa maizaqquiri naraha Deopa maiza-rraraui. Uima parrissehera ihinana narraro. Deo Atti dozo nanizape arrima narraro:
—Bazimaza auato tanitoui. Tiape parrissehe ponira uati uati tinarraro.
Madirra attideni Tiaza: “Ticca uima parrirenissa terrerani” quenaraha Tiana deni tirranitoui. Tettina parrirenissa tarraro
−nani nade Deo Atti dozo naniza.
5Madirra attidenipa arrama quenauitide: —Icca uimasirirrine Deocca uima parrirenissa tani auato tarraro. Irrine uima nema nezape nerrecotoui Deo ia tonarrizo-baqquirrari? –quenarrari. 6Naraha iape nema inerrerana. Oppina tani. Deopa uaidira tarraraui. Deopa bica taui. Rridacca Deocca uima parrirenissa terrerezape madirra bazimacca uima cattemade parrire-rraranarra. 7Madirra ouaha attidenipa: —Maizehe uati onezape narraroza Deocca parrissehe denima auato tani. Irrine Deocca parrissehe auato tezape madirrapa: “Rrehe, Deopa bica taui” quenauitoui. Icca maizehe nema nezape nerrecotoui Deo iaza: “Ticcadeni uimasirirrine narrizoueza tiquerrenarri” narrari? −quenarrari. 8Attideni nama quenarraripa poccadeni marinarra onihi inanemanarraro. Pina: —Uimasiri inanezape uima bicani auato tanitoui −quenarrarissa narraro. Madirra mota attidenipa: —Paorodenina narraro uima mari mari ihicanabaqqui narrari −quenarrari. Naraha maizemanarrari. Niza zama rriqueza madirra nama quenarraridenipa narrizoueza toquerrenazapa bica tani, onarraro.
Ia bazimape uimasiri inanarraro
9Naraha zodeo iana denima bicaqquiri inarraroqui? Nouerani. Madirra ouahapa poccadeni biquehe arrimaniqui? Noueraui. Ia bazimape uimasiri icarririzani. Tiadenipe uima dozo onaporraroza timittemanaponi. Arra zodeodeni, zodeo querrena-rrararrarideni ia bazima uimasiri inananiuarrinepe uimasiri iaza dacorani. 10Deo Atti dozo nanizape:
—Madirra uima bicani tonanauiuarrine noueraui.
Deo qqui inabaqquizapa orraria uimasiri cappiraui noueraui.
11Madirra bodi nauato tarrari noueraui.
Madirra Deotoui narrari naco noueraui.
12Bazima Deoza touarrimanarrari.
Pouama rrarrauiriza narrari.
Madirra orraria uima inanabicaniuarrine noueraui.
13Madirra attideni oppina tezape ssiporideni pina tonoccobiri touabarrarossa narraro.
Pouadeni ebenoza naco madirra icamaizabaqqui-manarrari.
Ipodeniza madirra inauaidiremanarrari pina macca comabote madirra cca izaza comene auarrarissa quenarrari.
14Pouadeni arraricca touatti bida tarraro qqueqquena narraro.
Madirra ihitamassomana narrari.
15Amorideni uassiqquiri narrari, touemene toccaniuarrine toui quenarrari.
Madirra irrinedeni auemanauiuarrine narroremanaha madimanarrari.
16Arrana, pouadenipa madirra ouahacca madie tonauaidire-manarrari.
Pouadenirrine madirra ocasserani ahauemana narrari.
17Rroneheza madimanauiuarrine ssamoqquiri narrari.
18Deo noppine cappinaqquiri nazapa bica taraha pouadenipa Deoza cappineraqquiri narrari. Bodideni uatouissa tarraraui
−naponi nade Deo Atti dozo naniza.
19Nauatoqquiri inani: Deopa pocca zossenirri bazimape zodeodenizana da inarraro. Naraha pocca zossenirri nemanehe ecauemananissa taniuarrine parriremana-rraraui. Uima nema nezape: —Bicaqquiri inani −quenauiuarrine ssamo tani. Niza Deopa arrirraro zamacca madirra bazimacca uima cattemade torrazapa Moizecca marinarraza uimarideni icattemanitoui. Nezape madirra ia bazimape icadidire nanitoui. 20Madirra attidenipa: —Iape Moizecca marinarra ecauanissa tani −quenaraha Deo Attipa: —Rrehe, uima ticappiremanani −narrarauitoui. Moizecca marinarrarrinepe uimasiri nauato inarraro. Narraro cacauade iparrire-rrerezape ia bazima uimasiri icarrini auato tarraro.
