Zeso uatimadedeni tezerremadenicca uima uati taporrari
1—Arri tiadeniza uati onarrarope ticcadeni rrehenirri tinebomana-rreraniuarrine. 2Zodeo poccadeni Deo Atti mamariuarri rraui tirrezimapoma-rreraniuarrine tiadeniza: “Arriuarripe rraui tirrezima terrerarri” quequenanauitoui. Niza uima onihi naqui tiadeniza ssonarinitoui. Madirra pouadeni tocamaizani-manaza bodidenipa: “Ouape Deocca uima ouacauanissa tana” quenazapa tiadeni inanazoqque-manerre canimanitoui. 3Arrirraro uimape nema inanemananitoui. Pouadenipa Abiza noccodeni rrizaqquiri, ouaza naco noccodeni rrizaqquiri narrari. 4Niza arri uati uati onarraro tiadeniza bacco tezape tibodideni uatome-mananitoui: “Rra, Zeso atti nama napode” tiquenanitoui. Narraro uimape tiadeniza uati onapo-rrerade, tiadeniza omadirizaccani oneza −nade Zeso.
—Deo Corimepa ia Acco Canade
5—Naraha rridapanana oua Cazossedeuarri occanini onezape tiadenipe ouaza uati tiquenerre canima-rrerani. “Nerrecouarri ticcaniniuarrine?” tiquenerrerani. 6Naraha occanini onani timittemanezape orri tiquenabote neza tibodideni uanacossarraro. 7Parrissehera tiadeniza uati onana: Oua occanizape tiadeniza uima bicani torraniuarrine. Occani-rrerezape tiadeni Acco Canade nouerauitoui. Naraha occanizana tiadeni Acco Canade zosse onaronauitoui −nade.
8—Niza tiadeni Acco Canade bacco naronazapa arrirraro zamacca madirradeni uimasiri carrimanaui pouadeniza auato inananitoui. Uima onihi naqui: Uimasiri cappiremanarraridenina Deoza toquerrenauiuarrine parriremanaui auato inananitoui. Uima onihi naqui: Uimasiri carrimanarraridenipa Deo ettarrobaqquiza nanarrizo toquerrenauiuarrine auato inananitoui. 9Tiadeni Acco Canadepa madirra ouaza parrissa quena-rrarazapa uimasiri carrimanaui pouadeniza auato inananitoui. 10Uima onihipe: Uimasiri cappiremanaza Deoza toquerrenauiuarrine parriremanarraripa arri ouape uimasiri rrirehe omadiza occa madie parrirenissa tarrarorrine. Nema onezape Deouarri occaninitoui. Nezape oua qqui tiquenapoma-rreranitoui. 11Uima onihi: Deo uauattarro inanabaqquiza nanarrizo toquerrenauiuarrine auato inanarrarope taide arrirraro zamacca zozossede Tocorime-Tamine Deorrine uauattarro torraporrariparra −nade Zeso.
12—Denima tiadeniza uima uati onaniuarrine uima ocarriraha narraro uapima timittemananiuarrine tiparriremane-rreraccani. 13Naraha niza tiadeni Acco Canade Deo Corime Parrissehecca Maride bacco naronazana uima bazima parrisseheccara tiadeniza inanazanaponiuarrine. Narrarope poua mottacca uima rrerani, Abi Deo uati tarrari mittaza tiadeniza uati toqquimauitoui. Itezerremacca uima naqui tiadeni tonauattabaqquiuitoui. 14Pouaza occa uima auato onaneza tiadeniza auato inananitoui. Nazapa pouarrine ouaza: “Rrehe, Zesopa nauato taui, deni torraui” tiquenanitoui. 15Occa Abicca bazimape oua naqui occa. Narrarorrine ouattipe: Deo Corimeza auato onanezape tiadeniza auato inananitoui, onarraro −nade Zeso.
Poccadeni orriepe uatizehe torranitoui
16—Niza zotodepe oua qqui timanimana-rreranitoui, naraha denimape oua qqui timanimana-pomanitoui −nade Zeso.
17Nezape ia poua uatimadedeni iara uimahaha icanade: —Nerrecotoui atti nama narrari? −inade. —Nerrecotouira iaza: “Niza zotodepe oua qqui timanimana-rreranitoui, naraha denimape oua qqui timanimana-pomanitoui” napa? Nerrecotouira iaza atti: “Ouape occa Abi madiuiuarri occaniniuarrine” nanarra narrarinarra? 18Nerrecotouira poua attipa: “Niza zotodepe” nanarra narrarinarra? Poua uati uati tarraripa ssamoqquiri inani −inade poua uatimadedeni iape.
