Mateus 13

₁In tëm selwiche taach is Yeesus fon tehëm fort kang un is pis an te rant fon te Kalileye lakoo kang, hot sich too hiin kesetst un hot aankefang se unterichte. ₂Tas folek woo sich um em rom kesamelt hat waar soo kroos, tas er uf en poot kextii is un hot sich kesetst; un tas folek is xteen keplip am rant. ₃Yeesus hot paraaple penutst fer fiil tings se unterichte. Er saat:

— Heyert! En man is aus kang fer se seye. ₄Wii eyer ti soome am xtraue waar langst te weech, sin phaar langst te weech kefal un ti feelcher hon ales kefres. ₅Aner teel fon te soome is uf en plats kefal woo fiil xteen waare un weenich eyert. Ti soome sin klaych aus kekhaymt wayl ti eyert net tiif waar. ₆Awer, wii ti sun tsum foerxayn khom is, hot ti planse ferprënt, un tii sin fertrokent wayl se khee wortsle hate. ₇Anere soome sin tswixich ti tëner kefal, woo kewakst sin un hon ti planse ferxtrikt. ₈Awer ti soome woo uf kuut lant kefal sin hon hunert, sechtsich ore traysich khërner fer yeete khorn protutseyert.

₉Un Yeesus macht xlus, am saan:

— Weyer oore hot sol kuut heere.

₁₀Tan, sin ti tisiple ticht pay Yeesus khom un hon kefroot:

— Warom tuut teyer paraaple penutse fer mit tëne layt se xpreche?

₁₁Yeesus hot keantwort:

— Fer aych tuut Hërkot ti kehëmnise fom Himels Raych tsayche, fer tii net. ₁₂Wayl, weyer hot, kriit mee, tas tee noch mee hot. Awer weyer niks hot sokaar tas weeniche woo eyer hot kept tëm wech kehool. ₁₃Is tesweche tas ich paraaple penutse fer mit tëne layt se xpreche. Wayl ti kuke un siin net; heere un tuun net aan heere, un net mool ferxteen. ₁₄Un soo paseyert mit tëne layt was te profët Isaiias saat:

₁₆Yeesus macht wayter, am saan:

— Awer teyer, wii kliklich sayt teyer! Wayl ayre aue siin, un ayre oore heere. ₁₇Ich fersichere aych tas tas woer is: fiile profëte un fiile anere layt fon Hërkot sayn folek wolte kërn siin was teyer am siin sayt, awer khonte net; un teere kërn heere was teyer am heere sayt, awer hon net keheyert.

₁₈— Tan heyert un lërnt was ti paraapel fom seyer petayte sol. ₁₉Ti layt woo ti mensaaj fom Raych aan heere, awer tuun se net ferxteen, sin wii ti soome woo langst te weech rant keseet kep sin. Te Taywel khomt un hoolt tas wech woo in tëne sayn hërts keseet kep waar. ₂₀Ti soome woo keseet kep sin woo fiil xteen waare sin ti layt woo ti mensaaj aan heere un tuun se klaych mit freet aan nëme, ₂₁awer hale net lang wayl se khee wortsle hon. Un wën weche te mensaaj layte un xwiirichkheete khome, tuun se klaych sayne klaawe in xtich lose. ₂₂Anere persoone sin eenlich mit tëm soome woo tswixich te tëner keseet kep is. Ti heere ti mensaaj aan, awer ti soriche fon tee welt un ti ilusioon fon te raychtum mache ti mensaaj ferxtrike, un tii persoone protutseere khee fruchte. ₂₃Un ti soome woo uf kuut lant keseet kep sin, sin ti layt woo aan heere un ferxteen ti mensaaj, un protutseere en kroos ërnt: phaar hunert, anere sechtsich, un noch anere traysich mool mee wii tas woo keseet kep is.

₂₄Yeesus hot noch en aner paraapel fertseelt. Tee saat fer tas folek:

— Te Himels Raych is wii en man woo kuute soome uf sayn lant keseet hot. ₂₅Een nacht, wii se al am xloofe waare, is en faynt khom, hot unkraut tswixe tas weets keseet, woo joyo kenënt is, un tëm noo is er fort kang. ₂₆Wii ti planse kewakst sin, un ti eere hon sich fol khëner kemach, is tas unkraut tsum foerxayn khom. ₂₇Too sin ti knechte fon tëm man aan khom un saate: “Hër, tuu host kuute soome uf tayn lant keseet. Fon woo meecht tas unkraut heyer khom sin?”

₂₈Te hër antwort:

— Tas waar en faynt woo tas kemach hot!

Tii knechte hon kefroot:

— Wils tuu tas meyer tas unkraut rope sole?

₂₉Te hër antwort:

— Nee, wayl wën teyer tas unkraut rope tuut, khënt teyer aach tas weets rope. ₃₀Lost tas ti weetse un tas unkraut mitsamer wakse tuut pis an ti ërnt tsayt. Tan wërt ich fer ti aarwate woo uf ti ërnt keen saan: “Ropt eyerxt tas unkraut un tuut es in haufe pine fer se ferprëne. Tëm noo, ërnt te weets un tuut tas uf heepe in mayne xop.”