Icassiueueraniuarrinepe Zeso Cristoza parrissa inarraro
21Naraha rridapanape Deo iaza uima onihi auato inanarraro: Moizecca marinarra rrirehe icca uima Deo Pouaza tobicaniuarrine parrireni. Narraro uimape Moizecca marinarra nemaneheza nema naporraro. Deo Atti cacomeraqquiri narrari ouahadeni naco uati toquenaporrariparra. 22Madirra Zeso Cristoza parrissa quenarrarideni uapimazana Deo arrama narrari: —Ouaza bicaqquiri tiquenani −narrari. Deozapa zodeodeni, zodeo querrena-rrararraridenicca uimape narrarossa caniqquimerarraro. 23Madirra bazimape uimasiri icarririzerre narraro. Deocca deni torreheza iquerrenaniuarrine iparrirenissa terrerarraroparri. 24Arri icca uimasiri manaconi narrizoue icarrinitouiraha Zeso Cristo pouarrinena Deo ia tappa tabaqquirrari. Deo iaza uati uana taza manaconi rrirehe iaza: —Tiadenizape uima nouerani. Ouaza bicaqquiri tiquenani −narrari. 25Deopa Poua Bedi Zeso Cristo zoqqueuiuarrine eccorazapa madirra bazimaza nohue inarraro: Pouapa uimasiriza boque tarrari. Aua porimacossaniza Zeso emene toccarrarope icca uimasiri manaconi da inarrari. Itoui Zeso zoqquerrari tauimariza parrissa inezape Deo iaza: —Rridapanape ticcadeni uimasiriza ouati rrimani −narrari. Deopa nama narraria iaza nohue inarraro: Pouarrine parrirenissa tani. Arra taide Zeso Cristo zoqque-rraraccazama Deopa madirracca uimasiri qqui taraha pina qqui toraui narrari. 26Pouapa nama narraria —Amazati onarrizobaqquina −narrararrari. Mouaraza poccadeni uimasiri inauanarronarraro. Rridapanape uima pamehe Deo Pouarrine iaza auato tarraro: Rridapanape Deo Pouarrine parrirenissa tarraro. Zeso Cristoza parrissa quenarrarideniza: —Tiadenizape uima nouerani −naza naco Pouarrine parrirenissa tarraro.
27Madirra Moizecca marinarra ecauemananissa tezape attidenipa: —Orrine uima parrirenissa tani −quena taui Deoza. Naraha attideni ponima torrarraro. Uima nerrecoma narrarorrine attideni ponima totorra narraro? Madirracca uima Deoza tobicaniuarrinepe madirrarrine rrerani. Zeso Cristoza parrissa nazana pocca uima Deoza totobica narraro. 28Narrarorrine ettipe: Madirracca uima Moizecca marinarra rrirehe Deoza tobicani parrireni, inarraro. Zeso Cristo tauimariza parrissa inezape Deo Atti iaza: —Rridapanape ticcadeni uimasiri manaconi tiadeniza nouerani −nauitoui, inarraro.
29Deopa zodeodeni pouadeni mottacca orrarirrarico? Zama onihicca madirradenicca Deo rraraco? Naraha uimape auato tani. Deopa zama bazimacca Deo. 30Deopa orrariui. Madirra zodeodeni zopori cotani eteroni uissinarra carrimanarrari Zeso Cristoza: —Parrissa, oua Tonassiuauade −quenazapa Deo pouadeniza: —Rridapanape ticcadeni uima tiadeniza nouerani −nauitoui. Zodeo querrena-rrararrarideni Zeso Cristoza parrissa quenaza naco Deopa pouadeniza uima narrarossa inananitoui. 31Nazama Zeso Cristoza parrissa inezape Moizecca marinarrape ponima torraniuarrinequi? Ponima torra-rrerani. Zeso Cristoza parrissa inezape Moizecca marinarra inaparrirenissa tarraro.
