Mateo 12

₁Nezape zotode naqui rrassinarracca uada bacco teza Zeso, pocca zozosse tabaqqui tezerre uizarra nocconi rrauirreqquimeza ipemizape arroi rrizaza tirico bono qqui inarrari. Dize ippirizaza zorro zorro icarrizeri naza pore siqui apa pore siqui apa inade. ₂Naraha zodeodeni mota marinarra parizeoza rrehe quenarraridenipa ia qqui toquenaza Zesoza attidenipa: —Arrana! Rrassinarracca uadazape izepe irriniuarrine oppina teraha ticca zozosse tabaqquipa tirico bono dize ippirizemanazapa pina rrassinarracca uada rrerarraroza zepedeni irrimanarrarissa quenaua −quenade.

₃Nazapa Zeso pouadeniza uati tarrari: —Neraha tiadenipe arri Deo Atti maittaccazama dozo naniccaza Dabicca uima ua ua titiquena neraha tetideni rrimemanarrarorane? Narraro uimape Dabipa poua tessedeni tezerre pemimanazapa pao Deoza da tauicca oppina taraha rripemanarrari. ₄Deoza dada toqquimauarri toqquezimaza cacauadeza pao toui uati tarrari. Pao ouaha noueraza Deoza da tauiccaraha Dabi rriparrari, poua tessedeniza naco da inabaqquiza rripemanarrari. Narrari pao Deoza da tauipa dada toqquima cacauadedenira rrirripemana narrariraha Dabideni pemimanaza rripemanarrari oppinera taui −narrari Zeso. ₅—Nazama Moizecca marinarraza naqui dada toqquima cacauade tauimarideni ua ua titiquena neraha tetideni rrimemanarrarorane? Arri, maittaccazama Moizecca marinarrape: Rrassinarracca uadaza dada toqquima cacauadedenipa zepedeni irrimanaraha pouadeniza narraro uadape oppinera tani, napoui nade Moize. ₆Neraha tiadeniza ouattipe: Arri Deoza dada toqquimacca ozape deni torranicca torraccade. Neraha rridapana arra, tiadeniza madirraripa Abi Deorrine pouana deni torrarrari. Rridapanana Deoza dada toqquimacca ozape pouaza arrimani torrarraro. Narrari deni torrarrari onarrarope ouaparri −nade Zeso. ₇—Maittaccazama Deo Atti cacomerabote Ozea dozo inaporrarope:

₉Nauiza Zeso toccazapa Deo Atti mamariuarri toqquezimarraride. ₁₀Nazapa nauiuarricca madirra zepe siri naco nauiza uittarirrari. Naza parizeodenipa Zesoza uati toquenarrari: —Nirra, Moizecca marinarraza, icca madirracca marinarraza naqui rrassinarracca uadaza madirra coma tarrari inanomiuiuarrine oppinera taqui? Narrarope pina rrassinarracca uada rrerarraroza izepe irrirrarossa neraha −quenarrari. Pouadeni bodipa: —Rridapana rrassinarracca uadaza arrarrari zepe siri inanomizapa Zesoza uima inauananiuarrine −quenarrari.

₁₁Naraha Zesopa: —Rrari! Manaco ouatti tecomeremanarri. Arrina, pina ticcadeni eueue uitide. Rrassinarracca uadazaraha ticcadeni eueue odiza tossonizimazapa tidinimana-rraraco? Tidinimanauitoui! onarraro. ₁₂Naraha ticcadeni eueuepa tiadeniza bica tarraraco? Eueuepa bica taui. Neraha ia madirrape denima bicaqquiri inarraro. Nezape rrassinarracca uadaza eueueza bica inanani oppinera tezape madirraza naqui bica inanabaqquiuiuarrine oppinera tani, onarraro −nade Zeso.

₁₃Nazapa madirra zepe siriza Zeso attipa: —Rrari, tizepe ouauarri da ticanarronarri −nade. Nanarra poua zepe pouauarri da icanezape zepe tocanomirraro. Pina poua zepe onihissa canimanirraro. ₁₄Naraha parizeodenipa zotode nauizapa rraui torreninezapa uimahaha canarrari: —Nerrecoma inanaza Zeso inanazoqqueuiuarrine? −quenarrari. Nazapa narraro uima uati toquenauiuarrine queriqquimanarrari quenade.

