Maraco 14

₁Zodeodenicca errete pamehe touarrirarronarraro. Taidecca uadazape Pascoa torraporraro. (Ettizape: Deo tossoniqquimarrari, inarraro.) Zotodepe Pao ssarra tarraraui rripemanarraricca errete torrapomarraro. Narraro errete torraniuarrinecca uada pamehe zori taqquezape arrirraro uima torrarraro. Dada toqquimade taminedeni, zodeodenicca marinarra maridedeni quenarraridenipa Zesoza nacasseraqquiri narrari bazima queriqquiza: —Nerreco maizeheza Zeso tozepe torraza zoqqueuiuarrine? −quenaui nade. ₂Naraha pouadeni atti onihipe: —Errete torrezape uima noueraccaniuarrine. Zesoza madirra nacassaqquiri narrarideni poua dama inaui qqui toquenazapa moua moua quenarana −quenaui nade.

₃Zesopa oza capamema narraro onini Betaniauarri madiza Simao uapi rrazizi quequenanarraricca ozaza toqquezimarrari. Naui Simaocca ozaza rripade rrassi tariza amonerre Zesoza touarriressirraro, poni zapaniza siba onini alabastro nauatoni rrorro bicaui zorro inarronarrari. Narrari rrorroza marrorro bicani oninipe nardo zorro icazimarraro. Narraro marrorrope passoza carrimerani, uatini ccara tanicca. Nezape rrorro bono itaboza Zeso tatiza nemanehe sso inarirraro. ₄Naraha nauiza rrassi tarirrarideni motaha uadimanazapa pouadenira uimahaha canarrari: —Nerrecotoui marrorro ponima inarricarraro? −quenaui nade. ₅—Narraro marrorro manaconipe ziniro ccarara 300 denario denima nitide. Iaza da inezape madirra cappiremanarrarideniza da iqquimanitouiraha −quenaui nade, pouadenira uati canirere canaza. Nazapa poniza naco atti atti quenarrari nade. ₆Naraha Zesoa: —Peperri tiquenarri. Nerrecotoui poniza tedimanarraro? Ponirrine ouaza nema nezape bica tani. ₇Cappiremanarraridenina tiadeniza madimana-zanapouitoui. Touini tiquenezape pouadeni tinanabica-baqquimanauiuarrine bica teraha ouape tiadeniza omadizanapo-rreranitoui. ₈Arri marrorro ouassireza sso inarirrarope pina ozoqqueza oua ppa izemananiuarrinessa narraro narroraporraro −naui nade. (Zodeodenipa poccadeni madirra zoqquezapa nama quequenanarrari.) ₉—Parrissehera tiadeniza uati onarraro: Zama onihi, zama onihiza otauimari madirra tocassiuauerauiuarrinecca ecomeremanezape arri otatiza marrorro sso inarirrarocca uima naqui madirra mittarizemanauitoui. Nema nezape ponicca uima uatideni rramemana-rrarauitoui −naui nade Zeso.

₁₀Zesocca zozosse tabaqqui 12 quenarrari orraria oni Zoda Iscariotepa dada toqquimade taminedeniza Zeso eccorauiuarrine uatide toccarrari. ₁₁Nazapa Zodacca uima mittemanaza uatizemanarrari: —Rrehe, Zeso teccorarrari manaco ziniro tiaza da inana −quenaui nade. Nazapa Zoda toccaniza poua bodi narrorarrari. Zeso pouadeniza eccorauiuarrine inoccozarizarrari.

