Zouao 7

₁Naui zotodepa zama arobeni Carireazana Zeso madiccaza oza onihi, onihiza mari mari narizarraride. Zama arobeni Zodeauarripa zodeodeni Zeso poua zoqqueuiuarrine toui quenazapa nauiuarri madide nacassera tarrari. ₂Naraha zodeodenicca idideni oza rrorroredeza madirizemanaporraridenicca errete touarrirarrarode. ₃Nazapa Zeso poua imecotedenipa pouaza uati toquenade: —Arrizape timadi terrerarri. Zodeauarri ticcarri. Nauiuarri madimanarrari titoui quenarrarideniza naqui ticca nauatoue noue noue tarizarri −quenade. ₄—Madirra ouaha nauatoue carrimanarraridenipa pouadeni tauimari torrarizaniuarrinepe poccadeni nauatoue ihinarrimemana nerrerarraro. Madirra bazima qqui toquenauiuarrine nauatoue auato ihinanemana narraro. Tia naqui nauatoue ticarrizape madirra bazima qqui toquenauiuarrine nema tarizarri −quenade poua imecote attideni. ₅Zeso poua imecotedeniraha pouaza parrissa quena-rrarazapa attideni nama quenarrariparra. ₆Naraha Zeso poua imecotedeniza uati tade: —Tiadenipe uada ponimaccaza touini tiqueneraha otauimari torrarizaniuarrinecca uada bacco terreraccani −nade. ₇—Nazama tiadenizape arrirraro zamacca madirra nacasseraqquiri narraraui. Naraha ouazana nacasseraqquiri narrari, ouape poccadeni uimasiri cacomera oneza. ₈Nezape tiadenira erreteuarri rraui tirrarri, ouape oqquerrerani. Ouaza nauatoqquiri nauiuarrinecca uada bacco terreraccani −nade.

₉Zeso atti nama nazapa Carireaza iborraride.

₁₀Nazapa Zeso imecotedeni erretetoui rraui torrazapa poua naco zotode naui madirra uapi tauiza tocarrima-zanapode. Naraha pina pouadeniza toqqueraui nauiuarrine poua cacomarraride. ₁₁Naza errete torrezape zodeodeni taminedenipa Zeso bacco iquenauiuarrine qqui narizemanazapa: —Nerrecouarri maqquiderre nauatobotepa? −quenarraride. ₁₂Nazapa madirra bazima Zeso poua tauimari uimahaha canade. Madirra motapa: —Narraripa maqquiderre bicabotea −quenade. Naraha madirra ouahadenipa: —Iazapa bica tarraraui. Pouapa toponi mamaizade −quenade. ₁₃Naraha Zesoza nacassaqquiri narraripa zodeodeni noppine cappinemanaza orriza uimahaha canade.

₁₄Errete rricaniparrinerrereraha Deoza dada toqquimauarri Zeso toqquezimaza madirra mari icanabaqquirraride. ₁₅Nauiza Zeso mari icanabaqquizana zodeodeni uarro canireza uimahaha canarraride. —Nerrecoma naza touattarraritta? Mari mari ihicanemana narrararaha −quenade.

₁₆Naraha Zesopa pouadeniza uati tade: —Occa marinarrape occa rrerani, oua Cazossederrine −nade. ₁₇—Arri tibodidenipe: “Pocca marinarrape Deocca zossenirriqui? Poua motta poua attirane?” tiquenarraro nitide. Naraha Deo Poua nacassa tauiccara tinanemanezape otauimari tiadeniza auato tanitoui: Occa marinarrape Deocca. ₁₈Arra madirra pocca uima uati uati tatarra narraripa madirra ouaha pouaza: “A, tiape nauato tinani” nauiuarrine uati uati tatarra narrari. Naraha madirra ouaha uati uati tatarra narraripa: “Arrirraro uimape orrine rrerani, oua Cazossedecca uima, pouazara tetizemanarri” narrari. Narrarina parrissehecca uima uati uati tatarra narrari. Maiza-rrararrari −nade Zeso.

₁₉—Naraha Deocca zossenirri Moize dozo inarrarope tiadeniza nouerarrarottaqui? Ticarrimaneraha narraroza iboqquiri tiquenarraro. Nerrecotouira oua tinanazoqquemananiuarrine touini tiquenarraro? Narrarope Deocca zossenirri rrerani −nade Zeso.

