Apokalipse 12

₁Tan is en kroose un misterioose sinal am himel tsum foerxayn khom. Waar en fraa. Sayn klayt waar ti sun, unich sayn fiis waar te moont, un sii hat en kroon fon tswelef xtërne uf em khop. ₂Ti fraa waar en khint am waarte un waar am xraaye fon phayn fer tas khint uf ti welt pringe.

₃Un en anere sinal is am himel tsum foerxayn khom: waar en kroose roote trakon mit siwe khep un tseen hërner un mit en kroon uf yeete khop. ₄Mit em xwans hot te trakon en tritel fon te xtërne fom himel wech kexlept un iwer ti eyert kexmis. Tëm noo hot er xtil kehal foer te fraa woo tas khint am waarte waar fer tas khint se frese soo wii tas uf ti welt kheemt. ₅Tan hot ti fraa en khint uf ti welt keprung, woo ale natsioone kowerneere wërt mit en ayse xtang. Awer tas khint is wech kehool kep un ticht pay Hërkot un sayne troon kenom kep. ₆Ti fraa is auskeris pis uf te tesërt, woo Hërkot en plats prepareyert hat fer sii. Too wërt se unerxtitst kep iwer tausent tswaay hunert un sechtsich taache.

₇Tëm noo is en kriich im himel paseyert. Michel un sayn ëngle hon kekhëmft keeche te trakon, woo aach kekhëmft hot mit sayn ëngle. ₈Awer te trakon hot ferloer, tesweche khont eyer un tëm sayn ëngle net mee im himel playwe. ₉Te kroose trakon is aus em himel kexmis kep. Te is ti alt xlang, Taywel ore Satanaas kenënt, woo ale mënxe fon te welt tsum sinte fiert. Tee is uf ti eyert kexmis kep, un sayn ëngle sin aach mit em kexmis kep.

₁₀Tan hon ich en xtarek xtim keheyert im himel woo saat:

— Yets is Hërkot sayn retung khom! Yets hot Hërkot sayn macht als kheenich ketsaycht! Yets hot te Kristus woo eyer raus kesuucht hot sayn autoriteet ketsaycht! Wayl tee woo unser priiter aan kep hot, woo foer Hërkot waar fer se aan kewe taache un nacht, is aus em himel kexmis kep. ₁₁Unser priiter hon tëm ap kewun torich em Xoof sayn pluut un ti mensaaj woo se aan kesaat hon. Tii waare fërtich fer sayn leewe kewe un xtërwe. ₁₂Also, ooh himel un al teyer woo too woont, frayt aych! Awer, ay fon te eyert un fom meer! Wayl te Taywel is runer pis aych khom un is aarich pees wayl er wees tas er ploos weenich tsayt mee hot fer etwas se mache.

₁₃Wan te trakon kesiin hot tas er uf ti eyert kexmis kep waar, hot er aankefang ti fraa noo se keen woo en puupche uf ti welt keprung hat. ₁₄Awer, ti fraa hot ti tswaay flite kriit fon en kroose aatler fer uf sayn plats im tesërt se fliye khëne, woo se unerxtitst kept iwer tray yoer un halep pefrayt fom trakon sayne atak. ₁₅Tan hot te trakon waser fon sayn xnis kexpritst, wii wën es en flus weyer, noo te fraa, tas se fom waser kexlept keept. ₁₆Awer ti eyert hot ti fraa keholef, wayl ti aychne eyert hot tas maul uf kemach un hot tas waser kexlukt woo fom trakon sayn xnis raus khom waar. ₁₇Te trakon is wuutich kep mit te fraa un is keeche te rest fon tëm sayn nookhomer khëmfe kang, was mënt, tii woo Hërkot sayn kepoote noo keen un leaal sin uf ti woerheet woo Yeesus reweleyert hot. ₁₈Un te trakon is am xtrant fom meer xteen keplip.