Apocaripisi 8

₁Papeo pico naqquini nepi tamaroni 7 nanicca rricarinicca Eueue Bedi itabori zezape memeuarri madimanarrarideni bazima marri orraria rricabote naha tocadidire narrari. (Cariua attizape: meia hora, quenarrari.) ₂Zotodepa Deo Poua tezerrema pocca zozosse tabaqqui memeuarricca 7 quenaha domo uauarraniui qqui onabaqquirrari. Pouadeniza rrorro trobeta 7 naha da inarizarrari.

₃Zotode Deocca zozosse memeuarricca ouaha ccarronarrari, nauatoui marro bicabote totouessicca uauanari tazarranima uarrari. Poua zepeza basia oro nauatoni marro bicaboterrine zorro icarrizarrari. Nazapa pouaza nauatoui marro bicabote uapi taha da iquenarrari, iessiuiuarrine. Iessizapa essene marro Deoza parrissa quenarraridenicca uatinarra tazarrani Deoza bacco bacco tarraro. Nazapa uiuittari bicabote tazarranima totouessicca uauanari oro nauatoni tetepiniza iessirrari. ₄Nazapa Deocca zozosse memeuarricca zepeza zorro icarrizarrari marro bicabote rramimine arra Deoza parrissa quenarraridenicca uatinarra tazarrani toccamacossaza Deoza bacco tarraro. ₅Nazapa Deocca zozosse memeuarricca basia zorro icarrizarrariza marro bicabote totouessicca zippo ononi rradarini inarrirraro. Nezape namiuarri quissa inaronanerre oppina tehe torrarizarraro. Ttororo canerre, mouini rriza tehe tomouirizerre, ssiueue canerre, namiuarri naqui nami zaroro terre narraro.

₆Nazapa Deocca zozosse tabaqquideni memeuarricca 7 quenarrari rrorro 7 naha carrimanarraridenipa narroremanarrari, rrori rrori quenauiuarrine. ₇Nezape Deocca zozosse memeuarricca taidecca rrori rrori nanarra passo ccara torrani, zippo rradarini touemene carrimehe quissa inaronarraro. Narrarorrine nami arobeni dirri tezape aua mota dirri, ppatanicca, mina naqui nemanehe dirri tarizarraro. (Arobenipe cariua attiza: tercera parte, quenarrari.)

₈Nazapa Deocca zozosse memeuarricca zotodecca rrori rrori nanarra rrororoni imeni pina ssono imenissa narraro coro inaronezape passo imeniza ssonipparraro. Nezape passo imeni arobeni touemene torrarizarraro. ₉Passo imeni abari mota rrica, darroni imenibotecca mota rrica, darroni bedenicca mota rrica narrari.

₁₀Nazapa Deocca zozosse memeuarricca 3 nauicca rrori rrori nanarra amoua mota carrirarrari memeuarri dirri tocanaha rrororone motarehema cassonarrari. Nami arobeniza cassonaza ueni motaza, passo sibaza qquenarraro motaza cassonipparizarrari. ₁₁Amoua mota carrirarrari onipa: Bidabote. Narrarirrine passo motape tobidarizarraro. Narraro passo ze quenazapa madirra uapi taha cacotarizarrari.

₁₂Nazapa Deocca zozosse memeuarricca 4 nauicca rrori rrori nanarra marri arobe touaidira, abazico arobe touaidira, amouadeni mota touaidirariza narrari. Nazapa bazima arobe ouirizarrari. Narrarorrine ssiuarrani arobenipe tossiuarrani nerrerani. Zome arobeni naqui tossiuarrani nerrerani. ₁₃Zotode meme nocconiza ssibiri potarrari toccaui qqui onarrari. Toccaza atti moui taui omittarraro. Poua atti arrama narrari: —A, rraho! Namicca madirrapa touati nauanaqquiri nauitoui. Niza Deocca zozosse memeuarricca tabaqqui ouahadeni 3 quenarrari rrori rrori quenazapa uima denima oppina tanicca torranitoui −nade ssibiri potarrari.