Roca 17

₁Nazapa Zeso pocca zozosse tabaqquiza uati tarrari: —Arri namiza timadimanarrarope uima tinanemananiuarrine carri tani. Parri, nema narraroza uimasiri tinanemana tani. Naraha madirrarrine uimasiri tinanemanezape pouaza uima denima oppina tanicca ssonarinitoui. Madirra nama narraripa Deona inarrizouitoui. ₂Nazama madirra orrariarrine ouaza rrehe quenarrari uimasiri inanemanezape pouaza narrizoue oppina tanicca ssonarinitoui. Erredeni ouaza rrehe quenarrarideni naco madirra uimasiri mamariderrine uimasiri tocauatterazapa arra uimasiri mamaride pouaza narrizoue oppina tanicca ssonarinitoui. Pina arrirraro uimassa narraro: Siba ccanarrabote poua mattoza ssoque zaneza ueni imehiuarri rre tauiuarrine cco tozippazapa oppina taraha narrizoue denima oppina tanicca pouaza ssonarinitoui. ₃Parri! Tiadenipe tiadeni tecauemananissa tarri, uimasiri tinanemana-rreraniuarrine −narrari Zeso.

—Nazama timecote ouaza rrehe narrari tiaza uimasiri inanezape manaco mouaraza poua uati ticanarro: “Ouaza tirrine uima bica terrerani” tana. Nazapa poua cacomerazapa: “Rrehe, tiaza nema onade. Orrine bica terrerani. Rridapanape nema onapoma-rreranitoui” nazapa manaco pouaza: “Rrehe, peperriua, tiaza ouadi-rrerani” tana, onarraro. ₄Nazapa timecote ouaza rrehe narrari tiaza uaidirehe inanarraro. Zotode tiaza uimasiri inanapomarraro. Zotode naqui tiaza uaidirehe inanapomarraro. Nama zanaporaha pocca uimasiri rricani nattinipe poua atti tiaza: “Peperri, orrine tiaza bica terrerani. Rridapanape nema onapoma-rreranitoui” nazapa manaco pouaza tettipe: “Rrehe, peperriua, tiaza boque-onerrerani” tarri, onarraro. Uada orrarieza nama zanaporrari 7 nehe bacco taraha nema nehe pocca uimasiriza peperri tizanaporri, onarraro −narrari Zeso.

₅Nazapa Zesoza pocca zozosse tabaqquipa uati toquenarrari: —Ia Zozossede, icca rrehenirri Deoza todacorani naniuarrine iaza denima tinanarri −quenarrari.

₆Nazapa manaco ia Zozossede pouadeniza uati tarrari: —Ticcadeni rrehenirri bazira tehe pina mostada nocco bazira tarrarissa nehe ticarrimanezape ssamo tanicca tinanemananiuarrine tiparriremananitoui. Pina arrirraro auaza uati tiqueneza: “Aua, tia motta rreo tineza ueni imehi inidizana tia ppa tizana” tiquenezape aua tettideniza ibora tanitouiraha −narrari Zeso.

₇—Madirracca tatarabaiade tarabaiauarri ccaccani naza poua zossede attipa nerrecoma napazarra? Pina uizarra ppade ccaniza, pina eueue cacauade ccaniza nazapa poua zossede: “Rrehe, arriza tittariza tirriparri” napazarra? Nama narrarauitoui pocca tatarabaiadeza. ₈Poua zossede attipa arrama nauitiderra: “Ouaza zamatapa ppe taza, orripaniuarrine tinarroraza rrirripa ua tarirro. Niza ouarrari rricani nattinina manaco tirripaniuarrine” nauitoui −narrari Zeso. ₉—Nazapa tatarabaiade poua zossede attissa inaneza poua zossede attipa: “Rrehe, tirrine bica tani” napazarra? Nama narrarauitoui. Narrarope pocca tarabaia peperri. ₁₀Nazama tiadeni naqui Deocca zossenirri tecauemananissa tezape tettideni: “Peperri, narrarope ia icca izepe irrie” titiquena nana. “Iape deni iquerrene-rrerani. Ia zossedecca tatarabaiade iquerrenani” titiquena nana −narrari Zeso.

