Rromanodeniza 2

₁Uimasiripe arrima nani oneza tiadeniza dozo onarraro, nani nauatoqquiri tiquenaniuarrine. Madirra ouahaza: —Ticcadeni uima uaidira tani −tiquenezape tirrinedeni ticcadeni uimasiri auato tanitoui. Nerrecotoui madirra ouahacca uimara uati uati titiquena narraro? Narraro uimassa tinanemanarrarorrine Deocca narrizoue tiadeniza ssonarinitoui. ₂Madirra uima inanemanezape Deo Attipa: —Tirrinedeni uima uaidira tani −narrari. Nazapa pouadeni inarrizobaqquiuitoui. Iape nauatoqquiri inani: Deopa poccadeni uima nauato tarraria parrissehera uati tarrari. ₃Naraha ticcadeni uimape nerrecoma nerrecoma narraro? Tiadenipe: —Madirra ouahacca uima bica terrerani, Deo inarrizouitoui −tiqueneraha tiadeni naqui pina pocca uimassa tinanemanezape Deocca narrizoue zori ticanirepazerre? Zori ticanire-rreranitoui. ₄Deopa tiadeniza uati uana tarrari. Biquehe uapi tanicca tiadeniza inanarizarraro. Deo Pouaza parrissa tiquenaniuarrine tinarromaneza naqui titouideni denima madiccarrari. Naraha narraro uima bazimape tiadeniza pina ponimassa narraro. Arri Deorrine pocca biquehe tiadeniza torrarrarope tibodideni cacarriqquimeraniuarrine. ₅Naraha tiadenipe Deoza iboqquiri tiquenarraro. Tibodideni cacarriqquimeraniuarrine nacasseraqquiri tiquenezape ticcadeni uimasiri manaconi narrizoue onihi onihi nehe tinauanemanarraro. Niza zotode Deocca uadie torraniuarrinecca uada bacco tezape tiadeniza narrizoue ssonarinitoui. Deo Poua tezerrema tidomo ueza Deo ticcadeni uima manaconi inaparrirenissa tani auato inananitoui. ₆Niza Deopa bazimaza poccadeni uima manaconi pouadeniza da inanitoui. ₇Madirra uima bicani inanemanarrarodenizapa Deo pocca camittehe rriquerreranicca da inarizanitoui. Pouadenipa Deocca deni torrehetoui madimanarrari. Pouadeniza Deoa: —Occa erredenideni, bicaqquiri tiquenani −nauiuarrine touini quenarrari. Camittehe rriquerreranicca touini naco madimanarrari. ₈Naraha madirrapa poccadeni uima touinira dameraqquiri narraridenizana Deocca uadie ssonarinitoui. Narraridenipa Deocca uima parrisseheccaza iboqquiri narrari. Uaidirehena pouadeniza bica tarraro. ₉Uaidirehe inanemanarraro bazimapa narrizoue tonauanemanauitoui, ocasserehe tonauanemanauitoui. Zodeodeniza, zodeo querrena-rrararrarideniza naqui ssonarinitoui. ₁₀Naraha uima bicanira inanemanarrarodeni bazimazana Deo pocca deni torrehe inananitoui. Pouadeniza: —Occa erredenideni, bicaqquiri tiquenani −nauitoui. Pocca rronehe naqui pouadeniza torranitoui. Zodeodeniza, zodeo querrena-rrararrarideniza naco nama nauitoui. ₁₁Deo Pouaza zodeodenicca uima, zodeo querrena-rrararraridenicca uima tazarranipe narrarossa caniqquimerarraro. Zodeodenizara denima uati uana taui orrari narraraui.

₁₂Niza zama rricaniuarrinecca uadazana Deopa madirra bazimacca uima icattemanitoui. Deocca zossenirri Moizeza da inarraro cappiremanaha madimanarraridenicca uimape Moizecca marinarraza icattema-rreranitoui. Naraha uimasiri inanemanarrarorrine parra zoqquemanariuiuarri narrizoue tonauanemana-zanapouitoui. Moizecca marinarra carrimanarraridenipa narraro marinarraza uimarideni icattemanitoui. ₁₃Arra madirra Moizecca marinarra mittemanaraha pina narrarossa inanemana-rrerezape Deoza tobiquemana-rrararrari. Deopa pouadeniza: —Uimasiri ticarrimanani −narrari. Naraha Moizecca marinarra mittemanarrarideni pina narraro marinarrassa inanemanezape Deoza tobiquemanarrari. Deopa pouadeniza: —Uimasiri ticappiremanani −narrari. ₁₄Naraha zodeo querrena-rrararraridenipa Moizecca marinarra cappiremanaraha pina narrarossa inanemanezape pouadeniza arrirraro uima auato tarraro: Deorrine bodideni nauatoqquiri narrari. Pouadenipa bodideni uatomanauissa tazapa uima bicani nauatoqquiri nauiuarrine. ₁₅Nezape poccadeni madieza uima auato tarrarope pouadeni bodiza Deocca zossenirri carrimanarrari. Bodideni uatomazapa uima bica tanicca nauatoqquiri, uima uaidira tanicca nauatoqquiri narrari. ₁₆Niza Deo madirradenicca uima nattome inabaqquiuiuarrinecca uada bacco tazana Zeso Cristo izosseuitoui. Nazana madirra bodideniza uima ecomemanarraro Zeso auato inananitoui. Narraro uima torraniuarrinepe Zeso Cristo tauimari icassiuaueraniuarrinecca mari mari ohonanarraroza uati uati onapode.

