Maraco 11

₁Nazapa Zeso, poua uatimadedeni, madirra bazima tezerredeni rraui torrarrari. Oza panani Zerozareuarri touarriremanazapa ssono onini Rritonaza rraui torremorarrari. Narraro ssonoza oza capamema narraro pamehe anirraro, oninidenipe Betapaque, Betania narraro. Narraro oza pameheza bacco toquenabote naza Zeso poua uatimade pamahaza uati tarrari: ₂—Rrari, arricca oza capamema naniuarri ticadaporri. Naniuarripe borro namizaza napizati ssoque zanaha uaui. Narrari borropa ideza madirra uittari-rraraccaui. Narrari dicca tiquenaza teccanimanarro −naui nade Zeso. ₃—Naraha tiadeniza madirra attipa: “Nerrecotoui borro dicca tiquenarrari?” nazapa pouaza uati tiquenana: “Ia Zozossede arrarrari borro toui nazaparra. Niza eccaniuitoui” tiquenana −naui nade Zeso.

₄Nazapa touedanarra, rrauiza borropa ssoque zanaui bacco iquenarrari, oza uarrira taniza. Nazapa borro dicca iquenarrari. ₅Nanarra nauicca madirra domodeni uarrari attideni: —Nerrecotoui borro dicca tiquenarrari? −quenaui nade. ₆Naraha manaco pouadeni cacomeremanarrari: —Ia Zozossede toui nazaparra −quenaui nade. Nazapa rrehe quenaza eccanimanarrari.

₇Nazapa borro eccanimanarrari… Zesouarri bacco nanimanazapa poccadeni etero uapicca motararraro ssiti iqueneza borro ideza bina quenaza nauiza Zeso uittarirrari. ₈Nazapa madirra uapi taha Zesoza uatizemanaza poua tezerrema rraui bina izanapomanarraro, pouaza: —Deni tirrani −quenauiuarrine. Nazapa rrauiza pouadeni teteppicca namiza ua izanapomanani nade. Madirra ouahadenipa birirrari eppe uamonicca ca ippimanaza ua izanapomanaui nade. Nazapa Zeso rraui bina tani motta toccazanaporrari. ₉Madirra bazima poua tezerrema rraui torrarra, poua nattiuarri rrauirronarra zanapomanarrari. Pouaza uatizemanaza uaua uaua zanapomanarrari: —Nirra, Deopa deni torraui, deni torraui! Ia Zozossede onima ccarronarrariza biquehera torrana, torrana! −zanapomanarrari. ₁₀—Pouapa icca idi tamine Dabi Potemaui bicabote! Ia Cacauade torrauiuarrine ccarronaui! Bica taui, bica taui! Memeuarri Deoza madimanarrarideni pouaza: “Deni tirrani!” quenana, quenana! −zanapomanaui nade.

₁₁Nazapa Zeso Zerozareza bacco tozimaza Deoza dada toqquimauarri toccarrari. Nauiuarri toqquezimazapa qqui narizauissa tarrari. Qqui narizaha rricazapa marri toccarrari. Nazapa Zeso pocca zozosse tabaqqui 12 quenarrari tezerre Betaniauarri rraui torranirrari, bacco tanimanaui nade.

₁₂Uada ssiuarra naui Betaniaza Zeso toccapomazapa pemirrari. ₁₃Nazapa uarri taniza aua piquera eppe carripomaui qqui taza: —Bono naco carriuitide −naui nade. Naraha naui bacco tazapa eppe pouara qqui tarrari. Piquera eppe carrizapa bobono narrariraha bono-rraraccaui. Poua bonouicca abazico bacco tocana-rraraccarrari. ₁₄Nazapa Zeso aua piqueraza uati tarrari: —A, paparra! Rridapanape tibono madirra rripemanapoma-rrarauitoui. Nouerauitoui! −naui nade Zeso. Nauiza poua uatimadedeni mittemanarrari.

₁₅Nazapa Zeso Zerozareuarri tocanarroranipomaza Deoza dada toqquimauarri toqquezimani-pomarrari. Narraro ozacca boroniza madirra bani bedi Deoza da tauiuarrinecca dade toquerrenaui qqui tarrari. Manaconitoui dadadedeni qqui inabaqquizapa bazima moua ininebaqquirrari. Mimittadedeni naco moua ininebaqquirrari. Ziniro cacarriqquimeradedenicca uauanari naqui ua inarizarraro. Ococo dadadedenicca uiuittari naqui ua inarizarraro. ₁₆Madirra ouahadeni naco narraro ozacca boroni motta tozepetarri zorro zorro ihiqquimemana nerreraniuarrine Zeso ecossarraro nade. ₁₇Nazapa Zeso bazima mari icanabaqquirrari: —Deo Atti dozo naniza arrima narraro: “Occa ozape ouaza uati uati toquenauiuarrinecca oza tocarranitoui. Zama bazimacca madirra ouaza uatide rrarrauizima nauiuarrine” naponi nade Deo Atti dozo naniza. Naraha tiadenipe madirra titicamaiza-baqquimana naza tirrinedenia pina bobotidedenicca quequeriqqui ozassa ticananemanarraro −naui nade Zeso.