₂₀Nazapa madirra bazima Zesoza uati toquenade: —Tiape tocorime ticarrirrarorrine mona tirrarraro nitiderra. Naraha nerrecorrarideni “Tia inanazoqquena” quenarrari? −quenade.

₂₁Naraha Zeso pouadeniza uati tade: —Icca rrassinarracca uada sabadoza occa nauatoue orrari neraha uarro ticanirerrarode. ₂₂Arri Moizecca marinarrazape: “Maqquiderredenipa zopori cotani eteroni uissinarra cacarrimana nauiuarrine” napoui nade. (Naraha narraro uimape Moize uati taza rrerani. Abarahao madipozama nema narronarraro.) Narraroa arri erredeni uadari 8 nazapa sabadoraha zopori cotani eteroni uissinarra titinacarribaqquimana narrariparra. ₂₃Tibodideni uatomanarri: Pina Moizecca marinarrassa titinanemana naniuarrine sabadoza maqquiderre bedi zopori cotani eterori uissinarra titinacarrimana naraha arri orrinepe bica terreraqui? Orrinepa sabadoza madirra assire namanaha tonomiraha nerrecotoui ouaza tiboquemanarraro? ₂₄Nezape arrirraro uima tibodideni uatonissa tarri. Ponima “Uaidira tani” tiquenerrerarri. Uima nattomede tiquerreneza parrissehera nattome tiquenanissa tarri −nade Zeso.

₂₅Nazapa Zerozareuarri madimanarrarideni motaha Zeso qqui toquenaza uimahaha canarraride: —“Arrarraria inanazoqquena” quequenanarrarico? ₂₆A, naraha arra madirra mari mari narronaua! Taminedenipa: “Mari terrerarri” quena-rrararrarirana. Icca taminedenipa: “Parrissa, Cristo-Mesia” quenarrarico? −quenade. ₂₇—Neraha iape arrarrari madirra poua ccarronauiuarripa nauatoqquiri inani. Rridacca Cristo-Mesiapa poua ccarronauiuarri ssamoqquiri inanerre −quenade.

₂₈Zesopa naui Deoza dada toqquimauarri maride torraraha pouadeni atti mittaza rrazirema uati tarraride: —Rrehe, tiadeniza rrizera onarrarorane! Oua occarronaniuarri naqui nauatoqquiri tiquenarraroranerre! Naraha ouape occa uimaza occarrona-rrerani. Arra oua Cazossedena parrissehe rrinede. Naraha tiadenipe Pouaza tinoccodeni rrizaqquiri nani –nade. ₂₉—Naraha ouapa qqui onarra narrari, nani Pouauarri occarronarraro. Pouana oua cazosserraride −nade Zeso.

₃₀Nazapa nauiza Zeso pouadeni zepeza torrauiuarrine dama iquenauitouiraha dama iquena-rrarade. Zeso zoqqueuiuarrinecca uima Deorrine narro taccarraro.

₃₁Naraha madirra mota pouaza parrissa quenarraridenipa uimahaha canade: —Zesocca nauatoue deni torrarraro. Pina Cristo-Mesiacca uima imittaporrarossa nani. Narrarina Cristo-Mesia poua. Niza madirra ouaha pina Zeso canauatori canarrarissa narrarauitoui −quenade. ₃₂Madirra —Zesopa Cristo-Mesia −quenarrari uimahaha canaza zodeodeni mota marinarra onini parizeoza rrehe quenarrarideni mittemanazapa dada toqquimade taminedeni tezerre nauiuarricca cacauadedeni Zeso dama iquenauiuarrine zosse inabaqquimanarrari: —Zeso dama tiquenaza teccanimanana −quenarrari. ₃₃Rraui torrazapa Zesoza bacco toquenarrari. Naraha Zeso pouadeniza uati tade: —Ouape tiadeniza biqui tehe omadi naccaniuarrine. Niza zotodepe arra oua Cazossedeza occaninitoui. ₃₄Nezape otoui qqui tarizemananitoui, neraha oua bacco tiquenerreranitoui. Oua omadiniuarri “Bacco inana” tiqueneraha naniuarri bacco tiquenarreranitoui −nade Zeso.