₁₂Pao ssarra tarrarauicca errete bacco tarrarope uada 7 nehe rricaniuarrine. Narraro erretecca uada taideccaza zodeodeni pouadeni motta eueue bedi Deoza da da quequenanarrari. Eueue bedi inanazoqque-manaza ibanemanazapa rripemanarrari. Narraro errete oninipe Pascoa quenarrari. Nezape narraro uada bacco teza Zesoza poua uatimadedeni uati toquenarrari: —Couarriza Pascoacca rripaqquie tiaza inarroraniuarrine? −quenaui nade. ₁₃Nazapa poua uatimadedeni pamahaza uati tarrari: —Oza pananiuarri ticadaporri. Maqquiderre rrorroriza passo zorro icanani bacco tiquenazapa poua natti ticadamissana. ₁₄Pocca ozaza toqquezimanizapa nauicca oza rrinedeza uati tiquenana: “Ia Maride attipa: ‘Nerrecouarricca coba canauarraniniza Pascoacca rripaqquieza orripaniuarrine ouatimadedeni tezerre?’ naparra” tiquenana. ₁₅Nazapa pocca oza tetepicca coba canauarranini imeni tiadeniza noue inanitoui. Nanizape uauanari, uiuittari narroraponi. Nanizana rrirripa tinarroremanaponiuarrine −naui nade Zeso. ₁₆Nazapa touedazapa pina Zeso poua uati tarrarissa narraro oza narrorani qqui toquenarrari. Naniza Pascoacca rripaqquie zome rripaqquimanauiuarrine narroremanarrari.

₁₇Zesopa pocca zozosse tabaqqui 12 quenarrari tezerre zomerronaza rripaqquimanauiuarrinecca ozaza bacco toquenarrari. ₁₈Uauanariza rrassi nauarraniza rripade toquerrenazapa Zeso uati tarrari: —Parrissehera tiadeniza uati onana: Ouaza rripade tiquerreneraha orraria oua ccaccorazapa tozepe orranitoui, onarraro −naui nade Zeso. ₁₉Nama nazapa pouadeni bodi qquezaza: —Arri ouazaqui? −narizemanarrari. ₂₀Nazapa Zeso attia: —Tiadeni 12 tiqueneraha orrariana icca paratoza poua naco pocca paoza depo apa, depo apa naui. Narrarina oua ccaccorauitoui. ₂₁Rrehe ouape Madirra Bedi orrarraroa niza ozoqquenitoui. Pina maittaccazama otezerremacca uima Deo Atti cacomeraqquiri narrarideni dozo iquenaporrarossa onanitoui. Naraha oua ccaccoradeza oppina tehe torranitoui. Rraho, narrari maqquiderre tossona-rrarazapa bica teraha, oppina tanicca zori tauitouiraha −naui nade Zeso.

₂₂Nazapa rripade toquerrenaza Zeso pao idi naza Deoza uati tarrari: —Rrehe Abi Deo, ticca danirri iaza bica taui −naui nade. Nazapa pao icanarobeza dize rrai da, dize rrai da inarizarrari. Poua uatimadedeniza uati tarrari: —Arra, apa tiquenarro. Arrirrarope ouimecca uima −naui nade Zeso.

₂₃Zotodepa ze quenauiuarrine zeze equidi naza Deoza uati tarrari: —Rrehe Abi Deo, ticca danirri iaza bica taui −naui nade. Nazapa pouadeniza da icanaza ze narizemanarrari. ₂₄Nazapa pouadeniza uati tarrari: —Arrarrari zezepa ouemenecca uima. Deo madirra tezerre rrehe canireuiuarrinecca uima torraniuarrine. Niza oua ozoqqueza ouemene toqquezape narraro rrehe canirenirri parrissa torranitoui. Arri ouemene toccarrarope madirra bazimaza uima bicani torraniuarrine. ₂₅Parrissehera tiadeniza uati onarraro. Arra uva pperrene ze inarraripa ze onapoma-rraraccauitoui. Niza memeuarri Deocca cacauehezana uva pperrene ouaha zatira ze onauitoui −naui nade Zeso.

₂₆Pascoacca rripaqquie rriquezape Deoza rriri quenarrari. Rriri quenaha rricazapa ssono (onini) Rritona quenaui nauarri rraui torremoranirrari. ₂₇Nauiuarri bacco tomoremanazana pouadeniza Zeso uati tarrari: —Tiadeni bazima oua tinebomananitoui. Pina Deo Atti dozo naporrarozape arrima nanitoui: “Niza eueue cacauade zoqquezapa pocca eueue torraribaqquiuitoui.” ₂₈Naraha ouape Deorrine onauatoninitoui. Onauatonizape titezerremadeni zama arobeni Carireauarrina occaninitoui −naui nade Zeso.