₁₅Zesopa poua inanazoqque-manauiuarrine touini quenaui nauato tazapa Deo Atti mamariuarri neboza toccarrari. Ia pocca zozosse tabaqqui ia naqui uarri taniuarri rrauirrarraro. Nazapa pouaza madirra uapi taha rrauirronazapa comaqquiri narrarideni bazima inanomibaqquirrari. ₁₆Naraha inanomibaqquizapa pouadeniza uati tarrari: —Tiadeni onanomibaqquirraro tecomemanana. Arra madirra bazimaza otauimari uati tarizemana terrerarri, onarraro −nade Zeso. ₁₇Nazama Zesocca uimape pina maittaccazama Deorrine Poua Atti cacomerabote Izaia dozo inaporrarossa narraro:

₂₂Nazapa madirra poua bodiza Tocorime-Taminecca zozosse tocorime madizarrari. Narrarirrine nocco siri, ebeno siri nazapa qqui tarrararrari, atti naco cappiraha madirrari. Poua tessedenipa Zesouarri eccarronemanarrari. Nazama Zesopa poua bodicca zosse ininezapa tonomirrari. Qqui tapomarrari, atti naco carripomarrari. ₂₃Nazapa nauiuarricca madirra bazima narraro qqui toquenazapa: —A, bica taui. Zesopa nauato taui! −quenarrari. Attideni naco: —Arrarrari Zesopa, tamine Dabi Potemauico? Arra ia Idinide, pouatoui imadirraro ccaronarrarico? −quenarrari.

₂₄Naraha parizeodeni narraro uima mittemanaza maizemanaza attidenia: —Arrana, Zesopa tocorimedenicca tamine Beheosebocca dacorehe carrirrarirrinea pocca zozosse tabaqqui zosse ininebaqquirrariparra −quenarrari.

₂₅Naraha Zesopa pouadeni bodi nauato tarrari. Bodideni uatomanauiuarrine pouadeniza arrirraro uima uati uati tarrari: —Zama uapimacca taminepa madirra ecauabaqquiraha zotode pocca madirra cauadiremanaza arrauarri atti arrauarri atti quenazapa pocca cacauehe inassamomanarraro. Nazapa pocca madirra domo tocca taui. Narrarossa narraro oza pananicca madirra cauadirezapa torraribaqqui taui. Uima onihi naqui narrarossa narraro madirra orraria pocca ozacca madirra cauadirezapa poccadeni uima tossamonitoui. ₂₆Uima narrarossa narraroa Tocorime-Taminepa pocca zozosse tabaqqui madirra bodiza madizemanarrarideni zosse ininebaqquizapa pina poua pocca madirra tezerre cauadirerrarissa narrari. Nama nazapa pocca zossehe inassamozape zarra tabaqquiuitouiraha. Nazapa pocca zozosse madirra bodicca zosse inineuiuarrine touini taco? Touini narraraui. Arri ouaza tettidenipe: “Tocorime-Taminecca dacoreheza pocca zozosse zosse tininerrari” tiqueneraha narrarope parrissa rrerani. Rridacca narraro parrissa torrezape Tocorime-Tamine poua pocca zozosse tabaqqui inarraribaqqui-rizauitouiraha. ₂₇Arrina, ouaza: “Beheosebocca dacorehe ticarrini” tiqueneraha ticcadeni mamari tabaqqui naco Tocorime-Taminecca zozosse tabaqqui zosse zosse ihininebaqquimana narrari. Naraha pouadenipa nerrecorraricca dacoreheza nama quenarrari? Arra ticcadeni mamari tabaqquipa dacorehe carrimanazapa Tocorime-Taminecca zozosse tabaqqui zosse ininebaqqui-manaraha pouadeniza: “Beheosebocca dacorehe ticarrimanani” tiquenattaqui? Nema tiquenerrerani, onarraro. Nazama nerrecotoui ouaza nema tiquenarraro? Tibodidenipe carrimama canarraro −nade Zeso. ₂₈—Neraha ouape Deo Corimecca dacorehe ocarrirre narraro Tocorime-Taminecca zozosse tabaqqui zosse zosse ohoninebaqquiriza narrari. Nema onezape tiadeniza auato onanarraro: rridapana Deocca cacauehe tiadeniza bacco narronarraroparri, onarraro −nade Zeso.

