Zouao Batista pocca zozosse tabaqqui tauimarideni
1Zeso pocca zozosse tabaqqui 12 inarraro poua tauimari maride iquerrenarizaniuarrine ia mari tocanabaqquia rricazapa madirra bazima mari icanabaqqui-rizauiuarrine ia bazima rrauirrarrarode. Zeso naco iazama toccarraride. Narraro zama arobeni onini Carireauarricca oza panani onihi, onihiuarri, oza capamema narraro onihi, onihi naniuarri Deo Atti ehecomerariza narrarode.
2Nazama Zouao Batistapa toponi cocoro tozimaza uezaraha madirra attideni: —Cristo-Mesiapa canauatori canaui −quenaui uima mittarrari. Mittazapa pocca zozosse tabaqqui Zesoza uati toquenauiuarrine zosse inabaqquirrari. 3Nazapa iauarri rrauirronaza bacco narronemanazapa Zesoza uati toquenarraride: —Ia maride Zouaopa tiaza uatide ia zosse narronabaqquirrari. Poua attipa: “Tiape arra toui imadirraro Cristo-Mesia tirraqui? Ouahatoui imadiccaniuarrinerane?” nade Zouao atti −quenade.
4Nazapa Zouao zosse inarronabaqquirrarideniza Zeso poua cacomerarrari: —Rrehe, ticadaniza Zouaoza uati tinanimanarri. Arri qqui tiquenarraro, arri timittemanarraro pouaza uati tinanimanana −nade Zeso. 5—Arrima tiquenana: “Madirra nocco sirideni nocco ssire tocanireui. Madirra isso sirideni naco tocanomireza rrauirizaui. Madirra zamacoma onini leprarrine uapideni rrazimarorrarideni naco imedeni tobicarizaui. Madirra uaribodeni didiqquiri narrarideni naco uaribodeni ssire tocanirerizaui. Madirra uatiarrarideni naco camittemani-rizemanaui, madirra touati nauanaqquiri narrarideni naco icassiuaueraniuarrinecca uima mari icanabaqquimanaza mittarizemanaui” tinanimanana tiadeni marideza −nade Zeso. 6—Arra madirra mota attidenipa: “Zesopa Cristo-Mesia rraraui, pocca uimape onihi, Cristo-Mesiacca uimassa nerrerani” quenaraha madirra mota nama quena-rrararrari attidenipa: “Parrissa Zesopa icca Mesia” quenaza pouadenizana Deo pocca biquehe inananitoui. Arrirraro uima bazima Zouaoza uati tinanimanana −nade Zeso atti.
7Nazapa Zouao zosse inarronabaqquirrarideni touedaniui natti Zesopa pouaza queriqquimanarrarideniza Zouao tauimari uati tarrari: —Nazama zama uamoni ssono carri, siba carri taniuarripe nerreco qquidera rrarraui tirra narrarotte? Arra madirra pocca uima rrapari tarraro pina boba rrorroderrine rrene rrene canarrarissa narrari nama narrari qquide rrarraui tirra narrarotterane? Naraha Zouao Batistapa pocca uima rrapari terrerade. 8Uamoniuarri rrarraui tirra nezape nerreco qquidera rrarraui tirra narrarotte? Arra madirra etero uatini ccara tanicca uezarrari qquide rrarraui tirra narrarottarane? Neraha tiadenipe nauatoqquiri tiquenani: Madirra etero uatini ccara tanicca oro tozimemanarraridenipa taminedenicca ozazana mamadimana narrari. 9Nazapa nerrecotouira naniuarri rrarraui tirra narrarotte? Deo Atti cacomerabotecca marinarra mittade rrarraui tirra narrarottaqui? Rrehe parrissa! Pocca marinarratoui rrarraui tirra narraroa. Zouaopa pina Deo Atti cacomeraqquiri narraridenissa naraha pouapa deni torrarrari. Poua zepe irrirraripa uima deni torranicca carrirrari. Narraro uimape otauimari Cristo-Mesia tiadeni Idinide orrarraroparri. Narraro uima inanarrora-rizaporraroparri. 10Arra, Zouao Batistapa maittaccazama poua tezerremacca uima Deo Atti cacomerabote Maraquia dozo inaporraro. Narrarope pina Deopa Cristo-Mesiaza uati taporrarissa narraro:
“Taide titauimari touaccade madirra orraria titezerrema zosse onapouitoui. Naui mittemanaza madirra bodidenipa titoui narroremanapouiuarrine, pina tirrauine narroremanaporrarossa inanemananitoui, onarraro”
napoui nade Deo Atti −nade Zeso atti. 11—Nazama parrissehera tiadeniza uati onarraro: Arri namiza madimanarizarrarideniza naco madirra ouaha pina Zouao Batistassa narrari noueraui. Zouao Batista pouarrinena madirra bodideni otauimaritoui Deocca cacauehecca uima zati inanarrorabaqquiporrari. Narrarorrine Zouaopa namiza madimanarizarrarideni bazimaza deni torrarrari. Naraha niza zotode madirrapa Deocca cacauehecca uima zati torrani qqui toquenaza narraroza toquerrenazapa pouadenipa Zouao Batistaza deni toquerrenauitoui. Madirra arramani torrarrari pina touati nauana tarrari poua naco Deocca cacaueheza torrazapa poua naco Zouao Batistaza deni torrauitoui −nade Zeso.
