Memeuarri uatizehe torrarizarraro
1Nezape Babironia dirri tehe rricani nattinipe memeuarri madirra bazima attideni moui tehe omittarraro. Pouadeni attipa:
—Areroia, ia Zozossede Deopa bica taui! Pouapa tossiuauehe rrinede.
Uima uapimaza deni torrarrari. Pouana denima dacoraui orrarirrari.
2Deopa parrisseheccaza uima nattome inezape Pouarrine parrirenissa tarraro.
Babironiacca uananehe zama bazimaza dacora tarizarraro manaconipe poniza ssonarinitoui.
Ponirrine Deocca zozosse emenedeni toccarizarrari manaconedeni naco narrizoue oppina tarraroza Deo inarricarraro −quenarrari.
3Nazapa uati toquenapomarrari:
—Areroia, ia Zozossede Deopa bica taui!
Babironiape dirri tehe rriqueraha esseni toccamacossanipe nebo-rreranitoui −quenarrari.
4Nazapa cacauadedeni 24 quenarrari, camittehe carrimanarrari 4 quenarrarideni tezerre Deocca uiuittari bicabote tazarranima pouadeni baccouarri domodeni pona naza Deoza uatizemanarrari. Pouadeni attipa:
—Parrissa nema nana! Areroia, ia Zozossede Deopa bica taui! −quenarrari.
5Nazapa Deocca uiuittari bicabote cauittariniuarri touatti omittarrarope arrima narraro:
—Bazima Pouaza zozosse tiquerrenarraro icca Deoza rriri rriri tiquenarri.
Bazima Pouaza tizepedeni irrirraro,
Poua noppine cappinaqquiri tiquenarraro, arri deni tiquerrenarrarodeni, arrimani tiquerrenarrarodeni naqui
Deoza rriri rriri tiquenarri −narrari.
Eueue Bedi cacarrireuicca errete
6Nezape memeuarricca madirra bazima attideni moui omittanerre bica tarraro, pina ueni ssahaha canarrarissa narrari. Mouini onihi naqui pina ttottorode mouini dacorarrarossa narraro. Attidenipa:
—Areroia, Ia Zozossede Deo dacorabotepa deni torraui!
Rridapana bazima ecauabaqquiuiuarrine pocca cacauehe bacco tani.
7Etizena, etizeri nana! Deoza: “Deni tirrani, bica tinani” inana.
Rridapanana Eueue Bedi cacarrireuicca uada bacco tani.
Pocca amonerre torraniuarrinepe narrorani.
(Narrarope pocca madirra narroremanarrari, pouaza madimanauiuarrine.)
8Etero uezeza narroraniuarrinepe poniza etero onini linho bica tarraro, mopo, zibehi tarraro da inarraro.
Narraro etero bicanicca uimape Deocca madirra toquerrenarrarideni bodideni inauissobaqquiza Pouaza madimanauissa tarrari −quenarrari.
9Nazapa Deocca zozosse ouaza uati tarrari: —Dozo tarri: Eueue Bedi Zesopa pocca madirraza uaua narrari, pocca uenauenacca rripaqquieza rraui torrezimauiuarrine. Rraui torrezimarraridenipa uatizehe imeni carrimanauitoui −narrari. Nazapa denima uati tarrari: —Arri uati uati onarrarope Deo Atti parrissehecca −narrari.
10Nezape Deocca zozosse baccouarri opitoza ouitta neza pouaza ouatizeniuarrineraha ouaza uati tarrari: —Ouaza nema terrerarri. Oua naqui Deocca zozosse orrani. Pina tia timecotedeni tezerre Zeso Cristo tauimariza dameraqquiri tiquenarrarossa onani. Deozara tetizerri −narrari.
Arri Zeso Cristo tauimari bicabotepe Deo Poua Atti cacomeraqquiri narrarideniza inanazana ehecomeremana narronarraroparri.
