Zouao 8

₁Nezape ssono (onini) Rritona quenauiuarri Zeso toqquemoraza pouaza rrauirremorade. ₂Uada ssiuarra rrauirrezippanizape Deoza dada toqquimauarri Zeso toqquezimapomaza madirra ecaua-uarranimana narraride. Nauiza Zeso uittariza madirra mari icanabaqquirraride.

₃Nauizana zodeodenicca marinarra maridedeni, marinarra parizeoza rrehe quenarrarideni tezerrepa amonerre eccarronemanarraro. Ponipe maqqui carriraha maqquiderre ouaha narrade torreza qqui toquenazapa rroua icanabaqquimanarrari. Nazapa amonerre dama iqueneza Zesoza eccarronemanarraro. Zeso boroniza mari mari nauiuarri inauemana narrarode. ₄Nazapa parizeodeni Zesoza uati toquenade: —Mamaride, arrirraro amonerrepe maqqui carriraha maqquiderre ouaha inarraui qqui ineza tiaza eccarronarraro. ₅Moizecca marinarrazape: “Amonerre maqquiderre ouaha narrezape zoqquena. Sibaza tiquenaqquimanarri” nade. Naraha tettipe nerrecoma tani? −quenade Zesoza.

₆Nama quenarraripa pouadeni bodi: —Zeso uima zori inanezape pouaza uima inassonariniuarrine −quenarrari. Naraha Zesopa tocatteza naza ssiquiza poua zepeza dozo dozo nade. ₇Zesopa ssiquiza dozode torraraha parizeodeni denima uati zanapomananarra Zeso totemaza pouadeniza uati tade: —Rrehe, tiquenaqquimanarri. Naraha uimasiri cappirarrarina taide siba idiza iquenacossapona −nade Zeso.

₈Nazapa tocattezanipomaza ssiquiza denima dozode torrapomade. ₉Naraha Zeso atti mittemanaza bodideni uatozapa maqquiderre rradauidenina taide toqquena, toqquena rriquemana nade. Bazima naco rraui torremaha rricazapa Zeso poua, amonerre poni tazarranira ba narraride. ₁₀Nazapa Zeso totemaza arri amonerre uarraroza uati tade: —Asi couarri rridacca madirra tia ccaccarronadedenipa? Narrarideni orrariapa uimasiri tinanani manaconi tiaza: “Tia onanazoqquena” narra canima-rraraco? −nade Zeso. ₁₁Neraha Zesoza uati tade: —Oua Zozossede, noueraparra −nade. Naraha Zeso poniza uati tapomade: —Rrehe, oua naqui tizoqquerri onerrerani. Nazama ticcanina. Rridapanape maqquiderre ouaha narra terrerana. Uimasiri tinanapoma terrerana −nade Zeso.

₁₂Zeso madirra bazima mari icanabaqquipomarrari: —Ouape zama bazimaza ossiuerrene auatorizarraro. Madirra ouaza toquerrenarraripa ossiuerrene carrimanaui. Ossiuerrene carrimanazapa camittehe rriquerreranicca naco carrimanaui. Nazama camittehe rriquerreranicca carrimanazapa uimasiricca ziziniza toquerrena-rrarauitoui −nade Zeso. ₁₃Naraha marinarra parizeoza rrehe quenarrari attideni Zesoza: —Tia motta titauimari tetecomera narraro. Ia motta itauimari ecomerani bica terrerani, inarraro −quenade.