₁₁Nazapa Zeso pocca bobodeza Zerozareuarri toccarrari. Zama arobeni onini Samaria, zama arobeni onihi onini Carirea tazarrani rricaqquiniuarri ccarizarrari. ₁₂Nazapa naniuarricca oza capamema nauiuarri Zeso bacco tarrari. Nauizapa madirra 10 quenarrari zamacoma onini leprarrine uapideni rrazimanaui madimanarrari. Nazapa Zesouarri rraui torrarrari, pouaza uarrirri taza domo ua narrari. ₁₃Rrazirema pouaza uaua quenarrari: —Zeso, ia Zozossede, iaza teti uana tarri! −quenarrari.

₁₄Nazapa Zeso pouadeni qqui inabaqquizapa pouadeniza uati tarrari: —Deoza dada toqquimadedeniuarri rraui tirrezimeza pouadeniza tepideni noue tiquenarri −narrari. Nazapa pouadeni uapi nouede rraui rraui torraninarra tocanomirerrari.

₁₅Nazapa orraria poua uapi tobicaui qqui tazapa dozonirrari. Uatizeza rrazirema: —Deopa bica taui, bica taui! −nanirrari. ₁₆Zesoza bacco nanizapa —Rrehe bica tinani −nauiuarrine Zeso baccouarri poua pitoza uitta, tocatteza naza pano namiza bacco tarraro. Nazama arra madirra dozonirraripa zama Samariacca. ₁₇Nazapa Zeso uati tarrari: —Naraha arra madirra 10 quenarraripa tocanomire-rraraco? Tocanomireraha mota 9 quenarraridenipa nerrecouarri? −narrari Zeso. ₁₈—Arrarraripa icca madirra zodeo rrararaha pouapa dozoniza Deoza uatizenirrari. Motapa Deoza: “Rrehe, tirrine icanomireni bica tani” nanimana-rraraui −narrari Zeso.

₁₉Nazapa pouaza Zeso uati tarrari: —Titemeza ticcanirri. “Rrehe, Deo oua tonanomiui parrireui” tezape tinomirraro −narrari Zeso.

₂₀Nazapa marinarra parizeoza rrehe quenarrarideni Zesoza uati toquenarrari: —Nerrecoma naza Deocca cacauehe torrapazerre? −quenarrari. Naraha Zeso pouadeniza uati tarrari: —Deocca cacauehepe auatora tani, inoccoza qqui inerrerani. ₂₁Madirrapa: “Qqui tarri, Deocca cacauehe arriza bacco nani, arriccaza bacco tani” quena-rrarauitoui. Deocca cacauehepe rridapana tiadeniza torrarizani −narrari Zeso.

₂₂Zotodepa pocca zozosse tabaqquiza uati tarrari: —Ouape Madirra Bedi orrarraroa niza occaronapomanicca uada bacco tani touini tiquenezape: “Rraho, narraro uada qqui inaccaraho” tiqueneraha noueraccanitoui. ₂₃Naraha madirra tiadeniza maizemanazapa arrama quenauitoui: “Qqui tiquenarro, Cristo-Mesia arraza bacco naniui, arraccaza bacco naniui” quequenanauitoui. Naraha madirra attideni nama quenazapa: “Rrina qqui inana” tiquena terrerana. Poni! ₂₄Ouape Madirra Bedi orrarraroa occaronapomanicca uada bacco tezape auato tanitoui. Pina ssissiuede memeza ssiue neza meme nemanehe tossiuarrabaqquirrarossa nanitoui. ₂₅Naraha ouape Madirra Bedi orrarraroa taide uima onihi, onihi narraro ocasserani onauanaponitoui. Rridapana madirra madimanarrarideni naco oua ettarromanaponitoui −narrari Zeso.