₃₅Narraro uima madirra mittemanazapa pouadenira uimahaha canade: —Zama nerrecoma nauiuarri toccauiuarrine iaza: “Oua bacco tiquenerreranitoui” naua? −quenade. —Zodeodeni zama onihiuarri torraribaqquirrari-deniuarri toccauiuarrineco? Nauiuarricca zodeo querrena-rrararrarideni mari icanabaqquiuiuarrineco? −quenade. ₃₆—Poua atti nerrecoma narrari? Arra “Otoui qqui tarizemaneraha oua bacco tiquenerreranitoui. Omadiniuarri naqui ‘Bacco inana’ tiqueneraha naniuarri bacco tiquenerreranitoui” narrari −quenade.

₃₇Oza rrorroredecca errete uada rricaniccana denima bica tarraro. Narraro uadazana Zeso uaza rrazirema uati uati tarraride: —Tibacco rrocozape ouaza ticcarroneza ze tarri −nade. ₃₈—Madirra ouaza parrissa narraripa passo camittehecca carriuitoui. Narraro poua bodicca qquenezape torraribaqquinitoui. Narrarope Deo Atti dozo naniza dozo naporraro −nade Zeso.

₃₉Arra Zeso uati tarraripa pouaza madirra parrissa quenarraridenina Deo Corime carrimanauitoui, narrari. Naraha Zesopa zoqque, nauatoni, toccamacossani narraraccazapa Deo Corime torrariza-rraraccarrariparrade.

₄₀Zeso uati uati taui mittemanazapa madirra mota pouadenira uimahaha canade: —Parrissa arrarrari madirrapa Deo Atti cacomeraboteua −quenade. ₄₁Naraha madirra mota attidenipa: —Arrarraripa Cristo-Mesia −quenade. Naraha madirra mota attidenipa: —Noueraui! Cristo-Mesiapa Carireauarricca rraraui. ₄₂Arri Deo Atti dozo naporrarozape uima arrima narraro: “Mesiapa tamine Dabi Potemaui. Dabicca zamabote oza panani Bereneuarrina ccarronauitoui” nani Deo Atti dozo naporraroza −quenade.

₄₃Narraroa arri Zeso tauimarirrine madirra torraribaqquimanarraride. ₄₄Madirra motapa: —Toponi cocorouarri Zeso iaccana −quenaraha cappinemanaza dama iquena-rrarade.

₄₅Nazapa marinarra parizeoza rrehe quenarrarideni, dada toqquimade taminedeni quenaza oza bodiuarri queriqquimanaza naui Deoza dada toqquimacca cacauadedeni Zeso damade rraui torraraha Zeso rriraha bacco nanimanaza taminedeni uati toquenarrari: —Nerrecotoui teccanimana-rrararrari? −quenaui nade. ₄₆Naraha cacauadedeni uati toquenarrari: —Zeso attipa deni torraza pina madirra ouaha attissa narrarazapa −nanimanaui nade. ₄₇Nazapa parizeodeni cacauadedeniza uati toquenapomarrari: —Tiadeni naqui Zeso tiadeni tocamaizabaqquirrari uitiderra? ₄₈Naraha zodeodenicca taminedeni Zesoza rrehe narra canimarrarico? Noueraui. Parizeodeni naco Zesoza rrehe narra canimarrarico? Noueraui. ₄₉Arra madirra pouaza rrauirizarraridenipa iassa quena-rraraui. Pouadenipa Deo Atti ssamoqquiri naui. Narrizoue rriquerreraniccaza toquerrenauitoui −quenaui nade.

₅₀Naraha arra parizeodeni orraria oni Nicodemo zome Zesoza uatide toccauarrarrarina pouadeniza uati tarrari: ₅₁—Titauaribobo canarri! Icca marinarrape arrima ihinanarraro: Madirra pocca uima ecomera-rreraqquezape izaua-rraraccaui. Taidepa madirra tauimaritoui uati inarizeza, pocca uima nauato ineza, uaidira taui auato tazana ihizaua narrari −naui nade Nicodemo. ₅₂Naraha Nicodemoza uati toquenarrari: —Tia naqui Carireauarricca tirrarraro nitiderra? Carireacca uimatoui Deo Atti ua timaninissa tarri. Carireauarripa Deo Atti cacomeraqquiri narrarideni qquenarra canima-rraraui −quenaui nade Nicodemoza. ₅₃Nazapa poccadeni ozauarri rraui torranirizaui quenade.