₁₈Naraha dada toqquimade taminedeni, zodeodenicca marinarra maridedeni tezerre narraro uima mittemanazapa Zesoza nacasseraqquiri narrari. Madirra bazimapa Zesocca marinarratoui dameraqquiri nazapa taminedeni, mamaridedeni tezerre Zeso deni torraui noppine cappinemanarrari. —Zesopa deni torraza arrimani iquerrenerana −quenaza Zeso zoqqueuiuarrine rrara rrara quenarrari: —Nerrecoma inanaza Zeso inanazoqqueuiuarrine? −quenarrari nade. ₁₉Naraha toziziza Zesopa pocca zozosse tabaqqui tezerre Zerozareza rraui torrenarrari.

₂₀Nazapa uada ssiuarra izamassa aua piquera uauiuarri rraui torrapomarrari. Qqui toquenapomazapa rraboma boterrari. ₂₁Nazapa Pedoro bodi uatomaza Zesoza uati tarrari: —Oua Maride, qqui tanarra! Maitta piquera tettiza tinarrizorraripa boteua −naui nade.

₂₂Naraha Zeso pouadeniza uati tarrari: —Tibodideniza: “Deopa occa uatinarrassa inananiuarrine parrireui” tiquenarri. ₂₃Parrissehera tiadeniza uati onarraro: Madirrapa arrirraro ssonoza uati taza: “Ssono, titemeza ueni imehiza rraro tizanarri” nazapa ssono nema nanitoui. Pouapa rrehe nauissa taza poua bodi: “Parrissa torrapazerre? Noueranitide” narrarazapa Deorrine ssono rraro zananitoui, onarraro. ₂₄Narraroa ouatti: Deoza uati tiquenezape tibodideniza: “Rrehe, Deopa nema inananiuarrine parrireui” tiquenezape ticcadeni uatinarra Deorrine narrarossa inananitoui, onarraro −naui nade Zeso.

₂₅—Deoza uatide tiquerreneza naqui madirra tiadeniza uima inanaporrarotoui tibodideni uatozape: “Narraro uimaza ouati rrimana. Pouaza ouadi-rrerana” tiquenarri, onarraro. Nema tiquenezana ticcadeni Abi Deo memeuarri madirraripa ticcadeni uimasiriza uati rramauitoui. ₂₆Naraha tibodideni narrariza peperri tiquenerrerezape ticcadeni Abi Deo memeuarri madirraripa ticcadeni uimasiri peperri inana-rreranitoui, onarraro −naui nade Zeso.

₂₇Naui zotodepa Zerozareuarri bacco tanimanapomarrari. Nazapa Deoza dada toqquimauarri Zeso toqquezimazapa pouaza nacasseraqquiri narrarideni arra dada toqquimade taminedeni, zodeodenicca marinarra maridedeni, zodeodeni ime rrocouideni quenaza Zesoza touarriressimanarrari. ₂₈Nazapa pouaza uati toquenarrari: —Iaza ticca uima tecomerarri. Nerrecorraricca dacorehe ticarrirraro? Nerrecorrari attiza dadadedeni moua tininebaqquirrari? −quenaui nade.

₂₉Naraha manaco Zeso pouadeniza uati tarrari: —Oua naqui tiadeniza uati onana, tecomeremananiuarrine. Ouaza tecomeremanezape oua zossede oni, occa dacorehe tauimarini tiadeniza uati onaniuarrine. ₃₀Rrari, Zouaopa nerrecorrari icazosseza passo dopaniza niqui izanabaqquirraritta? Deorrine ttarana, madirrarrine ttarana? Rrari, ouaza tecomeremanarri −naui nade Zeso.

₃₁Naraha taminedenipa pouadenira uati tocanirere canarrari: —Rraho “Zouaocca passo dopaniza niquinarrape Deocca zossenirri” inezape Zesopa: “Nerrecotoui pouaza rrehe tiquenerrerarrarotte?” nauitoui iaza −quenaui nade. ₃₂—Naraha “Zouaocca passo dopaniza niquinarrape madirracca zossenirri” inezape madirra iaza uadimanarana. Arra madirra bazima attidenipa: “Zouaopa Deo icazosserrari. Parrissa Deo Atti cacomerabote” quequenanade −quenarrari taminedeni, madirradeni noppine cappinemanaza. ₃₃Nama quenanarra Zesoza: —Ssamoqquiri inani −quenaui nade.

Nazapa Zesoa: —Oua naqui oua zossede onipa tiadeniza ouacomera-rraraui −naui nade pouadeniza.