₁₄Naraha Zeso pouadeniza uati tade: —Rrehe, oua motta otauimari ouacomereraha ouattipe parrissa. Ouape oua occarronaniuarri nauato onani. Oua occani onaniuarri naqui nauato onani. Naraha tiadenipe occarronaniuarri ssamoqquiri tiquenani. Oua occani uarri naqui ssamoqquiri tiquenani −nade Zeso. ₁₅—Neraha tiadenipe arrirraro namiza madimanarraridenicca marinarrazara madirracca uima nattomede nauatoqquiri tiquenarraro. Madirrarrine uima bica terrerani tiadeniza auato tezape: “Pocca uima uaidira tani. Icca marinarrassa nerrerani” titiquena neraha ouape nema onerrerani. Madirracca uima nattome onerrerani. ₁₆Neraha oua madirracca uima nattome onaniuarrinepe oua motta nattome onerrerani. Occa Abi oua Cazossede tezerrena madirradenicca uima nanattome ihinanarraro. Nema inarrarope madirracca uimaza: “Uaidira tani” onezape ouattipe parrissa. ₁₇Naraha ticcadeni marinarra dozo nanizape: “Madirra pamaha qqui toquenarrari poccadeni uima narrarossa narraro ecomeremanezape pouadeni attiza parrissa tiquenarri” nade. ₁₈Ouape oua motta otauimari ohouacomera neraha Abi oua Cazossede naco otauimari ehecomera narraro −nade Zeso.

₁₉Naraha Zesoza uati toquenapomade: —Ticca abipa nerrecouarri madirrari? −quenade. Naraha Zesopa pouadeniza uati tapomade: —Ouaza tinoccodeni rriza tani, occa Abiza naqui tinoccodeni rriza tani. Ouaza tinoccodeni rrizera tezape occa Abiza naqui tinoccodeni rrizera tanitouiraha −nade Zeso.

₂₀Narraro uimape Deoza dada toqquimauarricca ziniro uauaza bau cacauittizeri narizaniuarri mari icanabaqquirraride. Nauizapa Zeso dama iquena-rraraccade, pouaza uima torraniuarrinecca uada bacco terreraqqueza.

₂₁Naraha Zeso pouadeniza uati tapomade: —Ouape occaninitoui. Occanizape otoui qqui tarizemananitoui. Naraha oua occaniniuarri rraui tirraniuarrinepe tiparriremane-rrerani. Tiadenipe ticcadeni uimasirima tirricanitoui −nade Zeso. ₂₂Naraha zodeodenipa: —Poua nanazoqqueuiuarrineco? Nerrecotouira “Oua occaniniuarri rraui tirraniuarrinepe tiparriremane-rrerani” naua? −quenade.

₂₃Nazapa Zeso pouadeniza uati tade: —Tiadenipe arrirraro namicca tiquerrenani. Naraha ouape arrirraro namicca orrarrerani. Ouape memeuarricca orrani. ₂₄Arri ouatti tiadeniza: “Ticcadeni uimasirima tirricanitoui” onarrarope ouaza parrissa tiquenerrerarraro. Ouape arri uati uati onarraro orrani onarraroza parrissa tiquenerrereza naqui ticcadeni uimasirima tirricarizanitoui, onarraro −nade Zeso.

₂₅Naraha manaco Zesoza uati toquenade: —Tiape nerreco madirra tirrani? −quenade. Naraha Zesopa: —Ouape taide otauimari tiadeniza uati uati onarronarraroa arri rridapana tiadeniza uati uati onarraroparri. ₂₆Nema nezape ticcadeni uaidirehe bazima tiadeniza uati onezape tiadeniza uima ssonarinitouiraha nema onerrerani. Naraha oua cazosserrarina parrissa uati uati tarrari. Pouapa ouaza uati uati taui omittezana arrirraro zamacca madirraza uati uati ohoqquima narraro −nade Zeso.

₂₇Naraha pouadenipa Zeso pocca Abi Deocca uima uati uati tarraripa mittemanauissa tarrararrari. ₂₈Narrarorrine Zeso denima uati tapomarraride: —Ouape Madirra Bedi orrarraroa niza aua porimacossaniza oua acca ticanamacosse-maneza que onanitoui. Nazana nauatoqquiri tiquenanitoui: Arri uati uati onarraro orrani onarrarope parrissa. Oua mottape oua nacassa onanicca onane-rrerani. Occa Abi oua mari canazana uati uati ohonanarraro. ₂₉Nazama oua Cazossedepa ouaza madiui. Occa Abipa oua motta orraniuarrine oua nebo-rraraui, uarrirriraza Pouaza bica tanicca ohonana nezape −nade.

