Amonerrecca uima, daragao imehibotecca uima
1Uima nauatoqquiri inaniuarrine memeuarri amonerre auatorraro. Ponicca eterope pina marri ssiuerrenessa nehe uezarraro. Abazico tetepiza uarirraro. Tatiniza tamine taticca uittarirrariza amouadeni 12 canaha carriuarranirrari. 2Narraro amonerrepe izoniza erredeni uittizarrari. Tossonauiuarrine comazapa rroua rroua narraro. 3Zotode naqui memeuarricca uima onihi nauatoqquiri inaniuarrine ouaza auatorraro. Qqui onanarra pina daragao imehibote maccoui. Tatipa 7, ori 10 narrari. Tati 7 narraroza tamine taticca uittaririzarrari. 4Nazapa daragao imehibotepa amouadeni mota (Cariua attizapa: tercera parte, quenarrari) poua zoporiza rrazirema rroue inaronabaqquizapa namiuarri ua inaronabaqquirrari. Nazapa daragao imehibote amonerre izoni comarraro tazarranima uarrari. Erredeni tossonazapa amazati rripauiuarrine narrorarrari. 5Naraha ponicca erredeni maqquiderre bedi tossonazapa madirrari. Narraripa niza zotode zama bazimacca tamine dacorabote torrauitoui. Pocca zozorro ccanarra tarrariza pocca madirra zosse zosse nauitoui. Naraha ponicca erredenipa todinimacossanirrari. Naui Deo Poua uittariuiza zossede uittarirrari. 6Naraha imenipe zama uamoni ssono carri, siba carri taniuarri rroppa tarraro. Arri poni rroppa taniuarri madiniuarrinepe Deorrine narroraporraro. Naniuarripe taparini carrizanaponiuarrine uada 1.260 nehe madirraro.
7-8Zotodepe meme nocconiza rrazire torrani qqui onarraro. Deocca zozosse tabaqquidenicca tamine Miqueopa pocca zozosse tabaqqui tezerre daragao imehiboteza rrazire inanemanarraro. Daragao imehibotepa pocca zozosse tabaqquima Miqueocca zozosse tabaqqui tezerre cauadiremanaraha daragaodenipa deni toquerrenauiuarrine parriremana-rraraui. Memeuarri madimana-pomauiuarrinepa rricani. 9Nazapa daragao imehibote cco inaronemanarrari. Narrari daragao imehibotepa maittaccazama pina maccassa naha auatoporrari. (Narrarina Adao Ebadeni icamaiza-baqquiporrari.) Poua oni ouahapa: Deoza uauadide Tocorime-Tamine, quequenanarrari. Poua, pocca zozosse tabaqquima namiuarri ua inaronemanazapa namiza catorraronarrari. Nama nazapa zama bazimacca madirraza maiza maiza nanariza narrari.
10Nezape memeuarri touatti mouini omittarraro attipa:
—Rridapanana ia Zozossede Deo ia tonassiuauabaqquiuicca uima bacco tani.
Rridapanana Deocca dacorehe, pocca cacauehe iaza auato tani.
Deo pocca Cristo-Mesia poua zosse zosse nauicca uima bacco tani.
Arrana, imecotedeni tauimari pouama uatirride rabote Tocorime-Taminepa coro inaronarrari.
Zome, ssiuarra, zome, ssiuarra icca Abi Deo tezerrema imecotedenicca uima uati uati nanarra naraha rridapanape pocca uima rricani.
11Imecotedenipa deni toquerrenarrari. Tocorime-Taminepa arramani torraui.
Eueue Bedi Zeso zoqqueza emene toccarrarirrine,
poua tauimari ecomerarize-manarrarorrine naco deni toquerrenarrariparra.
Pouadenipa zoqquehe noppineni cappinemana-rrararrari.
“Izoqqueza naqui bica tani. Deo inebo-rrarauitoui” quequenanarrari.
12Nazama memeuarri timadimanarraro bazimape tetizemaneri narri.
Naraha arri namiuarri timadimanarraro, ueni imehiuarri timadimanarrarodenipe touati nauanaqquiri tiquenani.
Tiadeniza uima oppina tehe torrarizanitoui.
Deoza uauadidepa tiadeniza uadiuiuarrine toccaronarrari.
Pocca uima rricabote nani nauato tazapa uadie imeni carrirrari
−narrari memeuarri touatti mouini omittarraro.
13Daragao imehibote bodi uatozapa: —A, namiuarri oua coro naronarrariraha −narrari. Nazapa amonerre erredeni maqquiderre bedi carrirre narraro inanazoqqueniuarrine qquizo qquizo narizarrari. 14Naraha amonerre uarri tani toccaniuarrinepe pina ssibiri imehibote eppessa narrari capamaha da iquenarrari. Nezape poni madiniuarrine zama uamoni ssono carri, siba carri taniuarri daragao uarri tauiuarri toccaniuarrine appani carrirraro. Nanizape poni ecauemana-zanapoza uarrano 3 denima uarrano arobeza madiniuarrine. 15Naraha daragao imehibotepa amonerre toccaniuarrine narrorani qqui taza poua arrariza passo motarehema capiri inarraro, ueni tocarraza totaboniuarrine. 16Naraha namipe amonerre acco icanarraro. Nami odini touabarraro. Pina arrarini carrirrarossa narraro. Nezape uenicca passo nemanehe dappi izimarraro. 17Nazapa daragao imehibote amonerreza denima uadi tazapa poni potemaniza rrazire inananiuarrine toccarrari. Arra Deocca zossenirriza iboraqquiri narrari, Zeso Cristo tauimariza dameraqquiri narrarideniza rrara rrara narrari. 18Nazapa daragao imehibote ueni imehicca ssiquiza uarrari.