₂₉Naraha Pedoro attia: —Bazima tia inebomaneraha ouape tia onebo-rreranitoui −naui nade. ₃₀Nazapa Zeso Pedoroza: —Parrissehera tiaza uati onana: Tiape arrirraro zome tacara uaua naui pama narraraccaza ouaza: “Onocco rriza tani” tanitoui. Zotode naqui: “Onocco rriza tani” tapomanitoui. Zotode naqui nema tapomanitoui −naui nade Zeso. ₃₁Naraha Pedoroa: —Nouerani! Ouape nema onerreranitoui! −naui nade. —Uima oppina teza naqui tiaza “Onocco rriza tani” onerreranitoui. Tiazama ozoqqueniuarrine bica tani −naui nade Pedoro. Zeso uatimadedeni bazima naco attideni nama quenaui nade.

₃₂Nazapa narraro ssonoza aua ppa taui oni Zetisemaniuarri rraui torrarrari. Bacco toquenazapa Zeso attia: —Tiadenipe arriza rrassi tinaccarri. Ouape arriccaza Abi Deoza uati onaccana −naui nade poua uatimadedeniza. ₃₃Nazapa Pedoro, Tiaco, Zouao quenarrarideni rrina inabaqquizapa narraridenina pouaza denima rraui torrarrari. Nauizana Zeso bodi qquezazapa orribote narrari. ₃₄Nazapa pouadeniza: —Obodi ocassera tarrarorrine ouatiabote-te canani. Tiadenipe arriza tibomanaccarri. Tinoccodeni bissaccana −naui nade Zeso.

₃₅Nazapa Zeso tocca-cca naza poua baccouarri namiza pona naza Imehiza uati tarrari: —Abi, arri uima comabotepe ouaza uarri tinanarri. Madirra tocassiuauerauiuarrinecca uima onihi noueraqui? Nouerezape peperri −naui nade. ₃₆Imehiza uati tapomaza naco: —Abi, nauato tinani. Madirra bazimacca uima manaconi narrizoue ouaza torrezape ocasserani ouanitoui. Pina zeze bidabote ze onaniuarrinessa narraro. Narraro onauananiuarrine nacassera oneraha oua nacassa onanicca toui onerrerarraro. Tia nacassa tinaniccana parri. Narrarozana ibora onarraro −naui nade Zeso.

₃₇Nazapa poua uatimadedeniuarri ccanirrari. Bacco nanizapa cauadirrauira qqui tarrari. Nazapa Pedoroza Zeso uaua narrari: —Simao tedarraroqui? Zome nocconi ocarra-rrereraha tinoccodeni bissade tiparriremane-rrerarraroqui? ₃₈Ticauadirra-rreraza Deoza uati tiquenarri, uima oppina tehe torrezape tirraparimaneza uima tinanemana-rreraniuarrine. Tibodidenipe ibora teraha tessiredenina mirrira tarraro −naui nade Zeso.

₃₉Nazapa toccanipomaza pina Imehiza uati tapouissa narrari uati tapomarrari. ₄₀Nazapa poua uatimadedeniuarri ccanipomaraha cauadirrauira qqui inabaqquirrari, uada comani auemanarra naza. Zeso ccaniza nocco toquerrenarrari. Naraha pouaza uati toquenauiuarrine tossamomanarrari. ₄₁Deoza uatide tocanarroranipomarrari, poua uatimadedeniuarri ccanipomazapa: —Tiadenipe ticauadirra zanaponiuarrinequi? Peperri, ouape Madirra Bedi orrarraroa rridapanape oua ccaccoraderrine uimasiri carrimanarrarideni zepedeniza orranitoui −naui nade. ₄₂Nazapa: —Rrina, titememanarri. Arrana, rridapanapa oua ccaccorade ccarronaui −naui nade Zeso.