₁₇Zodeodeni mota tettidenipe: —Iape zodeo iquerrenani. Deocca zossenirri Moizeza da inarrarope icarrini. Icca Deona deni torrarrari. Pouana ia tocatterrizabaqquirrari −titiquena narraro. ₁₈Tettidenipe: —Iape Deo Poua nacassa tauicca nauatoqquiri inarraro. Moizecca marinarrarrine uima bicani icatterrizaniuarrine naqui icauatterani −titiquena narraro. ₁₉Tettideni naqui: —Iape Deo Atticca ssiuarrani carrimanauiuarrine inauattabaqquiuiuarrine iparrireni. Pina noccodeni siri rrauinedeni zopi icanabaqquirrarissa, pina ziziniza rrauirizarrarideni piri icanabaqquirrarissa inarraro −titiquena narraro. ₂₀Tettideni naqui: —Moizecca marinarra icarrizape nauatoqquiri inani. Parrissehecca uima iaza auato tani. Madirra ssamoqquiri narrari pina erredenissa quenarrarideni inauattabaqquiuiuarrine nauatoqquiri inani −titiquena narraro. ₂₁Tiadenipe Moizecca marinarra ticarrimaneraha nerrecotoui narraro marinarrassa nehe tinanemana-rrerarraro? Tiadenipe madirra ouaha mari mari titicanabaqquimana naraha tiadenipe tiadeni mari ticananimanehe nerrerani. Tettidenipe madirra ouahadenizara: —Tibotimana tiquenerrerarri tiquenerrerarri −titiquena naraha tiadeni naqui botiraqquiri tiquenaqui? Botiqquiri tiquenani. ₂₂Tettideni onihi naqui: —Amonerre onihi tinarremana terrerarri −titiquena naraha tiadeni naqui amonerre onihi arrarrera tinaqui? Amonerre onihi arrarra tinani. Siba nauatoniza naqui nacasseraqquiri tiquenarraro. Naraha tiadenipe arra siba nauatoniza dada tauicca titibotimana naui. ₂₃Tettideni onihi naqui: —Moizecca marinarra bicabote icarrini −titiquena naraha Moizecca marinarra tecauemananissa terrerezape tirrinedeni madirra ouaha attidenipa: —Deocca uimape bica terrerani −quequenanarrari. ₂₄Narraro uimape Deo Atti dozo naniza arrima naporraro: —Tirrinedeni zodeo querrena-rrararraridenipa Deoza attideni ocassera taza atti atti quenarrari −nani nade Deo Atti dozo naniza.

₂₅Zodeo tiquerrenezape zopori cotani eteroni uissinarra ticarrimanarraro. Moizecca marinarra tecauemananissa tezape Deopa tiadeniza uima bicani inananitoui. Naraha Moizecca marinarra tecauemananissa terrerezape ponima zopori cotani eteroni uissinarra ticarrimanarraro. Deopa tiadeniza uatize-rrarauitoui. ₂₆Arra zodeo querrena-rrararraridenipa zopori cotani eteroni uissinarra cappiremanaraha pina Moizecca marinarrassa inanemanezape pouadenina pina parrissa zodeodenissa quenarrari. Uima bicani carrimanaui. ₂₇Naraha zodeodenipa zopori cotani eteroni uissinarra carrimanaraha motapa Moizecca marinarra ecauemananissa terrerani. Niza zama rriqueza zodeodenicca zopori cotani eteroni uissinarra cappiremanaraha Moizecca marinarrassa inanemanarrarodenina arra Moizecca marinarra zori inanemanarrarodeniza uati toquenauitoui: —Moizecca marinarra nauatoqquiri tiquenaraha narrarossa tinanemana-rrerarraro −quenauitoui. Pouadenirrine poccadeni uimasiri auato tanitoui. ₂₈Madirrapa zodeodenicca etero oro tozimemanaza zodeo toquerrenaui auatoqquiri narrari. Imedeniza zopori cotani eteroni uissinarra carrimanaza naco zodeo toquerrenaui nauatoqquiri inarraro. Naraha madirra zodeo torrarraripa poua uapicca, poua imeccaha orrari-rrerani. ₂₉Madirra parrissa zodeo torrazapa poua bodi Deoza ibora tarrarina parra. Poua bodi Deo inauissozapa pina zopori cotani eteroni uissinarra carrirrarissa narrari. Moizecca marinarraza bodi tobica-rrararaha Deo Corimerrinena bodi tobicarrari. Narrarorrine Deopa pouaza rripa tarrari. Madirra attideni pouaza: —Bica tinani −quena-rrarauitide naraha Deona: —Bica tinani −narrari.