—Deoza dada toqquimauarricca oza taborizanitoui −narrari Zeso
1Nazapa Deoza dada toqquimaza Zeso qquenazapa poua uatimade orraria attia: —Oua Maride, qqui tanerre! Deoza dada toqquimauarricca oza bazimape siba bicaniza nauatorizani bicaqquiri naua −naui nade poua uatimade. 2Nazapa Zesoa: —Arri oza imeni sibaza nauatorizani bicabote rridapana qqui tineraha niza zotodepe taborizehe rricanissa tanitoui −naui nade Zeso.
Zama rricani touarrireza nauatoqquiri inaniuarrinecca uima
3Nazapa ssono (onini) Rritonauarri quenauiuarri Zeso poua uatimadedeni tezerre rraui torremorarrari. Narraro ssonope Deoza dada toqquimauarri auato tarraro. Nauiza Zeso uittaza Pedoro, Tiaco, Zouao, Adere quenarrarideni pouadenira Zesoza uati toquenarrari: 4—Ia Maride, rridacca uima uati tinarrarope nerrecoma naza torrapazerre? Narraro uima touarrireza nauatoqquiri inaniuarrinepe nerrecora qqui inapopazerre? −quenaui nade.
5Nazapa Zesoa: —Parri, madirra tiadeni tocamaizabaqquirana. 6Niza madirra uapi taha pouama oua oniza maizemanazapa: “Ouape Cristo-Mesia orrani” quequenanauitoui. Nazapa madirra uapi taha icamaizabaqqui-manauitoui. 7Uima onihi naqui: “Rrazire torrarizani” timittemananitoui. Naraha ticappinemana terrerana. Rrazirepe peperri torraponitoui. Naraha zamape rriquerreraccanitoui. 8Nazama madirra zama onihicca, zama onihicca tezerre rrazire inanemana-rizanitoui. Tamine ouahacca madirra, tamine ouahacca madirra tezerre cauadire-rizerauitoui. Nami zarotarizani naqui torrarizanitoui. Pemi naqui carririzanitoui. Narraro ocasserehe taide torraporaha denima ocasserehe torrazanaponitoui −naui nade.
9—Parri, tetideni uatomanarri! Madirra uadiqquiri narrari carririzaui. Narraridenipa tiadeni tadamemanazapa zodeodenicca taminedeniuarri ticcadeni uima mittemanauiuarrine tiadeni touaqquezimabaqqui-manauitoui. Zodeodenicca Deo Atti mamariuarri naqui tiadeni itauaqquemananitoui. Otauimari tiadeniza torrarraro acconi uadimanaza zama cacauadedeni baccodeniza tidomo uaniuarrine tiadeni touaqquezimabaqqui-manauitoui. Zama onihicca zama onihicca madirra tamine deni toquerrenarrari baccodeniuarri naqui tidomo uaniuarrine tiadeni touaqquezimabaqqui-manauitoui. Nanizana ticcadeni uima tecomeremanezape taminedenipa otauimari mittemanauiuarrine. 10Zama rriquerreraccazama otauimari madirra tocassiuauerauiuarrinecca zama bazimaza ecomerarize-manaccanitoui. 11Nazapa taminedeniuarri tiadeni touaqquezima-baqquimanazapa pouadeniza ticcadeni uima tecomeremananiuarrinepe nerrecoma onapazerre? tiquenerrerana. Ticappinemana terrerana, onarraro. Taminedeniza uima uatide nauatoqquiri tiquenaniuarrine Deo Poua Corimena tiadeni acco tocanabaqquiuitoui. Deo Corimerrine tiadeniza uima auato tezape narraro uimara uati tiquenarri. Uati tiquenezape tettideniraha Deo Corimerrinena uati tiquenarraro. 12Naraha narrizouepe tiadenizaha ssonarini orrari nerreranitoui. Arra ouaza rrehe quenarraridenipa otauimariza toquerrenarrarirrine poua ouahadeniraha pouadeniza uadiqquiri nazapa eheccora-baqquimana nauitoui, inarricabaqqui-manauiuarrine. Imehideni naco poua bedideni otauimariza toquerrenarrarirrine bedideniza uadiqquiri nazapa pouadeni bedideni eheccora-baqquimana nauitoui, inarricabaqqui-manauiuarrine. Bedideni naco imehideni otauimariza toquerrenarrarirrine pouadeni imehideniza boqueqquiri nazapa imehideni ihinarricabaqquimana nauitoui. 13Occa madirra tiquerrenarrarorrinepe madirra bazima tiadeniza nacasseraqquiri nauitoui. Naraha tiadenipe dacoco tirrirarri! Narraro uadie tinauanemana-zanapozape tirriqueraha ticassiuaueranitoui. Timadimanaccaza zama rricani bacco tiqueneza naqui ticassiuaueranitoui −naui nade Zeso.