12—Rrehe, Deocca cacauehecca uima zati madirraza torraniuarrine Zouao Batistapa taide mari mari narronaporrari. Rridapana oua naqui maride nema onarronarraroa arrirraroparri. Naraha madirrapa Deocca cacauehecca uimaza nacasseraqquiri naza pouadenirrine narrizoue ssonari ssonari narronarraroparri. Rricaniuarrine dameraqquiri naraha parriremana-rraraui. 13Maittaccazama Deo Atti cacomeraqquiri narrarideni Moizecca marinarraza naco Deo Atti ecomeremanerre narronaponi narraroa arra Zouaoparra. Bazima Deocca cacauehecca uima naqui mari mari nanarronemana narrari −nade Zeso. 14—Nazama arrirraro uima timittemananiuarrine tiparriremanezape: “Rrehe, parrissa” tiquenarri. Narraro uimape Zouaopa pina Deo Atti cacomerabote niza ccarronauitoui quequenanarraripa Eriassa narrari. (Arri Deo Atti dozo nanizape: “Niza Ouatti cacomerabote onipa Eria tiadeniza zosse onauitoui” napoui nade Deo.) 15Nazama teribodeni ticarrimanezape ouatti timittemananissa tarri, onarraro −nade Zeso.
16—Naraha rridapanana arra madirra madirizemanarraridenipa pina nerrecorraridenissa quenarrari? −nade. Nazapa pocca marinarra mittemanauissa tauiuarrine arrirraro namiza imadinicca uimaza mari icanabaqquirrari. Poua attipa: —Rrehe, madirra rridapana madirizemanarraridenipa pina erredenideni boroniza rrassi taza poccadeni ittome tossamoza arrauarri rroua, arrauarri rroua quenarrarissa narrari, onarraro. 17Pouadenipa pouadeni tessedeniza: “Rraho, ssene tiquenaniuarrine totoriza tori tori ineraha tetizemana-rrerani, ssene ssene tiquenerrerani” quenarrari. “Ittomeza naqui tiadeni orri inanabaqquiniuarrine arrie touati nauana taniccaza rriri rriri ineraha tiadenipe orri tiquenehe nerrerani” quenarrari. 18Rrehe, arra madirra rridapana madimanarraridenipa pina erredeni rramimanarrarissa quenaui onarrarope Zouao Batista madiza Deo Atti cacomerade torrazapa erretecca rripaqquiecca rrirripa rripa-rraraui. Erretecca zeze ze narraraui. Naza rroua rroua quenaza attidenipa: “Zouao Batistacca madie rriza tani. Poua bodiza Tocorime-Taminecca zozosse tocorime madizarrari uitiderra!” quequenanarrari. 19Nani zotode oua Madirra Bedi orrarraroa erretecca rripaqquiecca rrirripa orripa, zeze ze onazapa ouaza rroua rroua quenarrari attidenipa: “Rraho, madirraza rripa narizarride raui, zezerride raui. Rromanodenicca taminecca zossenirri ziniro nanaccadedeniza ccarizarrari. Madirra uimasiri carrimanarrari tezerre naco ccarizarride raui” quequenanarrari ouaza. Attidenipa Zouaoza, ouaza nama quenaraha niza uimasiri carrimanarraridenipa ettiza iboraqquiri naza bodideni cacarriqquimera, uimarideni cacarriqquimera nazapa Deocca nauatohe, pocca parrissehe auato tanitoui −nade Zeso.
Iboqquiri narraridenicca uima
20Zesopa oza panani onihi onihi narizarrarocca madirra poccadeni iboue tauimarini uati tarrari. Poccadeni oza pananiuarri Zeso poua canauatori canauicca denima inauatorizaraha bodideni cacarriqquimere-manaha narrarazapa poccadeni uimasiriza paparra quena-rrararrari. 21Poua attipa: —Rraho, oza panani Corasinauarri timadimanarrarodenipe narrizoue oppina tanicca tiadeniza ssonarinitoui. Rraho, oza panani Besaidauarri timadimanarrarodeni naqui narrizoue oppina tanicca tiadeniza ssonarinitoui. Arrina, ticcadeni oza pananiuarri ocanauatori canani qqui qqui tiqueneraha tibodideni cacarriqquimerehe nerrerade. Neraha maittaccazama oza panani Tirouarri madimanaporraridenipa uaidiraqquiri narrari, arri oza panani Sidouarri madimanaporrarideni naco uaidiraqquiri narrari pouadeni bazimapa ocanauatori canani qqui toquenapo-rrararrari. Rridacca qqui toquenazapa Deoza toquerrenauiuarrine narromana-rrarauitouiraha. Poccadeni uimasirirrine bodideni ocassera tazapa etero rriza tanicca uezemanaza zippocca tabarroconi pouadeni tatiza uira uira quenaza orri orri quenauitouiraha −nade Zeso. 22—Naraha arri Corasinauarri timadimanarraro tiadeniza, Besaidauarri timadimanarraro tiadeniza naqui ouattipe: Niza madirra bazimacca uima cattemaniuarrinecca uada bacco teza Deo Poua baccouarri tidomodeni uezape Tirouarri madimanarrarideniza Deo pocca narrizoue arrimani torranitoui. Sidouarri madimanarrarideniza naco arrimani torranitoui. Neraha tiadenizana Deo pocca narrizoue denima oppina tanitoui −nade Zeso.
