Roca 16

₁Nazapa Zeso pocca zozosse tabaqquiza arrirraro namiza imadinicca uima onihiza uati tarrari: —Rrehe, madirra zepe ssebotepa poua carrirraricca bazima poua birri accode orraria ecauarraro. Naraha poua birri accodepa poua pouarrine pocca cacauehe tossamorraro. Nazapa madirra ouahadenia zepe sseboteza uati toquenarrari: “Tibirri accodepa ticca ziniro ponima inarricarraro” quenarrari. ₂Nazapa zepe ssebote poua birri accodeza uaua naza uati icanarrari: “Nirra, ticca uima ouaza uati toquenarrari. Ponima occa ziniro tinarricani quenaui uima omittani. Ticca cacauehe nerrecoma tinanarraro? Ouaza ticca cacauehecca dozo nani bazima tinarroreza ouaza da tanirri, onarraro. Nazama tiape denima tecauarri onerrerani” narrari pouaza.

₃—Nazapa arra poua birri accodepa pouara bodi uatorrari: “Rridapanape nerrecoma onapazerre? Oua zossede ouaza nacassera tazapa ozepe irriniuarrine nouerezape ocappiranitoui” narrari. “Uizarra ppa onaniuarrinepe oparrire-rrerani. Madirradenicca ziniro manaconi rrirehe mitta onaniuarrine naqui cappina onani. ₄Pina arrima onana. Oua zossedeza dirri quenarraridenicca dirrinarra arrimani onanarizana. Nazana ouaza uatizemanaza niza tarabaia ocappirezape arri uima onarroraporrarorrine ouaza: ‘Arri occa ozaza timadirri’ quenauitoui” narrari poua bodiza.

₅—Nazapa poua zossedeza dirri quenarraridenitoui uaua narrari. Orraria ua ccarrona, orraria ua ccarrona narrari. Nazapa taide ccarronaporrariza uati tarrari: “Oua zossedeza dirri tani nerrecoma natte?” narrari. ₆Nazapa uati tarrari: “Aua rritona bono oquine rrorrori imeni 100 nehe dirri onarraroderra” narrari. Nazapa zepe ssebote birri accode attipa: “Arri ticca conta dozo nani tiaza da onanina. Arriza uassinarra tittariza ticca conta 50ʼra dozo tarri” narrari. ₇Nazapa zotodeccaza naco uati tarrari: “Tia naqui oua zossedeza nerrecoma nehe dirri tarrarotte?” narrari. Naraha poua attipa: “Arroi rrizaza tirico saco 100 naha dirri onarraroderra” narrari. Nazapa pouaza uati tarrari: “Arri ticca conta dozo nani tiaza da onanina. Arriza uassinarra tittariza 80ʼra dozo tarri” narrari. Nama nama narrari dirri quenarrarideni bazimaza.

₈—Naraha zepe ssebotepa poua birri accoderrine pouaza dirri quenarraridenicca dirrinarra arrimani inanarizani uima mittazapa poua attia: “Rrehe, obirri accodepa poua tezerremacca uima maizeheza narrorapouiuarrine bodi nauato tarrari” narrari. Rrehe uimape nema narraro. Madirrapa pouadeni tessedeniza maizemanauiuarrine bodideni nanarroremanapo narrari. Naraha Deocca madirrapa pouadeni tessedeniza maizemanauiuarrine narroremanapouiuarrine ssamoqquiri naui −narrari Zeso.

₉—Tiadeniza uati onarraro: Arrirraro namicca ticarrimanarraroccaza madirra acco ticanabaqquimanarro. Nema tiquenezape titessedeni touapiuitoui. Niza zotode Deo madiuiuarricca mamadi rriquerreraniccaza timadimanezape ticcadeni accorehe manaconipe Deo pocca biquehena tiadeniza inanarizanitoui.

