Maraco 10

₁Zeso oza panani Capenaoza nebozapa zama arobeni Zodeauarri toccarrari. Ueni Zorodao rrippeuarri toccazapa zama arobeni Pereauarri bacco tarrari. Nauizapa madirra sibema pouaza queriqquipomazapa mari icanabaqquirrari. Zesopa nama nanariza narrari. ₂Nauizapa zodeodeni mota marinarra parizeoza rrehe quenarrarideni Zesoza nacasseraqquiri naza pocca marinarra inassamomananiuarrine uima narroremanarrari. Zesoza touarriressimanazapa pouaza uati toquenarrari: —Arra maqquiderre pocca amonerre inebozape pouaza uima noueraqui? −quenaui nade.

₃Nazapa Zeso attia: —Rrari, tecomeremanarri: Maittaccazama Moizepa narraro uima mari icanabaqquiporraride. Pocca marinarra nerrecoma natte? −naui nade. ₄Nazapa parizeodeni attidenipa: —Rrehe Moizecca marinarrape arrima nade: “Maqquiderrepa pocca amonerre ineboniuarrinepe nebouecca papeo dozo ineza poniza da ineza inebozape pouaza uima nouerani” naderra −quenaui nade.

₅Nazapa Zeso uati tarrari: —Rrehe naraha narrarope maittaccazama ticcadeni idideni uaribodeni didiqquiri naza neboue toui quenazapa Moize narraro marinarra pouadeniza dozo inarrarode. ₆Naraha Deo zama inauatoponipe amonerre nebo nebocca uima noueraccade. Deorrine madirra toquerrenapozapa uima arrima narraro:

₁₀Nazapa Zeso poua uatimadedeni tezerre ozauarri rrauinipomaza oza bodiuarri rrassi zazapa Zesoza uati toquenarrari: —Ticca marinarra nerrecoma narraro? −quenaui nade. ₁₁Nazapa Zeso pouadeniza uima ecomerarraro: —Rrehe maqquiderre pocca amonerre ineboza amonerre onihira icarrizape pocca amonerre taide ineborraroza uimasiri inanarraro. Nama nazapa Deocca zossenirri ecaue-rrerarraro. ₁₂Amonerre naqui ponicca maqqui ineboza ouahara icarrizapa ponicca maqqui taide ineborrariza uimasiri inanarraro. Nema nezape Deocca zossenirri ecaue-rrerarraro −naui nade Zeso.

₁₃Nazapa madirra poccadeni erredeni Zesoza eccarronabaqqui-manarrari —Zeso tatideni bara inabaqquiza Deoza uati tauiuarrine −quenaza. Naraha Zeso uatimadedeni attidenia: —Erredenipa poua! Zesouarri teccarronabaqquimana tarrararro! −quenaui nade. ₁₄Naraha Zesopa poua uatimadedeni erredeni tezerremadeni uacossemanaui qqui tazapa boquerrari. —Poni, nema tiquenerrerarri! Pouadeni rrauirronana, onarraro. Eccarronabaqqui-manauiuarrine tecossemana terrerarri. Madirrapa pina arrarrari erredenidenissa quenarrarina Deocca cacaueheza toquerrenauitoui. ₁₅Parrissehera tiadeniza uati onana: Madirrapa poua bodicca rrehenirri pina erredenicca rrehenirrissa narrarazapa Deocca cacaueheza torra-rrarauitoui –naui nade Zeso.

₁₆Nazapa Zeso erredeni idi, zorro irrizaza tatiza bara naza uati tarrari: —Abi Deo, ticca biquehe arrarrari erredeniza tinanarri, onarraro −naui nade. Erredeni ouahadeni naco nama inanabaqqui-rizarrari.

₁₇Naui zotodepa Zeso rraui toccaza pouauarri madirra orraria rroppa narronarrari. Zeso baccouarri poua pitoza uitta naza uati tarrari: —Nirra, Mamaride bicaui nerrecoma oneza camittehe rriquerreranicca bacco onaniuarrine? −naui nade. ₁₈Naraha Zesopa: —Nerrecotoui ouaza: “Mamaride bicaui” tarraro? Madirra bicaui noueraui. Deona bica taui orrariui. ₁₉Naraha camittehe rriquerreranicca ticarriniuarrinepe Deocca zossenirri Moize dozo inarrarocca nauato tinani. Narraro bazima tecauanissa taqui? Deocca zossenirripe arrima narraro: “Madirra tinanazoqque-rrararro. Madirra ouahacca amonerre tirra terrerarri. Tiboti terrerarri. Maizeheza naqui madirraza ponima uima tinauana terrerarri. Madirra ticamaiza tarrararro” nani Deocca zossenirri. Pocca zossenirri onihi naqui: “Ticca abi, ticca amiza bica tineza tinamadibaqquiuissa tarro” nani Deocca zossenirri Moize dozo inarraro −naui nade Zeso.