₂₉—Nazama Tocorime-Taminepa dacorehe carriraha ouape deni orrarraro. Pouapa arramani pina arrirraro uima tiadeniza uati onabote narrarossa narraro. Nazama bobotidepa: “Ozacca tozepetarri obotina” narrariraha oza rrinede dacorabote ozaza madizazapa botiuiuarrine parrire-rraraui. Naraha bobotide denima dacorazapa oza rrinede dama inaza rrore inaqquizapa poua zepetarri botiuiuarrine parrireui. Uima narrarossa narraroa arri oua pina bobotide denima dacorarrarissa onarraro. Occa dacorehe deni torrezape pina Tocorime-Tamine rrore onaqquirrarissa naza pocca zozosse tabaqqui zosse zosse ohoninebaqqui narrariparra −nade Zeso.

₃₀Nazapa Zeso denima uati uati tarrari: —Nazama madirra ouaza torra-rrarazapa oua uauadide torrarrari. Poua naco madirra ouaza toquerrenauiuarrine pouadeni acco icanabaqqui-rraraza pouarrine ouaza touarrimanarrari, onarraro −nade Zeso. ₃₁—Nama nazapa tiadeniza ouattipe: Madirra uimasiri inanemaneraha niza zotode: “Icca uima inebona” quenazapa poccadeni uimasiri, poccadeni tamassohe Deoza ecomeremaneza Deopa poccadeni uimasiri uapima peperri inananitoui. Naraha Deo Corime itamassomanaza, pouarrine torrarraroza maizehe uaua quenaza naco Deopa pouadeni atti uati rrama-rrarauitoui. Poccadeni uimasiri peperri inana-rreranitoui −nade Zeso. ₃₂—Arri oua Madirra Bedi orrarraroza madirra atti atti quenaza oua itamassomaneraha niza zotode: “Icca uima inebona” quenazapa poccadeni uimasiri, poccadeni tamassohe Deoza ecomeremaneza Deopa poccadeni uimasiri peperri inananitoui. Naraha Deo Corime itamassomanaza pouarrine torrarraroza maizehe uaua quenaza naco Deopa pouadeni atti uati rrama-rrarauitoui. Rridapana imadiccazama poccadeni uimasiri peperri inana-rreranitoui. Niza zotode Deo pocca cacauehe torreza naqui peperri inana-rreranitoui, onarraro −nade Zeso.

₃₃Nazama Zesopa auacca uimaza mari icanabaqquiuiuarrine uati uati tarrari: —Aua bicaui ppa taza tecauauissa tazapa bono bica taha caua taui. Naraha aua ppa taza tecaua-rrarazapa bono uaidira taha caua taui. Nazama aua bazima bono carririzazapa bono bicaui carriui nauato inezape: “Narrari auapa bica taui” inarraro. Bono uaidira taui carriui nauato inezape: “Narrari auapa uaidira taui” inarraro. ₃₄Rraho, maizaqquiri tiquenani. Tebenodenipe pina macca ebenossa tiquenarraro. Tibodideni uaidiraqquiri nezape uima uaidira tarrarozara tebenodeniza atti atti titiquena narraro. Arra madirra bazimapa pouadeni bodiza uima carri tezape narraro uimara uati uati totoquena narrari. ₃₅Nazama madirra bica tarraripa poua bodiza uima bicani ecauezape uima bicanira uati uati tatarra nauitoui. Naraha madirra bica tarrararraripa poua bodiza uima uaidira tani ecauezape uima uaidira taniccara uati uati tatarra nauitoui. ₃₆Nazama tiadeniza uati onarraro: Uima ponimacca uati uati tiquenezape niza madirra bazimacca uima cattemaniuarrinecca uada bacco teza Deo Poua baccouarri tidomodeni uezape arri uima ponimacca uati uati tiquenaporrarocca bazima zori terre canima-rreranitoui, onarraro. Deopa tiadeniza: “Rrari, ouaza ticcadeni uima tecomeremanarri. Nerrecotoui tettideni nema nema titiquena narraro?” nauitoui. ₃₇Nazama pina rridacca auacca uima uati onarrarossa narraro arri tettideni uapima Deo nattome inezape touatti uaidira tanicca ticarrimanezape Deopa: “Uaidira tinani. Tia onarrizona” nauitoui. Neraha tettideni bica tanicca ticarrimanezape Deopa: “Bica tinani. Tia ocatizena” nauitoui, onarraro −nade Zeso.

₃₈Naraha Zeso atti mittemanazapa zodeodenicca marinarra maridedeni mota, marinarra parizeoza rrehe quenarrarideni mota naco Zesoza uati toquenarrari: —Rrari Mamaride, parrissa Deocca dacorehe ticarrizape memeuarricca nauatohe bicabote auato tinanarri. Qqui inana, inarraro −quenade.

