Yohan Te Taafer sayne toot
1In tëne tsayte hot Herootes, te kowerneyer fon Kalilëya, xpreche keheyert iwer Yeesus. 2Tan saat eyer fer sayn tiiner:
— Tee man is Yohan, Te Taafer woo peleept kep is. Tesweche hot te man ti macht fer wunere se mache.
3Wayl Herootes hat kexikt kehat Yohan fange, sayn hënt aan pine un in ti katee kexmis keept. Tee hot tas kemach kehat weche Herotiias, fraa fon sayne pruuter Filip. 4Wayl Yohan, Te Taafer fiil mool kexproch hat fer Herootes: “Tëm noo unser Kesets tërefst tuu net mit Herotiias hayrate!”
5Herootes wolt iim umpringe, awer hat pang fom folek, wayl tii mënte tas Yohan en profët weyer. 6Am taach fon Herootes sayn kepoers taach, hot Herotiias sayn tochter ketanst foer te kanse layt. Herootes hot tas soo xeen kefun 7tas eyer fer tas meetche ferxproch hat:
— Ich xwoore tas ich tich kewe was tuu mich ferlange tuust!
8Un sayn mama am aan heere, hot sii ferlangt:
— Ich wil Yohan Te Taafer sayne khop uf en teler, yets klaych!
9Te kheenich Herootes is traurich kep, awer, weche em xwoer woo eyer foer te in kelaatne layt kemach hat, hot kexikt tas kemach keept was es meetche ferlangt hat. 10Un hot kexikt tas Yohan, Te Taafer sayne khop ap kehakt keept, in te katee. 11Too hon se te khop in en teler keprung, hon fer tas meetche ap kep, un sii hot es fer sayn mama ap kep. 12Tan sin Yohan sayn tisiple khom, hon te khërwer kenom un hon em peërticht. Tëm noo sin se tas fer Yeesus fertseele kang.
Yeesus tuut en kroos folek neere
13Wii Yeesus se wise kriit hot was paseyert waar, is eyer fon too fort in en poot un is aleen noo en tesërt plats kang. Awer tas folek hon se wise kriit woo er waar, sin fon sayn kemaynte khom un sin tëm noo kang torich lant. 14Wii Yeesus aus em poot kextii is un hot tas folek kesiin, hot eyer se aarich ketauert un hot ti kranke woo too waare keheelt.
15Foer nacht, sin ti tisiple ticht pay em khom un hon kesaat:
— Is xon xpeet, un tas plats is unpewoont. Xik ti layt fort, tas se noo te wile keen un etwas khaafe fer se ëse.
16Awer, Yeesus antwort:
— Ti prayche net fort keen. Kept teyer selepst tëne se ese.
17Ti tisiple antworte:
— Meyer hon too ploos finef proote un tswaay fix.
18Yeesus saat:
— Pringt tii fer mich!
19Tan hot eyer tas folek kexikt sich uf tas kraas setse. Tëm noo hot eyer ti finef proote kehool un ti tswaay fix, hot noo em himel kekukt un hot Hërkot ketankt. Hot ti proote keteelt, hot se fer ti tisiple ap kep, un tii hon se aus keteelt fer tas folek. 20Al hon kes un sin sat kep, un ti tisiple hon noch tswelef khërep fol kemach mit te xtiker proot woo iwerich keplip waare. 21Tii woo kes hon waare finef tausent mëner, oone ti fraae un ti khiner se tseele.
Yeesus keet iwich es waser
22Klaych tëm noo, hot Yeesus fer ti tisiple ti ortnung kep tas se uf te poot xtaye solte un foer faare solte noo ti aner sayt fon te lakoo, soo lang wii eyer tas folek ap am xike waar. 23Wii eyer tas folek xon fort kexikt hat, is Yeeus uf te përich kang fer aleen se peete. Wii ti nacht khom is, waar er too kewees, aleen. 24In tëm momënt waar te poot xon in te mite fon te lakoo. Un ti wele hon forx keeche te poot kexmis, wayl te wint xtarek keeche keploost hot. 25Xon foer taach, tswixich tray un seks uer, is Yeesus pis tort hiin kang, iwich es waser am keen. 26Wii ti tisiple Yeesus kesiin hon iwich es waser am keen, sin se aarich ferxrok un hon ferwunert kesaat:
— Is en kexpëns!
Un hon fon pang kexraayt. 27In tëm momënt saat Yeesus:
— Koraaj! Sin ich! Praycht khee pang hon!
28Tan saat Pheeter:
— Wëns tuu es wërklich pixt, xik tas ich iwich es waser keen khan fer pay aych khome.
29Yeesus antwort:
— Khom!
Pheeter is aus em poot kang un hot aan kefang iwer es waser keen, in Yeesus sayn richtung. 30Awer, wii er ti kraft fom wint kexpiert hot, hot er pang kriit un hot aan kefang uner se keen. Tan hot er kexraayt:
— Helef mich, Hër!
31Yeesus hot klaych ti hant kextrekt, hot Pheeter fext kehal un saat:
— Tayne klaawe is mool kleen! Warom hoxt tuu ketswayfelt?
32Tan sin ti tswaay uf te poot kextii, un te wint hot sich peruicht. 33Un ti tisiple hon sich foer Yeesus kekniit, am saan:
— Tuu pixt wërklich te Soon fom Hërkot!
Yeesus heelt in Jenesarëë
34Yeesus un ti tisiple sin ti lakoo iwer kekweert un sin pis an ti rechioon Jenesarëë khom. 35Too hot tas folek Yeesus erkhënt un hon fer ale kranke fon te nachparx wile pekhant kemach tas tee too weyer. Tan hon fiil layt ti kranke pis an iim hin keprung, 36am ferlange tas eyer weenichtens ti kranke an iim sayn tsayh thupe lose teet. Un al tii woo an iim kethupt hon sin kuriert kep.