19Naraha Zesopa poua bodi nauato taporra narrari. Iape pocca uimatoui pouaza uati inanitouiraha manacora iaza uati tarraride: —Naza tiadeniza uati onapopa: Niza zotodepe oua qqui timanimana-rreranitoui. Naraha denimape oua qqui timanimana-pomanitoui, onarrarorrinea arri tiadeni motta uimahaha ticanarraroparri. 20Nezape parrissehera tiadeniza uati onana: Tiadenipe orri tiquenanitoui. Tibodideni naqui ocassera tanitoui. Naraha madirra arrirraro namicca uimaza madimanarrarideni bazimapa uatizemanauitoui. Tiadenipe tibodideni ocassera teraha ticcadeni orriepe uatizehe torranitoui. 21Arrirraro uimape pina amonerre izoni comarrarossa narraro. Erredeni comene nacassera teraha tossonaui nattipa comene uatini rrima narraro. Nezape ponicca erredeni tossonarrarirrine ponipe uatizerraro. 22Tiadeni naqui nema tiquenanitoui. Ocasserani temaneraha zotodepe tiadeni qqui onimanibaqqui-pomanitoui. Nezape tibodideniza uatizehera torranitoui. Narraro uatizehepe madirra ouaharrine tossamo-rreranitoui, onarraro.
23—Niza zotodepe touini tiquenaniccatoui ouaza uati tiquenerreranitoui. Parrissehera tiadeniza uati onana: Toui tiquenaniccatoui oua onima Abizana uati tiquenezape Abina tiadeniza da da ihinanauitoui. 24Tiadenipe oua onima Abiza uati uati titiquena nerreraccani. Nezape oua onima Abiza uati uati titiquena narri, ticarrimananiuarrine. Nani ticcadeni uatizehe parrirenissa taniuarrine −nade Zeso.
Zesopa arrirraro zamacca uimaza deni torrarrari
25—Occa marinarra arrirraro namiza imadinicca uima tazarrani tiadeniza mari mari ohonanarraro. Naraha niza zotodepe occa marinarra arrirraro namicca uima tazarrani tiadeniza uati onapoma-rreranitoui. Abi tauimari auato taniuarrinena tiadeniza uati onanitoui. 26Narraro uada bacco tezape tiadenina oua oniza uati uati titiquena nani bica tani. Nazama ouape ticcadeni uatinarra Abiza uati oqquima-rrerani. Pouapa tettideni mittaui. 27Abipa tiadeniza uati uana taui. Ouaza tetideni uana teza: “Parrissa Deouarri ccaronarrari” tiquenezape Abipa tiadeniza uati uana taui. 28Ouape Abi madiuiuarri omadiraha arrirraro namiuarri occaronarrarode. Rridapanape arrirraro zama oneboza Abiuarri occamacossaninitoui, onarraro −nade Zeso.
29Nezape ia poua uatimadedeni pouaza uati inade: —Rrehe, rridapanana uati tinanissa tani. Arrirraro namicca uima rrirehe uati tinezape imittani −inade. 30—Tiape uima bazima nauatorride tirrirani nauatoqquiri inarraro. Rridapanape tiaza uimatoui uati inerrereza naqui, ibodicca icca uatinarra nauato tinani, inarraro. Narrarorrinea parrissa Deouarri ticcaronani nauatoqquiri inarraro −inade Zesoza.
31Naraha Zeso iaza uati tade: —Rridapanana parrissa tiquenanissa tarraroqui? 32Rridapanape ouaza uima torrabote nani. Tiadenipe ticcadeni ozauarri rraui tirranirizanitoui. Oua tiaquibonimananitoui. Nezape oua motta orranitoui. Naraha ouape oua motta rrerani. Abipa ouaza madiui. 33Arri uima uapima tiadeniza uati onarrarope tibodideni uatoto cane-rreraniuarrine. Ouaza tiquerrenezape rronehe, uatizehe parrissehecca ticarrimananitoui. Arrirraro zamaza timadimanaqquezape ocasserani temaneraha dacoco tirrirarri. “Peperri inana” tiquenerrerana. Arrirraro namicca zozossedepa arramani torraui. Ouana pouaza deni orrani −nade Zeso.