23—Rraho, oza panani Capenaouarri timadimanarrarodeni naqui narrizoue oppina tanicca tiadeniza ssonarinitoui. Deo memeuarri madirrariza bacco tiqueneza tiadeniza Poua Attipa: “Rrehe, tiadenipe bicaqquiri tiquenani” napazarra? Nama narrarauitoui! Ticcadeni ibouerrinepe nami odini uarri tani rricaqquini noueraniuarri tiadeni ua tozimauitoui. Arrina, ticcadeni oza pananiuarri ocanauatori canani qqui qqui tiqueneraha tibodideni cacarriqquimerehe nerrerade. Neraha maittaccazama oza panani Sodomauarri madimanaporraridenipa uimasiri sseqquiri naza Deorrine memeuarricca zippo siba carrimani ppocorarraroza oza, madirra bazima rricarrari. Naraha pouadenipa ocanauatori canani qqui toquenapo-rrararrari. Rridacca qqui toquenazapa pouadeni bodideni cacarriqquimere-manaza Deo pouadeni inarrica-rrarauitouiraha. Rridapana Sodomazape madirra madimanaui parra naccauitouiraha −nade Zeso. 24—Neraha arri Capenaouarri timadimanarraro tiadeniza ouattipe: Niza zama rriqueza uapima uimarideni icattemarizaniuarrine Deo Poua baccouarri domo uazapa Sodomauarri madimanarrarideniza Deo pocca narrizoue arrimani torranitoui. Neraha tiadenizana Deo pocca narrizoue denima oppina tanitoui −nade Zeso.
Zesopa Imehiza uati tarrari
25Naui zotode Zesopa Imehiza uati tarrari: —Rrehe Abi, Tiaza ouatizerraro. Tiape memeuarri madimanarrarideni Cacauade tirra, namiuarri madimanarrarideni Cacauade tirra narraro. Rrehe, madirra nauatoqquiri narraridenipa arrirraro zamacca uima tocauatteraraha Tiazapa nacasseraqquiri narrari. Nazama tirrinepe ticca parrissehecca uima mittemana-rrarauiuarrine pouadeniza auatora tinanarraro. Naraha madirra motadenipa: “Iape ssamomo inarraro, pina erredeni bedissa inarraro” quequenanarraridenizana ticca uima parrissehecca auato tinanarraro. 26Rrehe, Abi parrissa. Tia nacassa tinezape tirrine nema tinanarrarode −nade Zeso.
27Nazapa Zeso iaza uati tapomarrari: —Occa Abipa ouaza pocca nauatohe uapima inanarizarraro. Occa Abina poua motta ouaza nauato taui orrari narrari. Occa Abipa nazama Poua orrari naha ouaza nauato taha nama narronarrari. Ouape Abi Deocca Erredeni orrani. Oua naqui nezama. Oua orrari onehe Pouaza nauato onarronarraro. Nezama oua Deo Bedi orrezape madirradeni ouaza toquerrenarraripa pouadeniza nacassa onezape orrine pouadenipa Deo Pouaza noccodeni torrizerauitoui −nade Zeso.
Ticcadeni uimarrine rrao tiquerrenezape Zesozara tiquerrenarri
28—Nazama uima ccanarrani temanezape pina ccanarrabote rrore tiquenaza rrao tiquerrenarrarossa nezape ouauarrira rraui tirrarronarri. Otauimariza parrissa tiquenezape tibodideni rrassi onanabaqquinitoui. 29Occa marinarra tiadeniza torraniuarrinepe ouaza tiadeni teccoremanarri, ouaza iboraqquiri tiquenaniuarrine, onarraro. Ouaza ticauatterarri. Tiadeni Maride ouape rrone onani, bica onani. Tibodideni onabicabaqquinitoui. 30Occa marinarra tiadeniza torraniuarrinepe orrine parrirenissa tani. Ouaza parrissa tiquenezape pina ppaua taniccassa nani −nade Zeso.