₃₀Narraria Zeso uati uati tazapa madirra mota uapi taha pouaza parrissa quenarraride.

₃₁Nazapa Zeso zodeodeni mota pouaza parrissa quenarrarideniza uati tade: —Ouattiza dameraqquiri tiquenezape parrissa occa tiquerrenanitoui −nade. ₃₂—Occa tiquerrenezape parrissehera nauatoqquiri tiquenanitoui. Narraro parrissehe nauatoqquiri tiquenezape tiadeni zozossede uaidira tarrariza zozosse tiquerrene-rreranitoui −nade Zeso.

₃₃Naraha manaco Zesoza uati toquenade: —Iape Abarahao potemaui iquerrenarraro. Zozosse iquerrene-rrerehe nema inarronarraro. Naraha nerrecotoui iazara: “Zozosse tiquerrene-rreraniuarrine” tarraro? −quenade. ₃₄Naraha manaco Zeso pouadeniza uati tade: —Parrissehera tiadeniza uati onana: Madirra uimasiri inanezape narraro uimasiricca zozosse torrarrari. ₃₅Madirra zozosse torrarraripa poua zozossedecca zozosse torraraha poua zozossedeza nama zanaporrara taui. Zozosse torrarraripa pina madirra poua pocca erredenissa narraraui. Madirracca erredenipa pocca abiza nama zanaporrari. ₃₆Nazama Deo Bedina tiadeni tappa tabaqquizapa parrissa zozosse tiquerrene-rrerehe timadimananiuarrine onarraro. ₃₇Rrehe, tiadenipe Abarahao potemaui tiquerrenani nauato onani. Naraha ouattiza parrissa tiquenerrerezape oua tinanazoqquemanabote nani. ₃₈Nazama ouape occa Abi ouaza noue inarrarocca uati uati ohonanarraro. Naraha tiadenipe ticcadeni abi uati uati tatarra naui titimittemana narrarora narrarossa titinanemana narraro −nade Zeso.

₃₉Naraha manaco uati toquenade: —Icca abipa Abarahao! −quenade. Naraha Zeso uati tapomade: —Parrissa Abarahao potemaui tiquerrenezape pina Abarahaorrinessa tinanemananitouiraha. ₄₀Deo parrissa oua mari canarraricca tiadeniza uati uati onarraroraha oua tinanazoqquemanabote nani. Abarahaorrinepe uima nema nerrerani. Nouerani! ₄₁Naraha tiadeni naqui pina ticcadeni abirrinessa tinanemanarraro −nade Zeso. Naraha manaco uati toquenarrari: —Abi ouaha icappirani! Icca Abipa Deona orrariui! −quenade.

₄₂Naraha Zeso pouadeniza uati tade: —Rridacca parrissa Deo ticcadeni abi torrazapa ouaza naqui tetideni uanaqquiri nanitouiraha nema tiquenerrerani. Ouape Deouarri occarronarraro arri omadini. Ouape ouara occarrona-rrereraha Abi Deo oua cazosseza occarronarrarode. ₄₃Neraha nerrecotoui ouatti timittemananissa terrerarraro? Occa uimaza nacasseraqquiri tiquenezape arri timittemananissa terrerarraroparri. ₄₄Ticcadeni abipa Deoza uauadide Tocorime-Tamine. Pouaza tiquerrenani. Poua nacassa tauiccaza dameraqquiri tiquenarraroparri. Tocorime-Taminepa irrine auauiuarrineraha nazama touattaporra narrari. Parrissa uati tauiuarrinepa ssamo taui. Pouapa maizehe rrinederra narrari. Narraria maizeheza uati uati nanarra narrariparra. ₄₅Narrarorrine tiadeniza parrissehera uati uati oneraha tiadeni naqui ouaza parrissa tiquenerrerarraroparri. ₄₆Nerrecorrarina uimasiri ocarrini ecomeraniuarrine nauato taui? Noueraui. Ouape parrissehera uati uati onezape ouaza parrissa tiquenaniuarrine bica teraha nerrecotoui ouaza parrissa tiquenerrerarraro? ₄₇Madirra Deocca querrenarraripa Deo Atti mittemanauiuarrine nacasseraqquiri narrariparra. Naraha Deocca tiquerrene-rrerezape arri Deo Atti mittade nacasseraqquiri tiquenarraroparri −nade Zeso.