₄₃Zeso uati uati naccaraha Zoda bacco narronarrari. Zodapa Zeso pocca zozosse tabaqqui 12 quenarrarideniraha. Pouana madirra uapi taha eccarronabaqquirrari. Rrazirecca massito cauidimerani eccarronemana, uauacca eccarronemana narraro. Pouadenipa dada toqquimade taminedenicca zossenirri, zodeodenicca marinarra maridedenicca zossenirri, ime rrocouidenicca zossenirri rrauirronarrari. ₄₄Zodapa Zeso tozepe inanauiuarrine eccarronabaqqui-rraraccazama taminedeniza uati taporrari: —Niza Zeso pano mose onauitoui. Narrarina dama tiquenazapa birri rrore tiquenaza teccanimanana −naporrari nade. ₄₅Nazapa bazima rrauirronaza bacco narronemanarrari. Nanarra Zoda Zesoza touarriressi, pina parrissa pouaza bica tarrarissa naza: —Nirra oua Maride? −nanarra pano mose inarrari. ₄₆Nazapa Zeso dama iquenarrari. ₄₇Naraha Zesocca madirra orrariana massito cauidimera nani zoppa rreo, dada toqquimadedenicca tamine deni torrarraricca zozosse uaribo ca tanerre tarro canarraro.

₄₈Nazapa Zeso pouatoui rrauirronarrarideniza uati tarrari: —Nerrecotoui tiadenipe oua dama tiquenaniuarrine rrazirecca massito cauidimera nanima, uauaccama rraui tirrarronarraro? Nema tiquenezape pina bobotidetoui rraui tirrarronarrarossa narraro. ₄₉Naza tiadenizama uarrirriraza Deoza dada toqquimauarricca ozaza mari mari ohonaneraha oua dama tiquenehe nerrerade. Naraha peperri, narrarope pina arri Deo Atti dozo naporrarossa narraro torraniuarrine −naui nade Zeso.

₅₀Nazapa poua uatimade bazimapa Zeso inebomanaza domo toccarrari. Nazapa Zeso poua motta orrari naha iaccanimanarrari. ₅₁Naraha zabissopa poua teteppezara poua teppe naza Zeso iaccanimanaui natti toccamissarrari. Nazapa Zeso touaccanidedeni poua qqui iquenaza dama iquenaraha ₅₂poua teteppe ssiti, ccororre rroppa tazapa zori tarrari nade.

₅₃Zeso dama iquenazapa dada toqquimadedenicca tamine deni torrarrariuarri iaqquemanarrari. Nazapa nauiza dada toqquimade taminedeni queriqquirrari, ime rrocouideni, zodeodenicca marinarra maridedeni bazima naco nauiza toqueriqqui narrari. ₅₄Naraha Pedoropa uarrima touanamissaza dada toqquimadedenicca tamine deni torrarraricca boroniza bacco tozimarrari. Caipacca zozosse tabaqquidenizama uittarrari. Rrassi nauarraniza zippoza pouadeni zepe da iquenarrari.

₅₅Nazapa dada toqquimade taminedeni, zodeodenicca uima cacattemadedeni deni toquerrenarrarideni tezerre Zesoza uima inassonarimananiuarrine touini quenaza madirraza uati narizemanarrari. Arra madirra attidenipa: —Zesopa icca marinarraza oppina tanicca inanaparra −quenaza taminedeni: —Rrehe, narraro uimaza Zeso zoqqueuiuarrine parrireui −quenaraha uima oppina tanicca bacco iquena-rrerani. ₅₆Madirra uapi taha maizanirri onihi onihi uati toquenaraha poccadeni uimape narrarossa nariza-rrerani. ₅₇Nazapa madirra ouahadeni totememanaza Zesoza poccadeni maizanirri inassonarimanarraro. ₅₈Attidenipa: —Titauaribobo canarri. Zeso atti arrama naui imittade. Poua attia: “Arri Deoza dada toqquimacca ozape madirra icanauatomaneraha ocatabozape uada 3 neza ocanauatoninitoui. Narrarope madirra icanauatomana-rrerani” nade poua atti −quenaui nade. Pouadeni atti nama quenaraha maizemanarrari. Pina Zeso attissa nerrerani. ₅₉Naraha pouadeni pamahacca uima nemanehepe narrarossa nerrerani. Narraro uimaza naqui Zeso inanazoqque-manauiuarrine parrire-rrerani.

