2 Corintodeniza 5

₁Arrirraro namiza imadizape essire rricaca taniccaza imadirraro. Pina arrirraro namicca oza icanauatorrarossa ineza imadirraro. Pina boboderrinecca oza rricaca taniccassa inarraro. Naraha nauatoqquiri inani: Icca oza namicca tocauaidirezape memeuarrina oza zati icarrinitoui. Narrarope madirrarrine canauatorrarossa nerrerani. (Narrarope essire zati rricaquera tanicca icarriniuarrine Deorrine iaza narroraporrarocca uima.) ₂Naraha arrirraro namicca essire rricaca taniccape ocassera tarrarorrine orriema imadirraro. Essire memeuarriccana touini inarraro. ₃Narraro essire zati icarriniuarrinepe pina etero oro izimarrarossa nanitoui. Oro izimezape iccororre rreranitoui. (Narrarope memeuarri icorime toqquezape poni motta rrerani, essire zati carriniuarrinecca uima.) ₄Parrissa arrirraro namiza imadiqquezape essire rricaca taniccaza imadirrarorrine orri orri izanaporraro. Ocasserehepe iaza ccanarra tarrarossa narraro. Naraha essire rrirehe imadiniuarrine touini inerrerani. Essire zatina touini inarraro. Narraro icarrizape rricaca tanicca inebonitoui. Camittehe rriquerreraniccazana imadi-zanaponitoui. ₅Narraro uima bicani nemanehe icarriniuarrine Deopa ia tonanarrora-baqquirrari. Pouapa parrissa narrarossa inananitoui nauatoqquiri inarrarope Poua Corime iaza da inarizaporraroparri.

₆Nema nezape ibodi icappine-rrereza Deorrine etizezanaporraro. Nauatoqquiri inani: Essirema imadiqquezape ia Zozossede madiuiuarri uarri inaccani. ₇Arri memeuarri imadi-zanaponiuarrinecca iaza narrorarraro inoccoza qqui inerreraccaraha ibodiza nauato inezape parrissa inehe imadirraro. ₈Narrarotoui etizezape icappine-rrerarraro. Arrirraro essire ineboniuarrine touini inani, ia Zozossede Deouarri iccaniuarrine. Ia Zozossede Deouarri imadi-zanaponiuarrinena iaza denima bica tarraro. ₉Nezape essirema imadiqqueza ia Zozossede Deo inauatize-zanapouiuarrine damamera inarraro. Essire ineboza memeuarri imadiza naqui nema izanaponitoui. ₁₀Niza zotode Cristo poua baccouarri bazima idomo uezape icca uima cattemade torrauitoui. Nazana ia essirema imadiza uima inanarrarocca bazima Cristo nattome inanitoui. Uima bicani inanarraro manaconi, uaidirehe inanarraro manaconi naqui bazima iaza inananitoui.

₁₁Deo noppine icappinaniuarrinepe bica tani. Pouaza iboraqquiri inaniuarrine naqui bica tani. Narraro nauatoto inezape madirra bazima Pouaza rrehe quenauiuarrine damamera inarraro. Deopa oua, Timoti tezerre ibodi qqui tauissa taui. Maizeraqquiri inani nauato taui. Tiadeni naqui maizeraqquiri inani nauatoqquiri tiquenaniuarrine touini inani. ₁₂—Icca uima bicani, parrirenissa tani −inarrarope ia ipamehe iaza etizeniuarrine rrerani. Tiadenina iaza tetizemananiuarrinena touini inani. Icca uima nauatoqquiri tiquenezape arra ia arramani tonanabaqquirrari attideniza tecomeremananiuarrine tiparriremananitoui. Narraridenipa: —Iana deni iquerrenani, nauatoqquiri inani −quenaraha madirra panodenira qqui toquenarrari. Madirra bodidenicca uima ssamoqquiri narrari.

₁₃Nazama madirra attideni iaza: —Bodideni tossamomanarrari −quenazapa paparra, pouadeni nama quenana. Arri izepe irrirrarope Deona deni torrauiuarrine. Madirra ouaha attideni naco iaza: —Nauatoto taui −quenazapa tiadeniza naqui bica tani. ₁₄Cristopa itoui zoqquerrari, ia naqui pina poua zoqquerrarissa inarraro. Narraro nauatoqquiri inezape Cristocca touati uanehepe ia zosse zosse narrarossa narraro. Narraroza izepe irrirronarraro arrirraroparri. ₁₅Cristopa bazima itoui zoqquerrari. Nazapa pouarrine madie zati carrimanarraridenipa pouadeni touini quenauicca toui madimana-rraraui. Cristo poua touini nauicca touira madimanarrari. Pouapa pouadenitoui zoqque, nauatoni narrari.

₁₆Rridapanape Cristocca touati uanehe nauatoto inezape madirradenicca uima arrirraro namicca deni torreheza nattome inerrerarraro. Taide Cristoza ssamoqquiri inaqquezape pouaza nema inade. —Pouapa Deo Bedi, deni torraui −inerrerade. Naraha rridapanape pouaza nema inerrerani. ₁₇Nazama madirra Cristocca torrarraripa Deorrine zati torrarrari. Pocca madie naqui cacarriqquimerarraro. Pocca uimaboteza torrani-rraraui. Rridapanapa madie zati carrirrari.

₁₈Narraro madie zatipe Deocca. Pouapa iaza boque taporaha Cristo itoui zoqquezapa Poua tezerre icarronerarraroparri. Deo iaza uaua narraripa Pouaza izepe irriniuarrine, madirra mari icanabaqquiza Poua tezerre carronerara canauiuarrine. ₁₉Cristo aua porimacossaniza zoqquerrarirrine Deopa madirracca uimasiri manaconi pouadeniza inana-rrerani. —Ticcadeni uimasiri ouati rrimani −narrari. Nama nazapa pouadeni tezerre carronerara canarrari. Narraro uima bicani ecomerarizaniuarrine ia tocazossebaqquirrari. ₂₀Nazama iape Cristo tauimari totouaccade iquerrenani. Tiadeniza uati inarrarope pina Deo tiadeniza uati tarrarissa narraro. Etti bica teza Cristo onima tiadeniza uati uati inarraro: —Deo tezerre ticarronerara canarri −ihinanarraro. ₂₁Cristopa uimasiri inana-rrereraha icca uimasirirrinena Cristopa uimasiri ponissa naza Deocca uadie pouaza ssonarirraro. Deo nama narraria ia Cristoza irrariqquirraro icca uima Pouaza parrirenissa taniuarrine.