1Te ëngel hot mich aach te flus fom waser fom leewe ketsaycht, klënsich wii kristal, woo fom troon fom Hërkot un fom Xoof raus khomt 2un woo torich ti mite fon te haupt xtroos fon te xtat laaft. Uf yeete sayt fom flus is te paam fom leewe, woo tswelef fruchte im yoer kept, was mënt, een yeete moonat. Un sayn pleter tiine fer ti natsioone kuriire. 3Un kept niks in te xtat woo unich Hërkot sayn ferfluuchung is.
Te troon fon Hërkot un fom Xoof wërt in te xtat sin, un sayn tiiner tuun em atoreere. 4Tuun sayn kesicht siin, un uf te xtërn wëre se Hërkot sayne naame kexrip hon. 5Too kept es khee nacht mee, un prayche net mool tas licht fon khërtse xtëner net mool tas licht fon te sun, wayl te Hër Kot tuut iwer se xayne. Un wëre rechiire als kheeniche fer imer.
Yeesus sayne aankhom
6Tan saat te ëngel fer mich:
— Tii wërter sin ti woerheet un khan mer sich truf ferlose. Te Hër Kot, woo sayne Kayst kept fer ti profëte, hot sayne ëngel kexikt fer se tsayche tas tings woo klaych paseere sol.
7Yeesus saat:
— Heyert! Ich khome klaych! Kliklich tii woo ti profëtixe wërter fon tëm puch noo keen!
8Ich, Yohan, hon tas tings keheyert un kesiin. Un, wan ich ales keheyert un kesiin hat, sin ich uf kniye kefal foer te fiis fom ëngel woo mich tas ales ketsaycht hat un wolt em atoreere. 9Awer, eyer saat mich:
— Mach tas net! Wayl ich sin Hërkot sayne tiiner, soo wii tuu un tayn priiter, ti profëte, un ale layt woo ti wërter fon tëm puch noo keen. Tuu Hërkot atoreere!
10Un te ëngel saat wayter:
— Tuu tii profëtixe wërter fon tëm puch net uf heepe, wayl ti tsayt fer tas paseere is xon ticht. 11Weyer xlecht is sol tas xlechtes wayter mache, un weyer trekich is sol wayter trekich sin. Weyer kuut is sol wayter tas kuutes tuun, un weyer tetikeyert is fer Hërkot sol wayter tetikeyert fer Hërkot playwe.
12Yeesus saat:
— Heyert! Ich khome klaych! Pringe mayn peloonunge mit mich, fer se kewe fer yeete ëne tëm noo was er am mache waar. 13Ich sin te Alfa un te Omeka, te Eyerxte un te Letste, te Aanfang un te Ën.
14Kliklich ti layt woo sayn tsaych wexe, wayl soo kriin se ti recht fer ti frucht ese fom paam fom leewe un fer in ti xtat rin keen torich es toer. 15Awer, aus te xtat sin tii woo hesliche sinte mache, hekseray mache, ti imoraale un ti woo umpringe, tii woo iitole atoreere un tii woo kërn liye torich wërter un aktsioone.
16— Ich, Yeesus, hon mayne ëngel kexikt fer tas tings aan saan fer aych in te khëriche. Ich sin te famoose nookhomer fon Dawii. Ich sin ti klënsich moynts xtërn.
17Te Kayst un ti Praut saan:
— Khom!
Tee woo tas heyert sol aach saan:
— Khom!
Tee woo torxt hat, khom. Un weyer wil sol umsonst kriin fom waser fom leewe.
Apxiit
18Ich, Yohan, tuun solemne awiseere fer tii woo ti profëtixe wërter fon tëm puch heere: wën yemant een wort tepay xraywe tuut, tuut Hërkot ti plaake woo aan kesaat kep sin in tëm puch tepay rechne an sayne xtroof. 19Un, wën yemant etwas wech macht fon te profëtixe wërter fon tëm puch, tuut Hërkot ti seechnunge woo too kexrip sin tëm wech hoole, was mënt, sayn teel fon te frucht fom paam fom leewe un aach sayn teel fon te Haylich Xtat.
20Tee woo tsayer kept fon tas ales saat:
— Kans sicher khome ich klaych!
Aamen! Khom, Hër Yeesus!
21Un tas em Hër Yeesus sayne knaate mit aych al sich ferhalt.