₂₆—Ouape Madirra Bedi orrarraroa niza occaronapomezape pina maittaccazama Noe madipoza ppani ccarronarrarocca uimassa nanitoui. ₂₇Madirradenipa rrirripemana narrari, ze ze quenarrari, uena uena canarrari. Nama quequenanaporraria arra Noe pocca oza imenibote tocataboniuarrineccaza toqquezimauicca uada bacco tarraroparri. Naraha madirra motapa ssamoqquiri naza ppani bacco narronazapa bazima rre tocanireza rricarrari. ₂₈Zotode Abarahaocca erredeni ouaha Ro oza panani Sodomauarri madiza naco pina arri Noe madipouicca uimassa napomarraro. Madirradenipa rrirripemana narrari, ze ze quenarrari, tozepetarri mitta mitta quenarrari, poccadeni zamatapa da da iquenarrari, poccadeni uizarra ppa ppa quenarrari, poccadeni oza ihinauatomana narraro. ₂₉Naraha Ropa Sodomaza neboza rroppa taraha narraro uadaza Deorrine memeuarricca rrororoni enxofre carrimani Sodomauarri catorrezape madirra bazima rricarrari. ₃₀Rrehe, ouape Madirra Bedi orrarraroa occaronapomanicca uada naqui narrarossa nanitoui. Pina Noe madipozassa, pina Ro madipozassa narraro. Niza zotode arrirraro namiza rrizera onanipomeza madirra mota otoui narroremana-rrararraridenipa rricauitoui −narrari Zeso.

₃₁—Nazama narraro uada bacco tezape madirra pocca oza amossiniuarri ccarizazapa poua zepetarritoui pocca ozauarri toqquezimani-rrarana. Madirra ouaha pocca uizarrauarri zepe irrirrari naco pocca ozauarri toccani-rrarana. ₃₂Arri Rocca amonerrecca uima tetideni rrimemana-rrerana. Poniza Deo Attipa: “Tinattiuarripe qqui tani terrerana” naraha poni nattiniuarri qqui nanizape siba torrarraro. ₃₃Madirrapa pocca madie Deoza acco taza arrirraro namiza madizanapouiuarrine touinira nazapa zoqqueuitoui. Zoqquezapa camittehe rriquerreranicca carri-rrarauitoui. Naraha madirrapa pocca madie Deoza eccorezape poua inanazoqque-manaraha camittehe rriquerreranicca carrizanapouitoui −narrari Zeso.

₃₄—Rrehe, niza occaronapomaniuarrine uima arrima nanitoui: Madirra pamaha zome uauadaza cauadirraraha orraria otoui narroraporrarina iaccamacossaniuitoui. Naraha ouahapa otoui narrora-rrarazapa inebouitoui. ₃₅Amonerre pamehe dodoza dode toquerrenarraro naqui. Orrarie otoui narroraporrarona iaccamacossani-nitoui. Neraha onihipe otoui narrore-rrerezape inebonitoui. ₃₆Maqquiderre pamaha uizarrauarri zepedeni irrimanarrari naco. Orraria otoui narroraporrarina iaccamacossaniuitoui. Naraha ouahapa otoui narrora-rrarazapa inebouitoui −narrari Zeso.

₃₇Narraro uima Zeso uati uati taha rricazapa pocca zozosse tabaqqui pouaza uati toquenarrari: —Ia Zozossede, arrirraro uimape nerrecoma nanizana torrapazerre? −quenarrari. Naraha Zeso poua cacomerarrari: —Abariza toqueriqquiniza bani uatiaui ponaui nauatoqquiri tiquenarraro. Pina narraro uimassa narraro occaronapomezape madirra bazima nauatoqquiri nauitoui −narrari Zeso.