₂₀Naraha Zeso baccoza uittarrari attipa: —Mamaride, narraro marinarra bazimape zabisso orrapozama ouacauarronarrarode −naui nade. ₂₁Nazapa Zeso icattoma nanarra pouaza uati touanaui naza uati tarrari: —Naraha uima orrarie tiaza zori taccani. Ticcaniza tizepetarri manaconiza rridi tinarizarro. Nani narraro zinirope madirra touati nauanaqquiri narrarideniza da tinabaqquiniuarrine. Nema tinanezape niza memeuarri Deocca biquehe tiaza torranitoui. “Nema onana” tezape ouazara damera tinarri −naui nade Zeso.

₂₂Narraro uima mittazapa pano tozaui narrari. —Rrehe, nema onana −narrararrari. Poua zepetarritoui, pocca zinirotoui uati uana tarrari. Pouapa zepe sse tarra nazapa bodi ocassera taha toccanirrari.

₂₃Nazapa Zeso cattauarraniui naza poua uatimadedeniza uati tarrari: —A, madirra zepedeni sseqquiri narraridenipa Deocca cacaueheza toquerrenauiuarrine narro tani! −naui nade. ₂₄Nema narraro uima poua uatimadedeni mittemanaza uarro canirerrari. Nazapa Zeso uati nimanipomarrari: —Rraho, otessedeni, madirra Deocca cacaueheza toquerrenauiuarrine narro tani, onarraro. ₂₅Pina bani imehibote cameropa etero ssessequi odiniza toqqueqquimauiuarrine parrire-rrerarrarissa narrari madirra zepe sse tarraripa Deocca cacaueheza torrauiuarrine ssamo tani −naui nade.

₂₆Nazapa Zeso poua uatimadedeni narraro uima mittemanaza bodideni uarro quenazapa uati tocanirere canarrari: —Rraho, madirra tocassiuauerauiuarrinepa ssamo tani. Nerrecorrarina tossiuauapazarra? −quenaui nade. ₂₇Nazapa Zeso pouadeni icattabaqqui naza uati tarrari: —Madirrapa ssamoqquiri naraha Deozape ssamo terrerani. Pouarrinena madirra tocassiuauerauitoui −naui nade Zeso.

₂₈Naraha Pedoropa Zesoza uati tarrari: —Ia Maride, iape tiaza rrauirrarizaniuarrinepe icca oza, icca madirra, bazima ineborizabaqquide −naui nade.

₂₉Manaco Zeso atti: —Parrissehera tiadeniza uati onana: Madirra oua acco canauiuarrinepa pocca oza icanebo, poua imecote inebobaqqui, pocca ami, abi inebobaqqui, pocca erredeni inebobaqqui, pocca zama inebo nezape otauimari madirra tocassiuauerauiuarrinecca torrarizaniuarrine zepe irririzarrari. ₃₀Nazapa niza zotode bazima poua ineborizarrarossa nehe Deo pouaza da inarizazapa carripomauitoui. Rridapana arrirraro namiza poua madiccaza uemani carriuitoui. Pouaza pina pocca oza touapirrarossa nanitoui. Poua imecotedeni naco touapirizauitoui, pouaza pocca amissa narraro carririzanitoui. Erredeni ouahadeni pina pocca erredeni toquerrenarrarissa narizauitoui. Zama naqui pina pocca zamassa narraro pouaza torrarizanitoui. Naraha otauimari pouaza torrarrarorrine pouaza narrizoue ssonarinitoui. Nema nanitouiraha niza zama zati torrezape camittehe rriquerreraniccaza madi-zanapouitoui. Parrissa −naui nade Zeso.

₃₁—Naraha rridapana tiadenipe arrimani tiquerreneraha arrirraro uimaza tibodideni uatomanarri: Madirra rridapana madimanarrarideni motapa deni toquerrenaraha nizaranibotepa arramani toquerrenauitoui. Rridapana madimanarrarideni mota arramani toquerrenarrarideni naco nizaranibotepa deni toquerrenauitoui −naui nade Zeso.

₃₂Zeso pocca madirrama Zerozarecca rraui rraui torrazapa pouana taide torrazanaporrari. Pocca zozosse tabaqquipa poua nattiuarri rraui torrarrari. Zeso zoqqueuiuarrine noppine cappinemanaza uatideni uatoto cazanaporrari. Madirra ouahadeni pouadeni nattiuarricca rraui torramissarrari naco cappinemanarrari. Nazapa pocca zozosse tabaqqui 12 quenarrari pouadenira uaua inabaqquiza pouaza queriqquirrari. Nazapa rraui rraui torraza pouaza uima torraniuarrinecca uati uati zanaporrari. ₃₃Zeso attipa: —Zerozareuarri rrauirremorarrarope nauatoqquiri tiquenani. Ouape Madirra Bedi orrarraroa niza Zerozare bacco inezape dada toqquimade taminedeni, zodeodenicca marinarra maridedeni quenarrarideni zepedeniza orranitoui. Ouaza: “Zoqquena, zoqquena” quenauitoui. Zotodepe madirra ouaha zodeo querrena-rrararrarideniza oua da iquenanitoui, onarraro. ₃₄Narraridenina oua rrarra icanaqquimanarraro, oua ppito inaqquimanarraro, oua cossi inaqquimanarraro nanitoui. Nezape aua porimacossaniza oua inanazoqque-maneza oua ppa izemananitoui. Neraha uada pama torrari neza onauatoninitoui −naui nade Zeso atti.

