Oza panani imeni Babironia rricanissa tarraro tauimarini
1Uima qqui onaporraro rriquezape Deocca zozosse ouaha memeuarri ccaronaui qqui onarrari. Zossehe dacoranicca carrirrari. Poua zibehinerrinepe nami bazima tossiuarrabaqquirraro. 2Nazapa poua atti moui dacoraza uaua narrari:
—Babironia rricani, rricani! −narrari. —Babironia oza panani deni torranicca rricani.
Rridapanapa Babironiaza Tocorime-Taminecca zozosse tabaqqui tocorimedenira madimanaui.
Abariza, mori, eppe carriui oppina tauicca bazima madimanaui.
Bani siri uadi tauicca naco madimanaui.
3Arri Babironia rricarrarope zama bazimacca madirra ponicca uananeheza toquerrenarizarrari.
Noccodeni rranoqquiri nauirrine zeze coma tanicca ze inanariza-baqquirrarissa narraro.
Zama bazimacca tamine Deoza iboqquiri narrarideni ponicca uananeheza toquerrenarrari.
Ponicca madirra tozepetarri bicabote toui dameraqquiri, rrirripa uaticcara tauicca toui dameraqquiri narrarirrine
zama bazimacca dadadedeni Babironiaza pouadeni zepetarri da da iquenazapa ziniro sseqquirinarrari.
Narraro uima uapimarrine Babironia rricarraro
−narrari Deocca zozosse atti.
4Nezape memeuarri atti onihi omittezape arrima narraro:
—Occa madirra Babironiaza timadimanarrarope ponicca uimasiriza ticarrimemana-rreraniuarrine rraui tirrenarri.
Babironiaza narrizoue ssonarinitoui.
Narraro narrizoue zori ticanireniuarrine uarrirri tinarri.
5Babironiacca madirra uimasiri inanemanaporrarope inauanemanarraro.
Pina ssono motararraro memeuarri bacco tarrarossa narraro.
Poccadeni uima uaidira tarraro Deo uati rrama-rrararrari.
6Babironiape madirra inarrizo-baqquirrari manaco poniza narrarossa nehe torranitoui.
Pina ponirrinessa nehe denima oppina tehe tinanemanarri.
Madirraza uimasiri inanarizarrarope pina zeze bidabote ze inanabaqquirrarissa narraro.
Manaco poniza denima oppina tehe ze tinanemanarri.
7Coma taniuarrine tinarrizomanarri. Ponipe: “Ouape deni orrani” nanerre narraro.
Poni zapanitarri bicabote touini dameraqquiri zanapomanarrari.
Manaco poniza comani imeni tinanemana-zanaporri.
Poni bodiniza: “Ouape arriza omadirraro, tamine deni torranicca orrarraro.
Amonerre tobaccopero orra-rrerani. Nanarrizo orrarreranitoui” narraro.
8Poni attini nema nezape Deo Dacorabote attia: “Babironia onarricana” nazapa poniza narrizoue imeni amazati ssonarinitoui.
Ponicca madirra uapi taha comaboteza cacotarizauitoui.
Motapa auemanauitoui. Motapa pemimanauitoui.
Nezape Babironia dirri tehe rricanissa tanitoui
−narrari Deocca zozosse.
9Niza zama bazimacca tamine, arra Babironiacca uananeheza toquerrenarrari, pouadeni touini quenauiccaza toquerrenarrari bazimapa oza panani dirri teza esseni toccamacossani qqui toquenazapa orri orri quenauitoui. Pouadenipa ponitoui orri orri quenauitoui. 10Pouadenipa Babironiaza narrizoue ssonarirraro noppineni cappinemanazapa uarrima cattomama canauitoui. Pouadeni attipa:
—Rraho! Babironia tiape icca oza panani deni torranicca dacorabote tirreraha
amazati ticca uimasiri manaconi narrizoue tiaza bacco tarraro −quenauitoui.
11Nazapa zama bazimacca dadadedeni naco pouadeni zepetarri mittade nouerazapa ponitoui orri orri quenauitoui. 12Nazama Babironia bica taqqueza pouadeni zepetarri eheccarronemana narrarope oro, prata, siba bedeni uatini ccara tanicca, onihipe perola moponi bicabote, etero bicani onihi onihi nehe pina linho uatini ccara tanicca, seda, macconi purpura, denima macco tarraro naqui eheccarronemana narraro. Aua marroni bicabote carrinicca, marfim nauatoui, aua uatini ccara taniccaza nauatoni, pperro onini bronze nauatoni, siba sseque tarraro onini marmore nauatoni naqui eheccarronemana narraro. 13Zamatapa cacarrima canela, zamatapa cacarrima marro tauicca ouaha ouaha naco uemaui eheccarronemana narrari. Aua marriconi touessiza marro bica tarrari, aua onihi marriconi mirra eheccarronemana narrari. Marrorro, uva pperrene, aua bono rritona oquine, farinha nappori tauicca, arroi rrizaza tirico naco eheccarronemana narrari. Boui, cavaro tozepetarri rrorrorede, eueue, cavaro madirra rrorrorede, nami rrorroppade cavaro rroca rroca ihicana narraro, madirra escravos deni naco eccarronabaqquimanarrari. Naza madirra tabarideni naco eccarronabaqquimanarrari narrari. 14Naraha Babironia rriquezape dadadedeni poniza arrama quenauitoui:
—Rridapanape aua bono ocassabote touini tanicca ticappiranissa tani.