₄₈Naraha manaco zodeodeni Zesoza uati toquenade: —Tiape samaritano tirrani. Tiaza nacasseraqquiri inani! Rridacca uati inaporrarope parrissa. Tocorime siri ticarrirraro nauatoqquiri inani −quenade Zesoza. ₄₉Naraha Zeso uati tapomade: —Ouape tocorime siri ocappirani. Ouape: “Occa Abipa deni torraui” ohonanarraro. Naraha tiadenipe ouaza: “Zesopa deni torraui” titiquena nerrerani. ₅₀Naraha ouape madirra ouaza: “Deni tirrani” quenauiuarrine touini onerrerarraro. Naraha orrariana ouaza: “Deni tirrani” quenauiuarrine nacassa tarrari. Pouana occa uima bazima nauato tarrari. Pouana madirracca uima uapima tocatterrizade nauato tarrari. ₅₁Nazama ouape parrissehera tiadeniza uati onarraro: Ouattiza iboraqquiri tiquenezape parri tirricarini nerreranitoui −nade Zeso.

₅₂Nazapa manaco zodeodeni uati toquenade: —Rridapanape nauatoqquiri inani tocorime siri ticarrirraro. Abarahaopa maittaccazama zoqquepoui. Deo Atti cacomeraqquiri narrarideni naco rricarizaui. Naraha tia tettipe: “Ouattiza iboraqquiri tiquenezape parri tirricarini nerreranitoui” taua. ₅₃Arrina tiape icca idi Abarahaoza deni tirrarrarorane? Abarahaopa zoqquepoui. Deo Atti cacomeraqquiri narrarideni naco rricarizapoui. Naraha tiape tibodi: “Ouape deni orrani” tarraroqui? −quenade Zesoza.

₅₄Naraha Zeso pouadeniza uati tapomade: —Oua mottape oua deni onanani parrire-rrerani. Naraha occa Abi oua deni tonanazana parrireni. Occa Abipa Deo. Pouaza: “Icca Deo” tiqueneraha. ₅₅Pouaza ssamoqquiri tiquenani. Ouana Pouaza nauato onani. “Nauato onerrerani” onezape mamaizade orrani, pina tiadenissa onanitouiraha. Naraha ouape parrissa Pouaza nauato onarraro. Poua Attiza naqui ibora onarraroparri. ₅₆Nazama ticcadeni idi Abarahaopa maittaccazama occarronanicca uima nauato tapozapa uatizeza otoui madirrari. Parrissa Deorrine occaronani qqui tazapa uatizeri narraride –nade Zeso.

₅₇Naraha zodeodenipa Zesoza uati toquenapomade: —Tiape ticca uarrano 50 bacco tarrararaha Abarahao qqui tinarrarittaco? −quenade. ₅₈Naraha Zeso pouadeniza uati tapomade: —Parrissehera tiadeniza uati onarraro: Ouape Abarahao tossona-rraraccaza taide omadiporrarode −nade Zeso.

₅₉Nazapa zodeodeni uadimanaza siba nacca-cca quenade, Zeso iquenaqqui-manauiuarrine. Naraha Deoza dada toqquimauarri madirra uapi tarra narrari. Zesopa narrari madirradeniza carrimaza amossi narraride. Deoza dada toqquimauarri toqquenarrari.