Izarraeo potemaui deni 144.000 quenarrari deni Deo inarranorizarrari
1Narraro rriquezape Deocca zozosse tabaqqui memeuarri 4 quenaha nami rricaqquiniuarri uaueri narizaui qqui onabaqquide. Ouahapa marri ccarronauiuarri ua, ouahapa marri toccauiuarri ua, ouahapa arobeniuarri ua, ouahapa arobeni onihiuarri ua narizemanade. Narraridenipa rrorrode 4 nehe ecossemanarraro, namiza rrappo-ppo canariza-rreraniuarrine. Ueni imehi naco rrene toraui nauiuarrine, aua eppe naco rrene toraui nauiuarrine. 2Pouadenipa dacorehe carrimanarrari, nami, passo inarrizorize-mananiuarrine. Nazapa Deocca zozosse ouaha marri ccarronauiuarri ccarronaui qqui onarrari. Narraripa Deo Camittehe carrirraricca nanarrano zorro narronarrari. Nazapa Deocca zozosse tabaqqui memeuarricca 4 quenaha uaueri nauarranirrarideniza rrazirema uaua nade. 3Poua atti arrama narrari: —Arri nami, passo, aua tinarrizomane-rreraccarri. Niza icca Deocca zozossedeni uassarideniza narranorizaccana −nade.
4Nazapa madirra narranorizemanaui onideni omittarraro: 144 mil (144.000) quenade. Narraridenipa Izarraeo poua potemaui. Pocca erredeni 12 quenarraridenicca madirra. (Cariua attizape: 12 tribos, quenarrari.) 5-8Izarraeo bedi potemauideni narranorizemanauipa arrama quenarrari:
Zoda potemaui 12 mil (12.000),
Robano potemaui 12 mil,
Cado potemaui 12 mil,
Asero potemaui 12 mil,
Natari potemaui 12 mil,
Manase potemaui 12 mil,
Simao potemaui 12 mil,
Rebi potemaui 12 mil,
Isacara potemaui 12 mil,
Zaborona potemaui 12 mil,
Zoze potemaui 12 mil,
Benzami potemaui 12 mil quenaha narranorizemanade.
Madirra panauicca eterorideni mopoqquiri narraridenicca uima
9Narraro uima rriquezape ocattoma cananerre madirra panauicca qqui onabaqquide. Qqui onabaqquiraha onocco ssonaqqui nade. Madirra zama onihi onihiza madirizemanarrarideni mota, uapideni onihi onihi carririzemanarrarideni mota, touatti onihi onihi carririzemanarrarideni mota naco qqui onabaqquirraride. Deni torrauicca uiuittari bicabote cauittariniuarri, Eueue Bedi tezerrema bazima domodeni uarrari. Eteroridenipa mopoqquiri narraro. Deoza uatizemanaza birirrari eppe zorrorro zorrorro canade. 10Attideni moui taza uaua quenade:
—Icca Deo deni torrarraripa pocca uiuittariza uittarirrari.
Narraripa ia Tonassiuauade.
Eueue Bedirrine naqui icassiuauerarraro −quenade.
11Naui deni torrauicca uiuittari bicabote cauittarini tazarranima camittehe carrimanarrarideni domo uauarrani, arra cacauadedeni domo uauarrani, naui idedeniuarri Deocca zozosse tabaqquideni memeuarricca bazima domo uauarrani narrari. Narrarideni bazimapa Deocca uiuittari tazarranima pouadeni pitoza rrassi taza tocattezemanaza uassarideni namiza bacco tazapa Deoza uatizemanarrari. 12Attidenipa arrama quenarrari:
—Parrissa nema nana!
Deo, Tiaza etizeza: Tiana deni tirrani, inarraro.
Ticca deni torrehe nema zanaponitoui.
Tiana nauato tinani orrari tani.
Tirrine bica tani, icca Tamine deni tirrani orrari tani.
Ticca dacorehe deni torrani, bica tani.
Tiaza icca uatizehe nema zanaponitoui, inarraro.
Parrissa nema nana! −quenade.
13Nazapa cacauade 24 quenarrarideni orraria ouaza uati tarrari: —Arra eterorideni mopoqquiri narraridenipa nerrecorrarideni? Nauato tinaqui? Nerrecouarricca rrauirronarrari? −nade. 14Naraha manaco pouaza uati onade: —Tiana nauato tinani −onade. Nazapa ouaza uati tapomade: —Arrarraridenipa namiza ocasserani imeni tonauane-manaraha Zeso Cristo tauimari nebomana-rrararrari. Eueue Bedi Zeso poua emene toccarrarorrine poccadeni uaidirehe tomossirraro. Narraria arra etero moponi carrimanarrariparra. 15Narraria arra Deocca uiuittari bicabote tazarranima bazima domodeni uarrariparra. Deoza dada toqquimacca ozauarri uatizemanazapa zome zepedeni irrimana, ssiuarra zepedeni irrimana narrari. Deni torrauicca uiuittariza uittari canarraripa pouadeni cacauade pouadeniza madirizauitoui. 16Nazapa pemimana-rrarauitoui, baccodeni naco rrocomana-rrarauitoui. Marri ppoconerrine imedeni quemana-rrarauitoui Ppoconi naqui pouadeniza ocassera terreranitoui. 17Narraro uima torraniuarrinepe arra Deocca uiuittari bicabote tazarranima Eueue Bedi uarrarina pouadeni ecauabaqquiuitoui. Pina eueue cacauade pocca eueue ecauabaqquirrarissa nauitoui. Passo bicani camittehecca sibaza qquenarrarocca ze ze zanapomanauiuarrine pouadeni eccariza-baqquiuitoui. Poccadeni orriepe Deo inarricanitoui. Noccodeni pperrene sse inarizazapa denima orri quena-rrarauitoui −nade cacauade orraria atti.
