1 Tesaronicadeniza 2

₁Imecotedeni, tiadenipe icca uima nauatoqquiri tiquenani: Tiadeniza imadizape ponima imadi-rrerade. ₂Taide tizamarideniuarri bacco inerreraccazape oza panani Piripocca madirra Deo Atti mari icanabaqquizapa nauiuarricca madirra motapa ia totamasso-baqquimana, ia tonarrizo-baqquimana nade. Nazama narraro uimape nauatoqquiri tiquenani. Arra tiadeniuarri naco madirra mota: —Deo Atti imitte-rrerana −quenazapa iaza uadiqquiri nade. Naraha Deorrine cappineraqquiri ineza pocca uima bicani icassiuaueraniuarrinecca tiadeni mari icanabaqquirrarode. ₃Narraro uima bicani tiadeni mari icanabaqquiza naqui parrirenissa inanade. Uaidirehe inananiuarrine tiadeniza uati inerre canima rrerade. Maizeheza naqui tiadeniza maiza maiza inerrerade. ₄Deo nacassa tauiccana uati uati ihinanarrarode. Deo ia tonoccozabaqquiza iaza: —Ticcadeni uima bica tani −nanarra nade. Icca uima Deo Pouaza bica tezape Deo Pouana ia tocazossebaqquiza Zeso Cristo tauimari icassiuaueraniuarrinecca mari mari ihicanabaqqui narrari. Arra madirra iaza uatizemanauiuarrine ineza damamera inerrerani. Deo iaza uatizeuiuarrinena damamera inarraro. Pouana ibodicca uima qquide nauato tarrari. Imaiza-rrerani nauato tarrari. ₅Tiadeni naqui icca uima nauatoqquiri tiquenani: Tiadeniza imadizape zinirotoui tiadeniza etti bicaca teza uati uati inerrerade. Ticcadeni zinirotoui naqui tiadeniza ihimaiza nerrerade. Parrissa narraro touini inerrerani Deo nauato tarrari. ₆Tettideni naqui iaza: —Bicaqquiri tiquenani, deni tiquerrenani −tiquenanirrine touini inerrerade. Madirra ouahadeni naco attideni nama quenauiuarrine touini inerrerade. ₇Naraha iape Zeso Cristocca zozosse tabaqqui iquerrenezape tiadeni zossede iparrireraha nema inerrerade. Tiadeniza imadizape mouaraza touati uanehema tiadeni mari mari ihicanabaqqui narrarode. Pina amonerre ponicca erredeni inanapiuiuarrine ecauarrarissa inarrarode. ₈Tiadeniza eti uana teza Deocca uima bicani icassiuaueraniuarrinecca tiadeniza ecomeraniuarrine nacassassa inarrarode. Narraro nacassassa inezape ia essire eccoraza irricaniuarrine naqui bica tani, inade. Etti nema inarrarope tiadeniza eti cauanari canarraro.

₉Imecotedeni, tiadenipe izepe irriecca uima tetideni rrima-rrerani. Imadinicca icarriniuarrine izepe irride damamera inezape ssiuarra izepe irri, zome naqui izepe irri narrarode. Nema ineza Deocca uima bicani icassiuaueraniuarrinecca tiadeni mari icanabaqquizape tiadeniza icca madie narro terreraniuarrine ticcadeni zinirotoui, ticcadeni zamatapatoui uati uati inerrerade. ₁₀Rrehe, tiadeniza imadizape ia qqui tinabaqquimanade. Deo naco ia qqui tabaqquide. Deotouira inezape ia ecauanissa teza imadirrarode. Uima icappirehe imadide. Zeso Cristocca tiquerrenarrarodeniza uima uaidira tanicca inana-rrerarraro. Nouerade. _11-12Icca uima onihi naqui nauatoqquiri tiquenani. Tiadeni ihinauatizebaqqui narrarope pina arra madirra pocca erredeni bodideni acco icanabaqquirrarissa inanarrarode. Orri orri tiqueneza naqui tetideni ihinassonabaqqui nade. Arra Deo titouideni uaua narraripa pocca cacaueheuarri tiquerrenaniuarrine, Poua zibehine, pocca deni torrehe qqui tiquenanissa taniuarrine. Pouarrine tiadeniza uima nema nezape tiadeniza: —Deoza timadimananissa tarri −ihinanarraro.

₁₃Ticcadeni uima Deoza uati uati ihinanezape: —Rrehe, peperri. Tirrine bica tani −ihinanarraro. Arri Deocca marinarra tiadeni mari icanabaqquirrarozape: —Madirra attia –tiquenerrerade. —Arrirraro marinarrape parrissa Deo Attia. Iaza torrana −tiquenade. Deo Atti parrisseheccara tiadeni mari icanabaqquirrarode. Pouaza parrissa tiquenezape Poua Atti tibodideniza torrarrarorrinea arri tibiquemana-zanaporraroparri. ₁₄Naraha imecotedeni, Deoza parrissa tiquenezape ticcadeni zamacca madirraraha tiadeni nanarrizo totonana-baqquimana narrari. Narraro uimape pina arra zama arobeni Zodeauarricca imecotedenicca uimassa narraro. Zodeodeni Zesoza nacasseraqquiri narraridenipa poccadeni madirra Deoza quequeriqquimana nauicca, arra Zeso Cristoza rrehe quenarrarideni nanarrizo ihinanabaqquimana narraride. ₁₅Arra zodeodenipa Zeso inanazoqque-manaza pina arra poccadeni madirra maittaccazama Deo Atti cacomeraqquiri narrarideni ihinanazoqque-rizemana narrarissa inanemanarrari. Narraria arra rridapana iaza naco moua moua quequenanarrariparra. Deoza naco bicaqquiri narraraui. Madirra bazimaza naco nacasseraqquiri naui. ₁₆Nezape Zeso Cristo tauimari icassiuaueraniuarrinecca zodeo querrena-rrararrarideni mari icanabaqquiuiuarrineraha arra zodeodeni Zesoza nacasseraqquiri narraridenina iaza moua moua quequenanarrariparra. Narraridenipa zodeo querrena-rrararrarideni Zeso Cristocca uimaza tocassiuauerauiuarrine nacasseraqquiri narrari. Nezape poccadeni uimasiri denima torrazanaporraroparri. Narraro poccadeni uimasirirrinena Deocca uadie pouadeniza torranitoui. Niza narrizoue oppina taniccape pouadeniza ssonarinitoui.

₁₇Imecotedeni, tiadeniuarri imadiporaha zotode oza onihiuarri rrauirrezape tiadeniza iarrini nanicca uada touapini. Tiadeni qqui inabaqqui-rrereraha titouideni eti uauatoma narraro. Tiadeni qqui inabaqquipomaniuarrine touini ineza: —Rrauirranipomana −ihinanarraro. ₁₈Tiadeniuarri rrauirrapomaniuarrine touini ineza icca bobode inarrora inarrora narraro. Arri oua Paoro naqui tiadeni qquide occaniniuarrine onarrora onarrora narraro. Naraha Deoza uauadide Tocorime-Taminerrine icca bobodecca uima tossamo tossamo nanerre narrarode. ₁₉Tiadeni qquide bacco inezape etizeniuarrine touini imadirraro. Tiadenina icca uatizehe. Niza Zeso Cristo ccanipomaza ticcadeni uimarrine poua tezerre etizenitoui. ₂₀Ticcadeni uima ecomerezape: —Poccadeni uima bica tani −ihinanarraro. Parrissa tirrinedenina ehetize narraro.