Mensaaj fer ti khërich in Ëfesus
1— Fer te ëngel fon te khërich fon Ëfesus, xrayp tas:
“Tas is ti mensaaj fon tëm woo ti siwe xtërne in te rechts hant fest am hale is un woo tswixe te siwe koltne khërtse xtërner keet. 2Ich wees was teyer am mache waart. Ich wees tas teyer fiil kexaft hat un hat ti layte aus kehal mit ketult. Ich wees tas teyer net xlechte layt aus hale khënt un wees tas teyer in proop kextelt hot tii woo saan tas se aphostle sin, awer net sin, un soo hat teyer auskekluucht tas tii liichner sin. 3Teyer hat ti situatsioon aus kehal mit ketult un hat layte mit kemach weche mich, oone uf kewe. 4Awer ich hon etwas keeche aych: teyer liipt mich yets net wii am aanfang. 5Tënkt traan wii fiil teyer kefal sayt. Royert aych fon ayre sinte un macht was teyer am aanfang kemach hat. Wën teyer aych net royere tuut, khome ich un hoole ayre khërtse xtërner wech fom plats. 6Awer, teyer hat etwas woo kuut xprecht fer aych: tuut hase was ti nikolaitas mache, wii ich aach hase.”
7“Also, wën teyer oore het fer se heere, tan heyert was te Hërkot sayne Kayst saat fer ti khëriche: Fer ti woo tas kewine kriin kewe ich ti recht fer ti frucht fom paam fom leewe se ese, woo wakst in Hërkot sayne kaarte.”
Mensaaj fer ti khërich fon Smyrna
8— Fer te ëngel fon te khërich fon Smyrna xrayp tas:
“Tas is ti mensaaj fon tëm woo te Eyerxte un te Letste is, woo kextorep is un witer peleept is. 9Ich wees was teyer am layte sayt. Ich wees tas teyer aarem sayt, awer, in te woerheet, sayt teyer raych. Ich wees wii tii woo saan tas se yute weere, awer net sin, xlecht xpreche fon aych. Tas is en krupe woo tsu Satanaas keheyert. 10Praych khee pang hon fon was teyer mit mache wërt. Heyert! Te Taywel tuut phaar fon aych in ti katee tas se in proop kextelt kewe un layte mit mache iwer tseen taache. Sayt leaal, wën teyer ach xtërwe mist; un, als kewun prays, wëre ich aych es leewe kewe.”
11“Also, wën teyer oore het fer se heere, tan heyert was te Hërkots Kayst saat fer ti khëriche: Tii woo ans kewine khome, kriin net te xtroof fom tswete toot.”
Mansaaj fer ti khërich fon Përkamo
12— Fer te ëngel fon te khërich fon Përkamo xrayp tas:
“Tas is ti mensaaj fon tëm woo ti xwaart woo xaref is uf te tswaay sayte hot. 13Ich wees tas teyer woont too woo te troon fon Satanaas is. Teyer sayt leaal un het net te klaawe neewe kelos woo teyer an mich hot, sokaar wan Antipas, mayn leaal tsayer, toot kemach kep waar too in Përkamo, woo Satanaas woont. 14Awer ich hon etwas keeche aych: sin unich aych phaar woo Balaon sayn unterichte noo keen. Balaon hot fer Balak ketsaycht wii mache tas es folek fon Israël sinte mache teet, am saan tas ti israelite naarungs mitle ese solte woo fer ti iitoole keopfert kep waare un imoraliteete aan xtele. 15Soo sin aach unich aych phaar woo unterichte noo keen fon te nikolaite. 16Royert aych! Wën net, khome ich klaych pis too hiin un, mit te xwaart woo aus mayn munt khomt, khëmfe ich keeche tii layt.”
17“Also, wën teyer oore het fer se heere, tan heyert was te Hërkots Kayst saat fer ti khëriche: Fer tii woo ans kewine khome kewe ich te ferxtekelte manaa. Un fer yeete ëne fon tëne kewe ich en wayse xteen, woo truf en naye naame kexrip is woo nimant khënt, noore tee woo en kriit.”
Mensaaj fer ti khërich fon Tiatiira
18— Fer te ëngel fon te khërich fon Tiatiira xrayp tas:
“Tas is ti mensaaj fom Hërkots Soon, woo aue hot woo klënse wii fayer un klënsiche fiis wii polierte pronse. 19Ich wees was teyer am mache sayt. Wees tas teyer liipe hat, sayt leaal, xaft un tuut ti layte aus hale mit ketult. Ich wees tas teyer mee yets am mache sayt wii am aanfang. 20Awer, ich hon etwas keeche aych: tas teyer Jesapël tolereere tuut, ti fraa woo saat tas se en profëtin weyer. Ti fiert mayn tiiner tsum xlechte weech, tëne seksual imoraliteet am lërne un tings ese woo keopfert kep waar fer ti iitole se ese. 21Ich hon tëm tsayt kep fer sayn sinte in xtich lose, awer ti wil net sayn imoraliteet hiner lose. 22Also, ich tuun se uf en pet xmayse, woo sii un tii woo eepruch mache hesliche layte mit mache. Ich mache tas yets, ploos net wën se sich roye tuun fom xlecht tings woo se kemach hon mit tëm. 23Tuun sayn nookënger toot mache un tan kriin ale khëriche se wise tas ich tee sin woo ti ketanke un wile fon ale layt khëne. Ich petsaale fer yeete ëne fon aych tëm noo was er ketuun hat.”
24“Awer, too in Tiatiira, te rest fon aych is net tii xlecht untericht noo kang. Teyer het net kelërnt was phaar nëne als ‘ti tiife sekrets fon Satanaas’. Ich fersichere tas ich khee last mee uf aych tuun. 25Awer, pis ich khome, tuut kuut uf heepe was teyer hat.”
26-28“Fer tii woo ans kewine khome un wayter pis ans ën mayne wile mache kewe ich ti selwich autoriteet woo ich fon mayne Fater kriit hon: autoriteet iwer ti natsioone fer rechiire mit en ayse xtang un tii in xtiker ferpreche wii wën se let kruuche weere. Ich kewe tëne ti moynts xtërn.”
29“Also, wën teyer oore het fer se heere, tan heyert was te Hërkots Kayst saat fer ti khëriche.”