₃₅Nazapa Zebedeo bedideni Tiaco, Zouao tezerrepa Zesouarri touarriressimanaza uati toquenarrari: —Ia Maride ettiza rrehe taqui? Icca uatinarrassa tinananiuarrine, inarraro −quenaui nade. ₃₆Manaco pouadeniza: —Nerreco uimara tiadeniza onananiuarrine? −naui nade Zeso. ₃₇Nazapa pouadenia: —Ticca cacauehe bicaniuarri madirra cacauade tittarizape tinoriza ipamariniuarrine ouape tinori nauatoniuarri ouittari, ocotepa tinori ssamouarri uittari inaniuarrine rrehe taqui? −quenaui nade Zesoza.

₃₈Naraha pouadeniza Zesoa: —A, narraro uimape ssamomo tinani. Ouape ocasserani ouabote nani. Ouaza narrizoue ssonarinitoui. Arri tiadenipe narrizoue tinauanemananiuarrine tiparriremanaqui? −naui nade. ₃₉—Rrehe, ia naqui iparrireni −quenaui nade. Nazapa pouadeniza Zesoa: —Rrehe, parrissa ocasserani tinauanemananitoui. Arri oua narrizoue onauanezape tiadeni naqui niza zotode narrizoue tinauanemananitoui. ₄₀Naraha memeuarri occa cacaueheza madirra cacauade ouazama pamariuiuarrinepa oua zosse zosse onerrerani. Abi Deo icatterriza-baqquirraridenina ouinoriza pamariuiuarrine −naui nade Zeso.

₄₁Naraha Zeso uatimade mota 10 quenarraridenipa narraro uima uimahaha canaui mittemanazapa Tiaco Zouaodeniza uadimanarrari. ₄₂Nazapa Zeso ua inabaqquiza pouaza toqueriqquizapa pouadeniza uati tarrari: —Tiadenipe madirra ouaha zodeo querrena-rrararraridenicca madie nauatoqquiri tiquenani. Poccadeni taminedenipa zossede dacoraqquiri naza poccadeni madirra zosse zosse quequenanarrari. Deni toquerrenarrari ouahadeni naco poccadeni madirra dacoreheza ehecauabaqquimana narrari. ₄₃Naraha arri ouaza tiquerrenarrarope nema tiquenaniuarrine bica terrerani. Naraha titessedeni orrariapa: “Ouana deni orrana” nazapa pouana bazima birrideni acco icanarizabaqquiuiuarrinena bica tani. ₄₄Deocca cacaueheza deni tirraniuarrinepe titesse birrideni acco ticanarizarro, pina poccadeni zozosse tirrarrarossa taniuarrine. ₄₅Arri oua Madirra Bedi orrarrarope madirra zosse zosse onaniuarrine occarrona-rrerarraro. Madirra acco ocanabaqquiuiuarrinena occarronarraro. Madirra poccadeni uimasiri manaconi pouadeniza ssonari-rreraniuarrine poccadeni uimasiri manaconipe ouana oua ouaccoranitoui −naui nade Zeso.

₄₆Nazapa Zeso poua uatimadedeni tezerre oza Zericoza bacco toquenarrari. Nauiza toqqueqquimazapa poua uatimadedeni, madirra ouahadeni naco uapi taha pouaza rraui torrarrari. Nani rraui inidizapa nocco siri uiuitta narrari. Pouapa Timeo bedi, onipa Bartimeo. Poua zepe da tocanaza: —Ouaza ziniro da tiquenarri −tatacossa narrari. ₄₇Narraria —Zeso Nazaretiuarricca toqqueqquimaui −quenaui uima mittazapa Zesoza uaua narrari: —Zeso, Dabi Potemaui! Ouaza teti uana tarri onaua! −narrari.

₄₈Naraha madirra motadenipa: —Poni! Zamarrima tarri! −quenaui nade. Nama quenaraha denima parra uaua tariui uaua tariui narrari: —Tamine Dabi Potemaui! Ouaza teti uana tarri! −napomaui nade.

₄₉Nama nazapa Zeso uaha taui naza —Rrari, uaua tarronemanarro. Ccarronana −naui nade. Nazapa nocco siriza uaua quenarrari: —Rrehe, bica tani! Titemarri, tiaza uaua naui −quenaui nade. ₅₀Nanarra poua teteppe ssiti, totemaui, Zesouarri toqquessirrari.

₅₁Nazapa Zesoa: —Nerrecora tiaza onananiuarrine? −naui nade. Nazapa nocco siripa: —Oua Maride, onocco ssire tinanarri, onarraro −naui nade. ₅₂Nazapa Zeso: —Peperri. Ticcanirri. Tibodi ouaza parrissa tezape tinomini −narrari. Nazapa Zesorrine amazati poua nocco ssire tarrari. Zerozarecca rraui Zeso denima toccazapa Bartimeo naco pouaza toccarrari.