Arri tia ticarrirrarocca bazima bicabote parri rricarihe nema zanaponitoui −quenauitoui.
15Nazapa dadadedeni Babironiaza pouadeni zepetarri da da quenapoza ziniro sseqquiri naporraridenipa poniza narrizoue oppina tehe ssonarirraro noppineni cappinemanauitoui. Nazapa uarri taniza domo uaza orri orri quenauitoui. 16Pouadeni atti arrama quenauitoui:
—Rraho, Babironiape oza panani deni torraniccaraha rricarraro. Touati nauana tani.
Narraro oza pananipe pina amonerre poni nabicarrarocca uimassa narraro.
Etero bicabote linho ueza, onihi purpura ueza, onihi macconi ueza narraro.
Poni neuebezozape oro, siba bedeni zibehi tarraro, perola naqui mattoniza, uariboniza, birriniza, issoniza carrirraro.
17Rrehe poni bodini uato-rrereraha amazati narrizoue bacco tarraro.
Ponicca ziniro rrica, bicabote rrica narraro −quenauitoui dadadedeni.
Nazapa darroni imenibote rrinededeni, pouadeniza rrauirronarrarideni, darroni imeni ahaccadedeni, ueni imehiuarri tatarabaiadedeni bazimapa uarrima cattomama canauitoui. 18Babironia dirri tani esseni toccamacossani qqui toquenaza rroua rroua quenauitoui. Pouadeni attipa: —Oza panani deni torranicca narrarossa narraro nouerani, nouerani! −quenauitoui. 19Nazapa orrierrine ocasserani auemanaui auato taniuarrine pouadeni tatiza ssiqui uira narimanaza rrazirema orri orri quenauitoui. Orri quenaza attidenipa:
—Rraho, Babironiape deni torraniccaraha touati nauana tani!
Babironiazapa ziniro sseqquiri naha madimanarrari.
Pouadenirrine passo imenicca darroni imeni rrinededeni ziniro uemani carririzemanarrari.
Naraha uada orrarie amazati rricani −quenauitoui.
20Nezape memeuarri timadimanarrarodenipe arrirraro oza panani rricarraroza tetizemanarri!
Zeso Cristocca zozosse tabaqqui, Deo Atti cacomeraqquiri narrarideni, Deoza tiquerrenarrarodeni bazima tetizemanarri.
Ponirrine nanarrizo tiquerrenarizaporraro manaconi rridapanana Deo inarrizorraro.
21Nazapa Deocca zozosse memeuarricca dacorabotepa siba imeni idimacossa narraro. Narraro sibape imenibote pina arroi rrizaza tirico ririuassa narraro. Narraro siba imeni ueni imehiza coro izippaza poua attipa:
—Babironia tiape oza panani deni tirraniccaraha arrirraro sibassa tanitoui.
Parri amossi tarizape tia qqui quenapoma-rreranitoui −narrari.
22—Nazama ticca rraui bazimazape titire onini arpa moui todidi, totori mouini todidi, rrorro moui todidi nazapa madirra mittemanapoma-rrarauitoui.
Ticca tatarabaiadedeni naco amossiuarrauitoui.
Tirico riua riua mouini naqui todidi nanitoui.
23Tiaza rrorrororo ssiuerrene naco nouerauitoui.
Uenauenacca errete mouini noueranitoui.
Ticca tozepetarri dadadedeni zama bazimaza deni toquerrenaraha rricanitoui.
Tiape zama bazimacca madirra ticamaizabaqqui-rizarraripa
pina zoppinerre madirra icamaizabaqquirrarissa tarrarorrine parri amossi tarinitoui −narrari.
24Rrehe, narraro oza pananizape Deo Atti cacomeraqquiri narrarideni inarricarizemanarrari. Deocca madirra toquerrenarrarideni naco inarricarizemanarrari. Arra zama bazimacca madirra irrinedeni auemanaza emenedeni toccarizarrarorrine Babironiaza Deocca narrizoue ssonarirraro.
