1 Tesaronicadeniza 3

_1-2Oza panani Atenauarri imadizape: —Nerrecoma quenaui? Qqui inabaqquipoma-ccaraho −ihinanarraro. Narraro iaza tocasserani naza ticcadeni uima nauatoto inaniuarrine: —Rrari, Timotira zosse inanina, iape Atenaza imadiccana −inarrarode. Arra Timotipa Deocca zozosserra narrari. Iazama Zeso Cristo tauimari icassiuaueraniuarrinecca mari mari nanariza naui. Narrarina naui tiadeniuarri zosse inanirrari, tibodideni acco tocanabaqquiza ticcadeni rrehenirri todacorani naniuarrine. ₃Timoti nama nazapa uima tiadeniza ssonarizape tirraparimana-rreranitoui. Tiadenipe nauatoqquiri tiquenani. Zeso Cristocca tiquerrenezape ocasserani temananitoui. ₄Nazama narraro uimape tiadeniza imadiza uati inapode: —Zeso Cristoza tiquerrenarrarorrinepe tiadeniza uima ocassera tanicca ssonarinitoui −inade. Rridapanape narraro uima tiadeniza parrissa torrani nauatoqquiri tiquenarraroparri. ₅Nema nezape ticcadeni uima nauato onaccaraho onezape tiadeniuarri Timoti zosse onanirrariparra. Zeso Cristoza ticcadeni rrehenirri dacoraqui? ohonanarraro. Arra Deoza uauadide Tocorime-Taminepa tiadeni toneuedima-baqquiuiuarrine damera taui. Naraha obodi: Tocorime-Taminecca maizeheza toquerrenaco? oneza ocappinarraro. Nema tiquenezape arri tiadeni mari icanabaqquirraro ponima torrapazerre, onarraro.

₆Naraha Timoti timadimanani Tesaronicauarri toccaniza arrauarri ccanizapa ticcadeni uima bicani uati nanirrari. Arri Zeso Cristoza ticcadeni rrehenirri dacoranicca uima, arri tetideni cauanerara cananicca uima, arri ticcadeni uatizehema iaza tetideni rrimemana nerrerarrarocca uima naqui uati nanirrari. Ia qquide naqui touini tiquenani, pina ia tiadeni qqui inabaqquiniuarrine touini inarrarossa tiquenarraro naqui iaza uati nanirraride. ₇Imecotedeni, iape uima narro taniccaza imadi, ocassera taniccaza imadi naraha arri Zeso Cristoza rrehe tiquenanissa zanaporrarocca uima iaza bacco nanizape ibodi tobicarizarraro. ₈Zeso Cristoza ticcadeni rrehenirri todacorani zanapozape ia naqui denima etizeza imadirraro. ₉Nazama Deo Pouarrine ticcadeni uima bicani torrezape uatizehe imeni icarrini. Pouaza etizeza: —Rrehe, bica tani −ineraha nerrecorraro touatti denima bica tanicca Pouaza uati inaniuarrine parrireni? Onihi nouerani. ₁₀Tiadeni qqui inabaqquipomaniuarrine neza Deoza uati uati ihinanezape zome, ssiuarra uati uati inarraro: —Abi Deo ettiza rrehe taqui? Pouadeni qquide touini inani. Zeso Cristocca marinarra denima tocauatterauiuarrine maride rrauirranipomana −ihinanarraro.

₁₁Tiadeni qquide rrauirranipomaniuarrinepe icca Abi Deo, ia Zozossede Zeso Cristo tezerre ia acco tocanabaqqui-manauiuarrine nacassassa inarraro. ₁₂Ia Zozossede Deo tibodideniza touati uanehe denima inanazanaponiuarrine, inarraro. Pouarrinena denima tetideni cauanerara cananiuarrine, inarraro. Madirra ouahadeniza naqui tetideni uanaqquiri naniuarrine, pina arri ia tiadeniza eti uana tarrarossa tiquenaniuarrine nacassassa inarraro. ₁₃Ia Zozossede Deorrine tibodideni todacorani naniuarrine, inarraro. Nezape niza ia Zozossede Zeso Cristo pouaza toquerrenarraridenima ccanipomazapa icca Abi Deo baccouarri idomo ueza arri tibodideni uissoqquiri naza uimasiri rrirehe timadimana-rronarrarope auato taniuarrine, inarraro.