2 Pedoro 2

₁Maittaccazama Izarraeo potemauideni madimanapozapa maizehe uauatidedeni pouadeniza animanaui quenade. Pina Deo Atti cacomeraqquiri narraridenissa quenaraha mamaizadedeni. Rridapana timadimaneza naco tiadeniza maizehe mamaridedeni bacco quenauitoui. Tiadeni mari tocanabaqqui-manazapa pina marinarra parrisseheccassa neraha maizehe carrimarraro. Poccadeni marinarra uaidira tarrarorrine ticcadeni rrehenirri touaidiranitoui. Ia Zozossede Zesopa pouadeni inassiuauabaqquiuiuarrine zoqquerrari. Naraha pouaza: —Ia tonassiuauabaqquiuiuarrine parrireui −quena-rrararrari. Nama quenazapa pouadeniza narrizoue amazati bacco tanitoui. ₂Maizehe mamaridedenicca madiepe uaidira tarraro. Pouadeni touini quenauiccazara dameraqquiri narrari. Madirra mota uapi taha poccadeni maizeheza toquerrenazapa pina poccadeni madiessa quenauitoui. Narraridenirrinepa madirra ouahadeni naco Zeso Cristo tauimari parrisseheccaza attideni uaidira taza atti atti quenauitoui. ₃Maizehe mamaridedenipa zinirotoui dameraqquiri naui. Pouadenipa tiadeni tocamaizabaqqui-manaza ticcadeni ziniro pouadeniza totorra nanitoui. Naraha taidezama poccadeni uima uaidira tani Deo nauato tapozapa narrizoue oppina tanicca pouadeniza inanarroraporraro. Niza pocca uadie torrezape zori tocanire-rrarauitoui.

₄Maittaccazama naco Deocca zozosse tabaqqui memeuarricca mota uimasiri tonanemanazapa poccadeni uimasiriza Deo: —Peperriua, ouati rrimani −narrararrari. Parra ettarrobaqquirizapa narrizoue rriquerreraniuarri ua izimarrari. Cadeiaza birrideni rrore naha zizini oppina taniza inamadibaqquirrari. Niza madirra bazimacca uima cattemaniuarrinecca uada bacco tezana narrizoue denima oppina tanicca carrimanauitoui. ₅Narraro uimassa narraro naqui maittaccazama arrirraro zamaza madimanaporrarideni uaidireheza dameraqquiri nazapa Deo poccadeni uimasiriza: —Peperriua, ouati rrimani −narrararrari. Nazapa ppani imeni zosse inaza rricarrari. Narraro uima torrezape Noena Deo inassiuauarrari. Pouapa madirra Deoza madimanauissa tauiuarrine mari mari ihicanabaqqui naraha rra quena-rrararrari. Naraha pocca madirra 7 quenarraridenina pouaza tocassiuauerarrari.

_6-8Zotode oza panani Sodoma, Comorraza madimanarrarideni naco Deo inarricarrari. Narraro uima torrezape Rona Deo inassiuauarrari. Madirra bazimapa pouadeni touini quenauicca uaidireheza madimanaraha Ropa Deoza madiuissa tarrari. Madirradenicca uaidirehe pouaza ocassera teraha nama naha madirrari. Poccadeni uaidirehe qqui tarrari, mittarra zazanapo nazapa bodi orri naha madirrari. Nazapa narrarideni naco Deo inarrizo-baqquirrari. Poccadeni oza panani Sodoma, Comorra naqui bazima madirrama Deorrine dirri tocanireuissa tazapa ononedenira torrarraro. Deorrine nema narrarope zotodedenicca uaidireheza madimanarrarideni bodideni uatome-manauiuarrine. —Parrissa, Deopa uimasiri tonanemanarrarideni inarrizobaqqui taui. Iaza naco nama narana −quenauiuarrine, onarraro.

₉Rrehe, ia Zozossede Deopa Pouaza dameraqquiri narrarideniza uima ocassera tanicca inatappaniuarrine nauato tarrari. Uaidirehe inanemanarrarodeni naco inarrizobaqquiuiuarrine nauato tarrari. Pouarrine narrizoueza madimana-zanapozapa nizaranibote madirra bazimacca uima cattemaniuarrinecca uada bacco toquenauitoui. ₁₀Arra madirra uaidirehe pouadeni touini quenauiccaza dameraqquiri narrarideni, arra Deo Attiza iboqquiri narrarideni, arra cacauehe carrimanarrari attideniza iboqquiri narrarideni bazimazape narrizoue denima oppina tanicca ssonarinitoui. Arra maizehe mamaridedenipa uaribodeni didiqquiri narrari. Cappineraqquiri nazapa: —Ouana nauato onarraro, deni orrani −quenarrari. Deocca zozosse tabaqqui memeuarriccaza naco tamassode cappineraqquiri narrari. ₁₁Naraha Deocca zozosse tabaqqui memeuarriccapa manaco maizehe mamaridedeniza tatamasso quena-rrararrari. Pouadenipa deni toquerrenarrari, denima dacoraqquiri naraha Deo baccouarri maizehe mamaridedeni tauimarideni uati toquenazapa attideni uaidira taniccaza uati toquena-rrararrari.