₁₀—Madirrapa cacauanirri bazira tehe ecaueza maiza-rrarazapa niza zotode cacauanirri deni torranicca ecauaniuarrine “Bica taui” quenauitoui. Naraha cacauanirri bazira tehe ecaueza maizazapa cacauanirri deni torraniccaza “Rrehe poua ecauana” quena-rrarauitoui. ₁₁Narrarossa narraroa arrirraro namicca biquehe tecauemaneraha maizaza tineza tirrinedeni toccanissa terrerezape pocca biquehe parrissehecca tiadeniza: “Tecauemanarri” narrarauitoui. ₁₂Madirra ouahacca ziniro tecauemananissa terrerezape ticcadeni ziniro naqui tecauemananissa terreranitoui. Nema nezape ticcadeni ziniro tiadeniza da iquena-rreranitoui.

₁₃—Nazama tiadenipe tiadeni zossede pamahaza tizepedeni irrimananiuarrinepe tiparriremane-rrerani. Tiadeni zossede pamaha ticarrimanezape orrariazana tetideni uanaqquiri narraro. Poua attizana iboraqquiri tiquenanitoui. Ouahazape arrimani tetideni uanaqquiri nezape pina pouaza nacasseraqquiri tiquenarrarossa nanitoui. Poua attiza ibobo tinanitoui.

—Deocca tiquerrenezape zinirocca zozosse tiquerrenaniuarrine ssamo tani. Zinirotouira tetizemanezape Deoza tetizemananiuarrine ssamo tani. Uima pamehepe Deotoui, zinirotoui, timadimananiuarrinepe ssamo tani −narrari Zeso.

₁₄Zeso maride torraza marinarra parizeoza rrehe quenarrarideni naco nauiza carrimemanaza tauaribobo canarrari. Pouadenipa zinirozana uatideni uanaqquiri narrari. Naraha Zeso atti nama naui mittemanazapa pouaza ssamoni uaua quenarrari. ₁₅Nazapa Zeso manaco pouadeniza uati tarrari: —Tiadenipe madirra noccodeniza bicaqquiri tiqueneraha Deopa tibodideni nauato tarrari. Madirra bazimapa tiadeniza: “Bicaqquiri naui” quenaraha parrissa rrerani. Ticcadeni madiezape Deo nacassera taui −narrari Zeso.

₁₆—Maittaccazama Moizecca marinarra nemanehe, Deo Atti cacomeraqquiri narraridenicca dozonirri naqui mari mari quenarra narronapoui narraria arra Zouao Batistaparra. Nazana Deocca cacauehecca uima bicani madirraza torraniuarrine Zouao Batistapa taide mari mari narronaporrari. Rridapana oua naqui maride nema onarronarraroa arrirraroparri. Naraha madirrapa Deocca cacauehecca uimaza nacasseraqquiri naza pouadenirrine narrizoue ssonari ssonari narroneraha namanaha madirra Deocca cacaueheza totoquerrena narrariparra.

₁₇—Arrina meme, nami rricaniuarrine narrora taqui? Narro tani. Naraha Moizecca marinarra rricaniuarrinepe denima narro tani. Rricaniuarrinepe ssamo tani. Deo Atti dozo nanicca marinarra bazima parrirenissa tanitoui. Touatti orrarie zori terre canima-rreranitoui.

₁₈—Naraha tiadenipe Deocca zossenirri Moizeza uati taporraricca uimaza madirra mari ticanabaqquiraha tirrinedenia torrizarraro. Deocca zossenirri parrisseheccape arrima narrarona parri: Maqquiderrepa pocca amonerre ineboza amonerre onihira icarrizape uimasiri inanarraro. Nama nazapa Deocca zossenirripe ecaue-rrerarraro. Madirra ouaha naco arri amonerre ponicca maqqui ineborraro “Ocarrina” naza icarrizape uimasiri inanarraro. Nama nauipa Deocca zossenirri ecaue-rrerarraro −narrari Zeso.