14Zesopa zama rricanicca uima denima mari icanabaqquirrari. (Pocca marinarra ua tiquenezape timittemananissa tarri.) Poua attipa: —Niza zodeo querrena-rrararraridenirrine Deoza dada toqquimauarri oppinabote corime uezazapa toppinanitoui. Nauiza uezauipa bica terrerani. Nezape pouadenirrine icca madirra zodeodenipa icappinaqquimanaza Deoza dada toqquima parri inebomanarinitoui. Narraro uima torrani qqui tiquenezape tiadeni bazima zama Zodeauarri timadirize-manarrarope ssonouarri tidomo toqquemorana. 15Madirra pocca oza amossiniuarri ccarizazapa poua zepetarritoui pocca ozauarri toqquezimani-rrarana. 16Madirra pocca uizarrauarri zepe irrirrari naco parra rroppa tarina. Pocca eterotoui ozauarri ccani-rrarana. Poni! 17Rraho, amonerre rriuemanarrarodeni, bacconideni irrimanarrarodeni naqui rroppa toquenaniuarrine touati nauanaqquiri nanitoui. 18Narraro uima oppinabote torreza tidomo toqquezape ssirini noueraniuarrine Deoza uati uati tizanapomanaporri, onarraro. 19Narraro uima oppina tanicca bacco nezape madirra bazima ocasserani imeni inauanemananitoui. Maittaccazama Deo zama inauatoponipe nema nanicca ocasserehe qqui quenapo-rrerani. Nouerani. Ia naqui qqui inerrerani parri nani. Niza zotode naqui nema napoma-rreranitoui. Noueranitoui. 20Narraro ocasserehe nema zanapozape madirra tossiuauarra canima-rrarauitouiraha narraro ocasserehecca uada Deo arrimani inananitoui. Deo pocca madirra poua icatterriza-baqquirrarideniza uati uana tazapa: “Naniza peperriua, rricana” nauitoui Deo −naui nade Zeso.
21—Nazapa madirra tiadeniza pouama: “Qqui, arrarrariparra ia Idinide Cristo-Mesia” quenaza, madirra ouaha attideni naco: “Qqui, arraccarrarina Cristoparra” quenazapa parrissa tiquenerrerana, onarraro. 22Madirra mamaizadedeni naco tiadeniza rrauirronauitoui. Pouadenipa: “Ouape Cristo-Mesia orrani” quenauitoui. Ouahadeni naco: “Ouape Deocca zossenirri orrani, Poua Atti ouacomeraniuarrine” quenaraha maizemanarrari. Pouadeni bodipa: “Deo icatterriza-baqquirrarideni icamaizabaqquina” quenaza poccadeni maizehe canauatorimana canarizauitoui. Madirra pouadeniza: “Parrissa Deocca zossenirri” quenauiuarrine touini quenaraha Deo Poua icatterriza-baqquirrarideni motapa pouadeniza parrissa quena-rrarauitoui. 23Nazapa parri! Arrirraro uima uati uati onarrarope tetideni rrima-rrerana. Narraro bazimape nizaranibote torraniuarrineraha rridapana tiadeniza uati onarraroparripa −naui nade Zeso.
Zeso ccaronapomauicca uima
24Zesopa uima denima uati uati tarrari: —Naraha ocasserehe inauanemanani nattinipe marri ouiuitoui. Abazico naco ouiui toui. 25Memecca amouadeni naco catorrauitoui. Rridapanapa memecca bazima dacoraqquiri naccaui naraha zotodepa meme zaroro nezape rrenene canauitoui. 26Nazana ouape Madirra Bedi orrarraroa niza meme essenima ocarrimehe occaronapomani madirra bazima qqui toquenauitoui. Occa dacorehe, occa deni torrehe auato tanitoui. 27Nazapa occa zozosse tabaqqui memeuarricca zosse onarizabaqquizapa Deo icatterriza-baqquiporrarideni inequeriqquini-baqquimanauitoui. Zama nemaneheza madirizemanarrarideni bazima arrauarricca, arrauarricca inequeriqquini-baqquimanauitoui −naui nade Zeso.
28—Rrari, aua piquera tauimariza ticauatterarri. Eppe moro nimaniui qqui tiquenezape: “Rrehe, zazarrade torremanini” titiquena narraro. 29Pina narraro uimassa narraro arri zama rricani tauimarini uati uati onarraro qqui tiquenezape: “Rrehe, Zeso ccaniui. Pina icca totoqquezimaza uarrarissa narrari” tiquenana, onarraro. 30Parrissehera tiadeniza uati onarraro: Arri zama rricani tauimarini uati uati onarrarocca madirra zoqquemana-rraraccazama narraro uima uapima torranissa tani qqui toquenaccauitoui. 31Meme, nami naqui rricarizanissa tanitoui. Naraha ouattipe rriquerreranitoui. Arri uati uati onarrarope narrarossa nanitoui −naui nade Zeso.
32—Occaronapomanicca uada, marri naco madirra bazima ssamoqquiri naui. Deocca zozosse tabaqqui memeuarricca naco ssamoqquiri naui. Deo Bedi oua naqui narraro uima ssamo onani. Naraha Abi Deo Pouana nauato taui orrariui −naui nade.
33—Nema nezape tetideni uatonissa tarri. Occaronapomaniuarrinecca uada ssamoqquiri tiqueneraha otoui tinarroremanehe timadimanarri. 34Ouape Madirra Bedi orrarraroa occaronapomanicca uimape pina arrirraro uimassa narraro: Madirrapa zama uarri taniuarri toccauiuarrine rroppemazapa pocca oza ecauemananiuarrine pocca zozosse nauiza inebobaqquirrari. Bazimapa zepedeni irrimanauiuarrine tarabaia onihi onihi carririzemanarrari. Rrinedepa totoqquezima cacauadeza: “Otoui ticattoma canana” nazapa toccarrari. 35Oza cacauadedeni bazimapa rrinede ccaniuicca uada ssamoqquiri nazapa narroremanaha madimanarrari. “Marri toccaza ccaniuitide, zome nocconi nitide, tacara uaua naza uitide, ssiuarreza nitide” quenarrari. Tiadeni naqui occaronapomanicca uadatoui tinarroremanehe timadimanarri, onarraro. 36Arrana, rridacca oza cacauadedeni rrinedetoui narroremana-rrarazapa naza cauadirraza bacco naninarra. Tiadeni naqui oua occaronapomezape tinarroremane-rreraza bacco onanirana. 37Nezape tiadeniza ouattipe arrima onarraro: Occaronapomanicca uadatoui tinarroremanehe timadimanarri. Madirra bazima naco nama quenana, onarraro −naui nade Zeso.