₆₀Nazapa dada toqquimadedenicca tamine deni torrarrari totema, ua naza Zesoza uati tarrari: —Tiape tia tecomarraroqui? Tiaza uima inassonarimanarrarope nerrecoma nanerre? −naui nade tamine atti. ₆₁Naraha Zesopa poua cacoma narrari. Nazapa tamine uati nimanipomarrari: —Tiape Cristo-Mesia tirraqui? Deo Bicabote Bedi tirraqui? −naui nade tamine. ₆₂Nazapa Zeso: —Rrehe, nema onarraro −naui nade. —Ouape Madirra Bedi orrarraroa niza zotode Deo Dacorabote oua deni tonanazapa Poua uinori nauatoniuarri ouittarini qqui tiquenanitoui. Niza meme essenima occaronapomani oua qqui tiquenanitoui −naui nade Zeso atti.

₆₃Nanarra dada toqquimadedenicca tamine deni torrarraripa Zeso atti mittaza uati rrami naza pocca etero rroca tanerre sseo narraro. Nazapa bazimaza uati tarrari: —Peperri! Rridapanape pocca uima nauatoqquiri inani. Madirra ouahacca uimatoui uati inerrerana. ₆₄Deo itamassorrari! Pina: “Ouape Deo orrani” narrarissa naua. Poua atti uaidira tani timittemanani. Rrari, tettideni nerrecoma tiquenani? −naui nade Caipa. Naraha bazima: —Rrehe, poua atti nama nazapa zoqquena inarraro! −quenaui nade.

₆₅Nazapa pouaza ppito-to ppito-to canarrari, nocco ssoque iquenazapa idaqquimanarrari. Nazapa attidenia: —Rrari nerrecorrari tia idarrari? Tecomerarro! −quenaui nade. Nazapa dada toqquimauarricca cacauadedeni Zeso pouadeniza torrazapa pouadeni naco Zeso idaqquimanarrari nade.

₆₆Zesopa oza bodiuarri nanarrizo torraraha Pedoropa amossiniuarri boroniza uittarrari. Nezape arri dada toqquimadedenicca tamine deni torrarraricca zozosse zouato ccarronarraro. ₆₇Pedoro zippo rriuade torraui qqui teza icattoma nazapa pouaza uati tarraro: —Tiape Zeso Nazaretiuarricca uatimade tirraderra −nani nade. ₆₈Naraha Pedoro poua namaizarrari: —A, ouape onocco rriza tani. Qqui onarrarade. Narraro uima ssamo onani ouape −naui nade. Naza Pedoropa boroni qqueqquezimauarri toccaza uarrari. Nanarra tacara uaua narrari. ₆₉Naraha taminecca zozossepe Pedoro qqui inapomaza nauiza toqueriqquirrarideniza uati tapomarraro: —Arrarrari maqquiderrepa Zeso uatimadederra −nani nade. ₇₀Naraha Pedoropa poua namaizapomarrari: —Onocco rriza tani −napomaui nade.

Naraha zotodepa nauiza toqueriqquirrari attidenipa: —Parrissade! Tiape Zesocca tirrade. Carireauarricca madirra tirraua −quenaui nade Pedoroza. ₇₁Nazapa Pedoro boquerrari. —Parrissa uati uati onerrerezape Deo oua tinarrizorri, onana. Parrissa tiadeniza uati onarraroa: Pouaza onocco rriza tani. Rridacca narrari tauimari uati tiquenarraro ouape qqui qqui onarraraderra −naui nade Pedoro. ₇₂Nanarra tacara uaua nimanizapa Zeso atti Pedoro bodi uatomanirrari: —Tacara uaua narraraccazapa tetti tinamaizani 3 nanitoui −naporrari. Arra Zeso atti Pedoro bodi uatomanizapa bodi qquezaza orri idimarrari nade.