₁₉Zesopa uima onihi uati uati tarrari: —Madirra zepe sse tarraripa etero bicani oro oro totozima narrari. Uada uarrirriraza errete ihinana narraro. Poua tessedeni tezerre rrirripa bica tauiccara rrirripemana narrari. ₂₀Naraha madirra touati nauana, uapi rrazimaro narraripa naui zepe ssebotecca totoqquezimaza uiuitta narrari. Poua onipa Razaro. ₂₁Zepe sse tarraricca rrirripa motatoui uiuitta narrari. Poua uapi rrazirrarirrine naco ette eno eno ihiquenarrari. ₂₂Nazapa touati nauana tarraripa zoqquerrari. Zoqquezapa Deocca zozosse tabaqqui memeuarricca iaccamacossanimanarrari. Nauiuarripa Izarraeo potemaui zodeodeni bazimacca idi Abarahaouarri bacco tarrari. Nazapa Abarahao tezerre memeuarricca zama bicaniza madimanarrari. Zotode zepe sse tarrari naco zoqqueza ppa izemanarrari. Naraha pouapa parra rriquemanarirrarideniuarri bacco tarrari.

₂₃—Nazama zepe sse tarraripa parra rriquemanarirrarideniuarri madizapa ocasserani auarrari. Nauiuarri madizapa uarri taraha Razaro Abarahao tezerre qqui inabaqquirrari. ₂₄Nazapa Abarahaoza uaua narrari: “Idi Abarahao, ouaza teti uana tarri! Razaro oua acco canauiuarrine poua zepe cote passoza iqueuezippa neza zosse tarronarro, ouebeno tonauini naniuarrine. Ouape arri rrororoni ppocoraniza ocasserani ouani” narrari. ₂₅Naraha Abarahao pouaza uati tarrari: “Neppe, teti uatomarri. Taide namiuarri timadiponipe bicani tepode. Naraha Razaropa ocassereheza madipode. Rridapanape Razaroza uima bicani torrarraro. Naraha tiape ocasserani tinauanarraro” narrari Abarahao zepe sseboteza. ₂₆“Uima onihi naqui tia timadi ia imadi nani nocconiuarripe odi imeni corro tani cauarriqquimaniuarri imadirrarossa narraro. Arra imadiniuarricca madirra tiadeniuarri bacco toquenauiuarrine ssamo tani. Manaco nauiuarricca madirra iauarri bacco narronauiuarrine ssamo tani. Nazama Razaro tiauarri zosse onauiuarrine naco ssamo tani” narrari Abarahao.

₂₇—Naraha zepe sse tarrari uati tapomarrari: “Idi Abarahao, Razaro namiuarri zosse tinaronanirro, occa abicca ozauarri ouimecotedeniza uati tauiuarrine. ₂₈Nazama ouape ouimecote 5 quenaha ocarriderra. Pouadeniza ouatti Razaro uati taniuiuarrine: ‘Parri Deocca zossenirriza iboqquiri tiquenezape nacassereheuarri bacco tiquenanitoui’ nauiuarrine pouadeniza” narrari zepe ssebote atti.

₂₉—Naraha Abarahao uati tapomarrari: “Deo Atti Moize dozo inarraro, Deo Atti cacomeraqquiri narrarideni dozo iquenarraro naqui carrimanaui. Narraro uima mittemanaza bodideni cacarriqquimere-manauiuarrine parriremanaui” narrari. ₃₀Naraha zepe ssebote attia: “Rrehe idi Abarahao, narraro dozo nani carrimanaraha narraroza parrissa quena-rrararrari. Naraha madirra zoqquerrari nauatoniza pouadeniuarri uatide toccanizana parrissa quenauitoui, poccadeni uimasiri inebomananiuarrine” narrari zepe ssebote atti.

₃₁—Naraha Abarahao attia pouaza: “Deo Atti Moizerrine dozo nani carrimana, Deo Atti cacomeraqquiri narraridenirrine dozo nani naqui carrimana naui. Narraro Deo Atti mittemana-rrarazapa arra madirra zoqqueraha nauatonirrari attiza naco mittemana-rrarauitoui. Parrissa quena-rrarauitoui” narrari Abarahao atti −narrari Zeso.