Cavaro mopouiza uittarirraricca uima
11Nezape qqui onanerre meme touabeza cavaro mopoui auatorrari. Narrari cavaroza uittarirraripa Parrissehe Rrinede. Pouapa maizera tarrari. Zama ecaueza, rrazire inaneza naqui pouarrine parrirenissa tarraro. 12Poua nocco zibehi tarraro. Pina zippo rrororonissa narraro. Poua tatizapa tamine tatidenicca uapi taha tassaqquiza uittarirrari. Poua oni dozo nani carriraha poua motta nauato taui orrari narrari. 13Pocca eterope touemeneza ibezippani macco tarraro uezarrari. Poua onipa Deo Atti. 14Pocca madirra memeuarricca rrarrazirededeni poua natti rraui torramissarrari. Poccadeni etero onini linho bica tarraro, mopo, uisso tarraro uezemanaza cavaro mopouiza uiuittariri narizarrari. 15Poua arrariza qquenarrarope pina massito cauidi-qquimerarrarossa narraro. Narraroza zama bazimacca madirra inarrizoriza-baqquiuiuarrine. Zama bazimacca tamine dacorabote torrazapa poua atti dacoraza madirra zosse zosse nauitoui. Pouarrinepa Deo Dacorabotecca uadie torrani qqui toquenauitoui. Pouapa Deoza iboqquiri narrarideni ttai izanacossabaqquiza mere uarrauissa tauitoui. Pina uva pperrene toccauiuarrine ttai ttai quenarrarissa nauitoui. 16Pocca eteroza, poua panaccoza naqui dozo nanicca uimape: —Tamine uapi taraha Zesona tamine deni torraui orrariui. Zozosse carrimanaui uapi taraha Zesona ia Zozossede deni torraui orrariui −narraro dozo nani.
Cavaro mopouiza uittarirraripa deni torrarrari
17Nazapa qqui onanarra Deocca zozosse memeuarricca marriza uariui qqui onarrari. Pouapa meme abari banicca rripaqquiri narrari meme nocconiza rrauirizarrarideniza rrazirema uaua narrari: —Nirra, rraui tirrarronarri! Deocca rripaqquie imeniboteza tirripemananiuarrine tiqueriqquimanarri −narrari. 18—Tirripemananiuarrinepe tamine imedeni, isso teppeppedenicca tamine imedeni, rrazirecca dacoraqquiri narrari imedeni, cavaro imedeni, cavaroza uiuittaride imedeni, madirracca zozosse toquerrena-rrararrari imedeni, madirracca zozosse toquerrenarrari imedeni, arramani toquerrenarrari imedeni, deni toquerrenarrari imedeni naco tirripemananitoui −narrari.
19Nazapa qqui onanarra bani siri rrizabote, zama bazimacca taminedeni, poccadeni isso teppeppedenima rrazire inanemananiuarrine queriqquiui qqui onabaqquirrari. Arra cavaro mopouiza uittarirrariza ssonarimanauiuarrine, pocca isso teppeppedeniza naco ssonarimanauiuarrine narroremanaha domo uarrari. 20Cauadirezapa cavaro mopouiza uittarirrarina pocca madirra tezerre bani siri rrizabote dama dama iquenarrari. Bani siri ouaha maizehe mamaride naco dama iquenarrari. Narraripa bani siri rrizabote tocattauiuarri canauatori canaporrari. Narrari naco madirra icamaizabaqquizapa bani siri rrizabote rranoza inarranorizaporrari. Narrari pouarrine naco bani siri rrizabote corimeza uatizemanaporrari. Nazapa narrari bani sirideni pamahapa camittaqquiri naraha coriza imeni enxofre rrororo cananiza cororo tozipparrari. 21Nazapa cavaroza uittarirrari poua arraricca massito cauidiqquimerarraroza bani siricca isso teppeppedeni inarricarrari. Nazapa meme abari madirra imedeni rripemanaza accaraqquiri narrari.
