2 Pedoro 1

₁Nirra ouimecotedeni? Ouape Simao-Pedoro, Zeso Cristocca zozosse orrarraro. Pocca marinarra mari ocanabaqqui-rizauiuarrine oua cazosserrari. Nezape occa uima teppe tiadeniza dozo onapomarraro. Zeso Cristopa icca Deo, ia Tonassiuauade. Pouapa tiadeniza bica tarrari, pocca uima tiadeniza parrirenissa tarraro. Pouarrinena pouaza parrissa tiquenarraro, pina ia pouaza parrissa inarrarossa tiquenarraro. ₂Deoza tinoccodeni torrizera-zanaponiuarrine, ia Zozossede Zesoza naqui tinoccodeni torrizera-zanaponiuarrine titouideni Deoza uati uati ozanaporraro. Pouapa tiadeniza uima bicani inanazanapona. Tibodideniza naqui pocca rronehe torrazanapona, onarraro.

₃Deo pocca dacoreheza ibodi acco tocanabaqquirrari, icca madie Pouaza inananiuarrine. Poua nacassa tauiccassa inananiuarrine naqui ia tonaparrire-baqquiuissa tarrari. Deo ibodi acco tocanabaqquirrarirrine Zesoza nauatoqquiri inarraro. Zesopa pocca deni torrehe, pocca biquehe icarriniuarrine ia uaua tabaqquirrari. ₄Deopa pocca dacorehema Poua uati taporraricca uima bicani iaza da inarraro. Narraro pocca danirripe deni torranicca, bica tani. Narraro iaza torrarrarope pina Deo Pouassa inaniuarrine, arrirraro namicca uaidirehe touini inarraroccaza naqui zori icanireniuarrine. ₅Nema nezape ticcadeni rrehenirri todacorani naniuarrine dameraqquiri tiquenarri. Uima bicanira tinanemanarri. Uima bica tanicca, Deo touini nauicca nauatoqquiri tiquenaniuarrinepe Deocca touattehetoui dameraqquiri tiquenarri. ₆Tibodideniza touini tiquenanicca uaidireheza poni tiquenaniuarrine ticauatterarri. Uima ocassera taniccaza, uima narro taniccaza tedimane-rrereza mouaraza tonauanade ticauatterarri. Ticcadeni madie Deoza tinanemanezape Poua nacassa tauiccassa tinanemanarri. ₇Ticcadeni madie denima bica taniuarrinepe timecotedeni Zesoza rrehe quenarrarideniza bicaqquiri tiquenarri. Nema tiquenezape madirra bazimaza naqui tetideni uanaqquiri narri.

₈Rrehe, narraro uima bicani onihi onihi ticauattereza, ticcadeni madie Deoza tobicazanapozape ticcadeni rrehenirri ponima torra-rreraniuarrine. Ia Zozossede Zeso Cristoza nauatoqquiri tiquenezape parrissa ticcadeni madieza auato tanitoui. ₉Naraha madirra Zesoza rrehe naraha uima bicani touattattera tarraripa pocca madie Deoza tobica-rrerarraro. Pina mitta-rrararrarissa narrari. Pouapa pocca uimasiri taidecca Deo peperri inanaporraro uati rramarrari. ₁₀Ouimecotedeni, Deopa Pouazara iboraqquiri tiquenaniuarrine tiadeni uaua tabaqquirrari. Pocca madirra tiquerrenaniuarrine tiadeni tocatterrizabaqquirrari. Parrissa pocca madirra tiquerrena-zanaponiuarrine touini tiquenezape denima tidameremanani narri. Nema tiquenezape uimasiriza tiedimemana-rreranitoui. ₁₁Nezape niza zotode Deocca cacauehe rriquerreraniccaza bacco tiquenezape Deo uatizeza noccobirri nemanehe tiadeniza icanauabanitoui. Naniza rraui tirrezimezape ia Zozossede, ia Tonassiuauade Zeso Cristopa tiadeni touacauabaqqui-zanapouitoui.

₁₂Rrehe, ticcadeni rrehenirri todacoraniuarrinecca uima timittemanapode. Narraro marinarra parrissehecca tiadeni mari tocanabaqquiza parrissa rrehe tiquenanissa teraha tetideni rrime-rreraniuarrine tiadeni maride damera onanitoui. ₁₃Arrirraro namiza omadiccazama narraro marinarra parrissehecca tetideni rrime-rreraniuarrine tiadeni mari mari ozanapoccaniuarrine bica tani, onarraro. ₁₄Ia Zozossede Zeso Cristo parrissa ouaza auato inanarrarope arrirraro namiza occa madie rricabote nani. ₁₅Nezape occa marinarra tetideni rrimemane-rreraniuarrine damera ozanapoccani. Ozoqqueni nattini naqui narraroza tibodideni uatomemana-zanaponiuarrine, onarraro.

₁₆Arri ia tiadeni maridepe ia Zozossede Zeso Cristocca dacorehe tauimarini, poua ccaronapomauiuarrine tauimari naqui tiadeni mari icanabaqquirraro. Narraro marinarrape ponima maizehecca uima inauatomanarrarossa nerrerani. Ia Zozossedecca deni torrehe parrissa inoccoza qqui inarrarora tiadeniza ecomerarraro. ₁₇Iape Abi Deo Poua Bedi Zeso deni inanaui qqui inade. Deo pocca deni torrehe, pocca biquehe Poua Bediza inanezape Poua Atti arrama narraride: —Arrarraripa occa erredeni. Pouaza ouati uana tarraro. Pouaza ouatizeri narraro −narraride Deo. ₁₈Ia Zesoza ssono bicaniuarri rrauirremorarrarora memeuarri Deo Atti mouini mittaronani imittarrarode.

₁₉Nema nani qqui onezape Deo Atti cacomeraqquiri narraridenicca dozonirri icarrirraroza: —Parrissa rreranitide −onerrerarraro. Narraroza parrissa onanissa tarraro. Narraro poccadeni dozonirri tetideni rrimemana-rreraza tibodideniza dacorarri. Poccadeni dozonirripe pina rrorrororo ziziniza ssiuarra-zanaporrarissa narraro. Pina ssiuarrabote nauicca amoua cassiuarrarronazapa ssiuerrene tossiuauabaqquirrarissa nanitoui niza ia Zozossede Zeso Cristo ccanizapa pocca biquehe tiadeniza torranitoui. ₂₀Arrirraro marinarra timittemananissa tarri. Arri Deo Atti cacomeraqquiri narraridenicca dozonirriza: —Parrissa Deorrine dozo iquenarraroua −tiquenarri. —Madirra pouadeni bodicca uima dozo iquenarraro −tiquenerrerarri. ₂₁Rrehe, Deo Atti cacomeraqquiri narrarideni Deo Atti ehecomerarizemana narrarope pouadeni touini quenauicca rrerani. Pouadeni bodiza: —Arrima onanana −quena-rraraui. Deo Corime pouadeni bodideni acco icanabaqquizana Deo Poua touini nauiccara ehecomerarizemana narraro.