Deo Atti cacomerabote pamahacca uima
1Nazapa ouaza nanattome uenicca bobassa narrari da inarrari. Nazapa ouaza da inarraripa ouaza uati tarrari: —Titemeza ticcarri, Zerozarecca Deoza dada toqquimacca oza nattome, Deoza da tauiuarrinecca uauanari nattome tarro. Nauicca madirra Deoza uatizemanarrari ua tarizarro. Nerrecoma quenaha animanarrari? −narrari. 2—Naraha Deoza dada toqquimacca boronipe nattome terrerarri. Narraro boronipe zodeo querrena-rrararrarideniza torrani. Narraridenipa abazico 42 canaha Deocca oza panani bicaboteza madimanazapa pouadenirrine touaidiranitoui. 3Nazapa Deo Atti cacomerabote pamaha ocazossebaqquiuitoui. Etero rriza tanicca pina madirra ocasserani auemanaza uezemanarrarissa narraro uezemanaza uada 1.260 nehe (abazico 42 canaha) nama quenauitoui Deo Atti ehecomeremana nanitoui −narrari.
4Arra Deo Atti cacomerabote pamahapa pina aua onini rritona pamahassa quenarrari. Pina rrorrororo pinine capamahassa quenarrari. Ia Zozossede Deo zama nemanehe Cacauade tezerrema uatide barrari. 5Madirra attidenipa: —Deo Atti cacomerabote pamaha inarrizobaqquina −quenaraha manacora pouadeni arrari rrororoni qquenarraroza pouadeni rrarade dirri tocanirezapa ono toquerrenauissa tauitoui. Nama quenaza pouadeni narrizode touini quenarrarideni rricauitoui. 6Deo Pouarrine nauatoue carrimanazapa memecca passo ecossemanarraro. Abazico 42 canaha Deo Atti cacomerade toquerrenazapa pouadenirrine namiuarri passo qquerrerarraroparri. Deo Pouarrinea nauatoue onihi onihi carrimanazapa pouadenirrine passo touemene torrarraro. Ocasserehe onihi, onihi naqui zama nemaneheza inanarizemanarraro. Pouadenipa: —Irrine madirra ocasserani auemanana −quenazapa nema inanemana-zanaporraroparri.
7Deo Atti ecomerarize-manarraro rricanissa tezape bani siri imehi rrizabote nami odini uarri taniuarri qquenazapa pouadeniza ssonariuitoui. Pouana deni torrazapa inapamarronauitoui. 8Nazapa ia Zozossede Zeso aua porimacossaniza coba izanemanaza zoqqueuicca oza pananicca rrauiza assiredeni pparaui codauitoui. Narraro oza panani oninipe Zerozare naraha onini ponimacca ua iquenarrarona: Uimasiri sseqquiri narraridenicca oza panani Sodoma, quequenanarrari. Onini onihi naqui: Deoza iboqquiri narraridenicca zama Ezito, quequenanarrari. 9Nauiza uada 3 denima uada arobeni assiredeni codarrari qquide madirra rrauirronana canauitoui. Madirra panauicca ouaha ouaha narizemanarrarideni mota, madirra uapideni onihi onihi carririzemanarrarideni mota, touatti onihi onihi carririzemanarrarideni mota, zama onihi onihiza madirizemanarrarideni mota rrauirronana canauitoui. Narrarideni bazimapa ppa izabaqquimana-rrarauiuarrine eccoccobaqqui-manauitoui. 10Deo Atti cacomeraqquiri narrarideni pamahapa arrirraro zamacca madirradeniza oppinehe imeni inanarizemanarrarorrine pouadeniza nacasseraqquiri narrari. Nazapa topamarronarrarirrine madirrapa uatizemaneri nauitoui. Catizerara canazapa pouadeni zepetarri pouadeni tesseza manaconi rrirehe arrauarri da, arrauarri da iquenauitoui.
11Naraha uada 3 denima uada arobeni rriquezape Deorrine camittemani-manaza toteme-manarrari. Nazapa madirra bazima cattomama canarrarideni cappinemanauissa tarrari. 12Nazapa arra Deo Atti cacomeraqquiri narrarideni pamahapa memeuarricca atti moui dacoraha mittemanarrari. Pouadeni pamahaza: —Nirra, arriuarri ticadamacossarri! −narrari. Nazapa pouadeni uadide cattomama canaraha meme essenima carrimemanaha touedamacossarrari. 13Nanerre amazati nami zaroro tarraro narrarope ccarabote oza panani mota barari-rizezape catorrarizarraro. Narrarorrine madirra 7 mil (7.000) quenaha rricarrari. Nazapa tocassiuauerarraridenia cappinemanaza: —Memeuarri madirraripa Deo dacoraui, deni torraui −quenarrari.
14Nazama arrirraro zamacca madirraza uima oppina tarraro pamehe rricaporaha niza onihi torrapomaccanitoui.
Deocca zozosse tabaqqui memeuarricca 7 nauicca rrori rrori narrari
15Deocca zozosse tabaqqui memeuarricca 7 nauicca rrori rrori nanarra memeuarri attideni mouiqquiri naha uati uati toquenarrari:
—Rridapanape zama bazima ia Zozossede Deocca cacauehe torra,
Cristo-Mesiacca cacauehe torra narraro.
Pouadenina zossede nama zanapomanauitoui −quenarrari.
16Nazapa cacauadedeni 24 quenaha Deo tezerrema taminedenicca uiuittariza rrassi tarirraridenipa pouadeni pitoza rrassi taza tocatteza-rizemanaza panodeni namiza bacco tarizezapa Deoza uatizemanarrari. 17Naza attidenipa:
—Ia Zozossede Deo Tiape dacorabote orrari tani.
Tiape nazama timadiporrarope timadi-zanaporraro.
Tiaza etizerraro, uima bicani tinanani.
Arri ticca dacorehe bazimaza tirrine auato tinanarizarraro.
Rridapanape zama bazima zossede tirrarraro.
18Nezape zama onihi onihi narizarrarocca madirra tiaza uadimanarrari.
Naraha rridapanana ticca uadie torrarizaniuarrinecca uada bacco tani.
Nazapa rriquemanaporraridenicca uima pouadeniza uati tinezape poccadeni uimasiri manaconi pouadeniza narrizoue tinassonari-rizanitoui.
Naraha ticca zozosse Tetti cacomeraqquiri narraridenizape manaconi bicabote da tinarizanitoui.
Tiaza toquerrenarrari bazimaza naqui da tinarizanitoui. Narraro manaconi bicabote da tinarizarrarope arramani toquerrenarrarideniza, deni toquerrenarrarideniza arra bazima tinoppine cappinemanaza Tettiza iboraqquiri narrarideniza tinanarizanitoui.
Rridapana naqui arrirraro zama inauaidirarize-manarrarodenicca uaidirehe manaconipe pouadeni tinarricauitoui −quenarrari cacauade 24 quenarrarideni.
19Nazama memeuarricca Deoza dada toqquimacca totoqquezima touabarraro. Narraro bodizape Moizecca madirra Deo Poua tezerre rrehe canirerraricca bau cauato narraro. Nezape ssiueue canarizarraro, mouini imeni tomouirizarraro. Ttottorode ttororo canarizarraro, nami naqui zaroro narraro. Passo ccara torrani naqui rrazirema catorrarizarraro.