₁₂Maizehe mamaridedenipa bodideni uatouiuarrine ssamoqquiri narrari. Pina banidenissa quenarrari. Pouadeni touini quenauicca touira dameraqquiri nazapa pouama madimanarrari. Uima parrissehecca mittemanauissa tarrarazapa narraro uimaza attideni uaidira taza atti atti quenarrari. Narraridenipa rricauitoui. Pina bani tocatorraza madimanaraha madirrarrine zozoqquemana narrarissa quenauitoui. ₁₃Pouadenirrine madirra ocasserani auemanarrari manaco pouadeni naco ocasserani imeni auemanauitoui. Cappineraqquiri naza auatoniza pouadeni touini quenauicca uaidirehe ihinanarizemana narraro. Nama quenaza uatizemanaraha ssamoqquiri narrari. Arri tiqueriqquimananiza naco tiadenizama rraui torrezimaraha poccadeni uimazara uatizemanarrari. Pouadenirrine uima uaidira tani qqui tiquenezape ticomehimanarraro.

₁₄Pouadenipa amonerre qqui toquenaza touini inacomemanezape pina irremanarrarossa narraro. Uimasiri tonanade neboboraqquiri narrari. Arra rrehenirrirideni rrapari tarrarodeni icamaizabaqqui-manazapa uimasiriza toquerrenani taui. Pouadeni bodiza touini inacomemananicca pouadeniza torraniuarrine nauatoqquiri narrari. Namarridede rarraripa parrissa Deo inarricauitoui. ₁₅Deocca rraui bicani borocco tarraroza torrizemanazapa pina rrano toquerrenarrarissa quenarrari. Poccadeni uimape pina Baramicca uimassa narraro. Barahaopa Behoro bedi, maittaccazama madiporrari. Narraripa Deo Atti cacomeraboteraha ziniro carriuiuarrine touini naza uaidirehe tonanarrari. ₁₆Naraha Deo rroua icanarrari. Narraro uimape arrima narraro: Barahaopa pocca borro ideza uittariza toccaraha Deorrine pocca borro atti pina madirra attissa naza pouaza uati uati tarraro. Narrarorrine Barahaopa poua uaribo todidimanirrararrari.

₁₇Maizehe mamaridedenipa pina passo odinicca sse tarrarossa quenarrari. Pina meme esseni rrorroderrine ponima toccarrarossa quenarrari. Poccadeni maizehe manaconipe zizini oppina taniccaza madimana-zanapouitoui. ₁₈Attideni deni torraniccaza uati uati toquenaraha pouama uati uati toquenarrari. —Ia touini inanicca inananipe oppinera tani −quequenanarrari. Pouadenirrine madirra uimasiri carrimanarrarideniza touarrimane-zatipa uaidireheza toquerrenanirrari. ₁₉—Marinarra rrirehe timadimanani bica tani. Touini tiquenanicca tinanemanani oppinera tani −quequenanaraha parrissa rrerani. Pouadenipa uaidirehecca zozosse toquerrenarra narrari. Narraro uaidirehe pouadeni zossede torrarrarorrine pouadeni tonauaidire-manauitoui. Arra madirrapa pouadeni zossede uaidirehe zapaniza toquerrena taui quequenanade. ₂₀Zesoza rrehe quenarrarideni mota naco uaidirehecca zozosse toquerrenanipoma taui. Taide ia Zozossede, ia Tonassiuauade Zeso Cristoza tocauatterazapa arrirraro namicca uaidirehe inebomanarraro. Naraha zotode uaidireheza toquerrenanipomaza uimasirirrine rrore naqquimanazapa ponicca zozosse toquerrenanipomarrari. Madirra nama quenarraripa poccadeni madie taidecca uaidira tarrarope arrimani. Naraha zotodeccape denima uaidira tarraro. ₂₁Rraho, Deocca madie bicani tocauattera-rrarazapa peperri. Ssamoqquiri narrarirrine poccadeni madie bica terrerani. Naraha Deocca madie bicani tocauatteraraha zotode nebomanazapa poccadeni madie zotodeccape denima uaidira tarraro. ₂₂Nezape arrirraro uima pamehe parrissa inanemanani auato tarraro: Ettepa tocapi, tocca naraha ccanipomazapa pocca capie torripanirrari. Poroco naco rrapi naraha amazati ssicariniuarri toccanizapa deuede torrapomarrari. Poccadeni uaidireheza toquerrenanipomauipa uaidira tarraro.