Zeso pocca Abiza uati tarrari
1Narraro uima uati taha rricazapa Zeso memeuarri tocattamacossaza Deoza uati tade: —Abi, rridapanana onarrorehe rricani. Memeuarricca deni torrehe ticca erredeniza da tarri. Naui ticca erredenipa ticca nauatoue deni torrehecca auato inananiuarrine bazimaza. 2Arri oua ticca erredenipe madirra bazimaza tirrine tamine orrarraro. Arra ouaza tinanabaqquirraridenipa pouadeniza camittehe rriquerreranicca da onarizaniuarrine. 3Narraro camittehe rriquerreranicca carrimanauiuarrinepa Tiaza noccodeni torrizerarrari. Tiana Deo orrari tarraro. Tiana ia Cacauade parrissehecca. Arri oua Zeso Cristo oua zosse taronarrarope ouaza naco noccodeni rrizeraqquiri naui. Madirra Tiaza, ouaza parrissa quenazapa camittehe rriquerreranicca carrimanauitoui.
4—Nazama ticca deni torrehepe auato onanarraro arrirraro zamaza. Arri oua ticazosserraro bazimape onarricanissa tani. 5Abi, zama nauato-rreraccazama tia titezerre deni torrehe icarrirrarode. Rridapanape narraro ouaza tinananirri, onarraro −nade Zeso.
Zeso poua uatimadedenitoui Deoza uati tarrari
6—Rrehe, madirrapa arrirraro namicca uimaza madimanaraha tidinibaqquiza ouaza tinanabaqquirrari. Narrarideni onauattabaqquizapa ticca uimaza nauatoqquiri naui. Narraridenipa ticcaraha ouaza tinanabaqquirrari. Tettiza iboraqquiri naza ticca marinarra ecauemananissa tani. 7Rridapanapa nauatoqquiri naui arri bazima ocarrirraro naqui ticca danirri. 8Arri ouaza Tetti da tarrarope pouadeniza da onarizani. Narrarope pouadeniza torrani. Pouadenipa Tiauarri occarronanicca uima tocauatterara canaui. Pouadenipa ouaza: “Parrissa Deo zosse inaronarrari” quenaui.
9—Ouape narraridenitoui Tiaza uati onarraro. Arrirraro namicca uimasiriza madimanarraridenitouipe uati onerrerarraro. Arra ouaza tinanabaqquirraridenitouira Tiaza uati uati onarraro. Pouadenipa ticca. 10Arra occa bazimapa ticca. Ticca uapima naco occa, inarraro. Occa deni torrehepe pouadeniza auato tarraro.
11—Rridapanape arrirraro namiza omadizanapo-rrerani. Tiauarri occaniraha arra pouadenipa arrirraro namiza madimanaccauitoui. Rrehe, Abi bicabote tirrani. Arra ouaza tinanabaqquirraridenipa ticca dacoreheza tecauabaqquirro, bazima orrariqquimanauiuarrine. Pina Tia oua titezerre irrariqquirrarossa quenauiuarrine. 12Arrirraro namiza pouadeniza omadirizezape arri ticca dacorehe ouaza tinanarraroza ouacauabaqquiuissa tarrari. Pouadenipa orraria amossinarra canima-rrararaha orrariana parra amossi nariui nauitoui. Narraripa narrizoue rriquerreraniuarri torrauitoui, pina arri Tetti dozo naporrarossa nehe torranitoui.
13—Rridapanape tiauarri occanina. Neraha arrirraro namiza omadiqquezama arrirraro uima Tiaza uati uati onarraro, naui pouadenipa pina arri occa uatizehe ocarrirrarossa narraroza uatizemaneri nauiuarrine. 14Nazama ticca marinarrape pouadeniza onanarizeraha arrirraro namicca madirraha pouadeniza uattarrorro tarrari. Pouadenipa arrirraro namicca uimaza toquerrena-rraraui. Pina oua arrirraro namicca orrarrerarrarossa quenarrari. 15Naraha tiaza: “Pouadeni tiaccamacossani-baqquirro” onerrerani. Uimasiri rrinede Tocorime-Taminecca maizeheza torraparimana-rrarauiuarrine oneza “Tecauabaqquirro” onarraro. 16Ouape arrirraro namicca orrarrerani. Pouadeni naco pina arra ouassa quenarrari. Arrirraro namicca querrena-rraraui. 17Ticca parrissehezara tinanabaqquirro, onarraro, uimasiri rrirehe madimanauiuarrine. Tettipe parrissa ponira. 18Arrirraro namiza omadiniuarrinepe Tiana oua ticazosserrarode. Narrarossa narraro ouape pouadeni ocazossebaqquirrari, arrirraro namicca madirra motadeni mari icanabaqqui-rizauiuarrine, oneza. 19Occa madie nemanehe Tiaza accora onarraro. Arra occa mamari tabaqquideni naco pina ouassa quenauiuarrine poccadeni madie nemanehe Tiaza accoraqquiri nauiuarrine damera onarraro. Ticca parrissehezara madimana-zanapouiuarrine −nade Zeso.
Pouaza parrissa quenarraridenitoui Deoza uati tarrari
20—Ouape occa mamari tabaqqui bodideni acco ticanabaqquirro oneza Tiaza uati uati oneraha zotodedeniccatoui naqui Tiaza uati uati onarraro. Niza occa mamari tabaqqui otauimari eccorarize-manezape madirra ouaha zotodedenicca naco ouaza parrissa quenauitoui. 21Narrarideni naco orrariqquimanauissa tauiuarrine, Abi, pina oua Tia titezerre irrariqquirrarossa quenauiuarrine Tiaza uati onarraro. Pouadeni naco iaza orrariqquimanauissa tauiuarrine, onarraro. Naui arrirraro zamacca madirrapa ouaza: “Parrissa Deo zosse inaronarrari” quenauiuarrine. 22Arri occa deni torrehe ouaza da tarrarope pouadeniza naqui da onarizani. Naui pouadenipa orrariqquimanauissa tauiuarrine, pina ia irrariqquirrarossa quenauiuarrine, onarraro. 23Ouape pouadeniza, Tiape ouaza inarraro. Naui pouadenipa orrariqquimanauissa tauiuarrine. Nazapa arrirraro zamacca madirra nauatoqquiri nauiuarrine ticca zossenirri occarronarrarode. Arrirraro uima naqui nauatoqquiri nauiuarrine: Tiape parrissa quenarrarideniza teti uana tarraro. Pina ouaza teti uana tarrarossa narraro.
24—Nazama Abi, ouaza tinanabaqquirraripa occarizaniuarri ouaza rrauirizauiuarrine, ticca danirri occa deni torrehe qqui toquenauiuarrine oneza. Narraro deni torrehepe zama inauato-rreraccazama Tiape ouaza teti uana teza ouaza da tarrarode. 25Abi, ticca uimape parrirenissa tani. Arrirraro namicca madirra Tiaza noccodeni rrizaqquiri naui. Neraha ouape Tiaza onocco rrizera tani. Arra ouaza toquerrenarraridenipa nauatoqquiri naui: Ouaza: “Arrarraripa Deocca zossenirri” quequenanarrari. 26Nazapa orrine Tiaza noccodeni rrizeraqquiri naui. Naraha denima noccodeni torrizera-zanapouiuarrinepa nema ozanaponitoui. Arri ouaza touati uanehe ticarrirrarope pouadeni naco carrimanauiuarrine. Oua naqui pouadeniza omadirizaniuarrine −nade Zeso atti pocca Abiza uati uati taza.