₃₉Naraha Zesopa pouadeniza uati tarrari: —Rridapana timadimanarrarodeni uaidiraqquiri tiquenehe timadimanarraro. Taidepe tettideni: “Deocca iquerrenani” tiqueneraha zotodepe Poua Atti tinebomanarraro. Arri ocanauatoriri cananiuarrine touira uati tiqueneraha occa nauatohe onauatona onerrerani. Neraha ocanauatoriri cananicca uima orrariena qqui tiquenanitoui. Narrarope Deo Atti cacomerabote Zonacca uimassa narraro. ₄₀Narraroa arri Zona pina uatiarrarissa naza aba imehi bodiza uada pama torrari nehe madizarrarissa narrari arri oua Madirra Bedi orrarrarope niza ouatiheza nami bodiuarri uada pama torrari nehe omadinitoui. Pina Zonacca uimassa narraro ouaza torranitoui −nade Zeso. ₄₁—Nezape niza madirra bazimacca uima cattemaniuarrinecca uada bacco tezape Deo poua baccouarri tidomodeni uanitoui. Nauizapa oza panani Ninibiuarri madimanarraridenipa ticcadeni uima tiadeniza inassonarimananiuarrine uati toquenauitoui: “Iape Zonacca uima imitteza ibodi cacarriqquimerade. Naraha tiadenizapa Deo Atti cacomerabote deni torrarrari madiraha poua atti mittade iboqquiri tiquenarraro. Nema tiquenezape Deo tiadeni touattarro-baqquizapa bica tani, inarraro” quenauitoui Ninibicca madirra −nade Zeso. ₄₂—Narraro uadaza zama Sebauarricca tamine amonerre madirraro naqui ticcadeni uima tiadeniza inassonariniuarrine uati tanitoui. Poni attinipe: “Ouape zama uarri taniuarri omadiraha tamine Saromaocca nauatohe omittaniuarrine occarronade. Naraha tiadeniza madirraripa denima nauato taraha poua atti mittade iboqquiri tiquenarraro. Nema tiquenezape Deo tiadeni touattarro-baqquizapa bica tani, onarraro” nanitoui Sebauarricca tamine amonerre attinipe −nade Zeso.

₄₃Zesopa uima onihiza mari icanabaqquirrari. Poua attipa: —Nazama tocorime orraria madirra bodiza madizaraha qquenazapa toccarrari. Arri zama uamo taniuarri, passo noueraniuarri poua madiuiuarrine qquide toccaza qqui qqui narizaraha poua madiuiuarrine bacco tarrararrari. ₄₄Nazapa: “Rrehe, occa mamadi boteuarri occanipomana” narrari tocorime atti. Nazapa ccanipomarrari. Bacco naniza madirra poua bodi touissoni qqui tazapa pina oza rroue tocanehe uisso tocanarrarossa neraha tomadirarraro. ₄₅Nazapa tocorime toccapomaza poua tessedeni tocorime 7 quenaha rrina inanibaqquirrari. Narraridenipa denima uaidiraqquiri naraha poua tezerre rraui torrezimarrari, madimanauiuarrine. Nazama uima nema narraro madirraza torrezape pocca madie uaidira taporaha zotodepe denima touaidirarraro. Tiadeniza narrarossa narraro torranitoui. Rridapana uaidiraqquiri tiquenehe timadimanarrarodeni otauimariza parrissa tiquenerrerezape ticcadeni madie denima touaidiranitoui −nade Zeso.

₄₆Rrehe, Zesopa madirraza uatide torraraha amossiniuarripa Zeso imeni, poua imecotedeni tezerre: —Zesoza uati inana −quenaza pouatoui domo uarrari. ₄₇Naza Zesoza madirra orraria attipa: —Ticca ami, timecotedeni amossiniza domo uaparra. “Tiaza uati inana” quenarrari −narrari.

₄₈Naraha pouaza uati tarrariza Zeso attipa: —Occa amipe nerrecorrarona parri? Ouimecotedeni naco nerrecorraridenina parra? −nade. ₄₉Arri, ia pocca zozosse tabaqquideni ia zopi tabaqquiza Zeso attipa: —Arrarraridenina pina occa amissa, pina ouimecotedenissa quenarrari, onarraro. ₅₀Madirradenipa occa Abi Deo memeuarri madirrari Poua touini nauicca ihinanemana narrarodenina pina ouimecotedenissa quenarrari. Amonerredeni naqui Deo Poua nacassa tauicca ihinanemana narrarodenina pina occa amissa, pina ouimecotedenissa quenarrari, onarraro −nade Zeso.