₃₁Yeesus hot en aner paraapel fertseelt. Eyer saat fer tas folek:

— Te Himels Raych is wii em mustart soome, woo en man hoolt un uf sayn lant seye tuut. ₃₂Tas is te kleenste fon ale soome; awer, wën eyer wakse tuut, kept tas ti kreest fon ale planse. Es kept sokaar en paam, soo tas ti feelcher khome un mache nester uf sayn est.

₃₃Yeesus hot noch tii paraapel fertseelt fer tas folek:

— Te Himels Raych is wii te heep woo en fraa hoolt un in tray moos meel rin mëngt, pis tee sich in ti kans mase ferxtraut.

₃₄Yeesus hot paraaple penutst fer tas ales se saan fer tas folek. Tee hot niks tëne kesaat wën tas net torich paraaple waar. ₃₅Tas is paseyert tas sich in hale teet was te profët kesaat hat:

₃₆Tan hot Yeesus tas folek hinerlos un is hëm kang. Ti tisiple sin ticht pay em khom un hon kefroot:

— Fertseel uns was ti paraapel fom unkraut petayte sol.

₃₇Yeesus antwort:

— Weyer kuute soome seet is te Soon fom Man. ₃₈Tas lant is ti welt. Ti kuute soome sin ti layt woo tsum Raych keheere; un tas unkraut, tii woo tsum Taywel keheere. ₃₉Te faynt woo tas unkraut seet is te Taywel. Ti ërnt is tas ën fon te tsayte, un tii woo ti ërnt mache sin ti ëngle. ₄₀Soo wii tas unkraut samer kerof kept in haufe un ins fayer kexmis kept, soo wil tas paseere am ën fon te tsayte. ₄₁Te Soon fom Man xikt sayn ëngle, un tii tuun samer refe un tuun fom Raych raus al tii woo ti anere in sinte fale mache un aach tii woo tas xlechtes tuun. ₄₂Tëm noo, tuun ti ëngle tii layt in te fayer oowe xmayse, woo se prile tuun un ti tseen kwiitxe fon hofnungsloos. ₄₃Tan wil em Hërkot sayn folek klënse wii ti sun im Fater sayne Raych. Weyer oore hot sol kuut heere.

₄₄— Te Himels Raych is wii en ferxtekelte xats uf en khamp, woo en man fint un noch mool ferxtekelt. Kept soo froo, tas er ales ferkhaaft was er hat, un khomt tëm noo tsurik un khaaf te khamp.

₄₅— Te Himels Raych is aach wii en kexefts man woo fayne phërle am suuche is. ₄₆Wën eyer en phërl fint woo wërklich en kroose weyert hot, keet eyer, ferkhaaft ales was er hot un khaaft ti phërl.

₄₇— Te Himels Raych is noch wii en fix nets woo in ti lakoo kexmis kept. Ti fangt fix fon aler sorte. ₄₈Un, wën ti nets fol is, tuun ti fixer se pis an te rant xlepe un setse sich fer ti fix sortiire: ti kuute fix kewe in khërep ketuun un ti xlechte kewe wech kexmis. ₄₉Am ën fon te tsayte wërt es aach soo paseere: ti ëngle khome un tuun ti kuute layt fon te xlechte ausnaner teele, ₅₀un xmayse ti xlechte in te fayer oowe. Un too wëre se prile un ti tseen kwiitxe fon hofnungsloos.

₅₁Tan hot Yeesus fer ti tisiple kefroot:

— Het teyer tas tings ales ferxtan?

Tii hon keantwort:

— Yoo!

₅₂Yeesus saat:

— Tas wil heese tas yeete Kesets leerer woo en tisipel fom Himels Raych wërt is wii en familye fater woo aus sayne xop nay tings un alt tings hoole tuut.

₅₃Wii Yeesus fërtich waar mit te paraaple fertseele, is eyer fon too fort kang ₅₄un is tsurik noo te xtat Nasarëë kang, woo eyer kewoont hat. Tee hot keuntericht in te sinakook, un tii woo iim keheyert hon, hon sich ferwunert un hon kefroot:

— Fon woo khomt tëm sayn wisheet un ti macht woo eyer hot fer ti wunere se mache? ₅₅Is eyer net em xrayner sayne soon? Is tëm sayn mama net Maria? Is eyer net pruuter fon Tiaako, Yoosef, Simon un Yuutas? ₅₆Woone tëm sayn kanse xwestere net too hier? Fon woo hot tee tas ales pay?

₅₇Tesweche hon se sich net mee an tëm intereseyert. Awer Yeesus saat:

— En profët kept iweraal rexpekteyert, ploos net uf sayn lant un in sayn haus.

₅₈Yeesus khont too khee fiil wunere mache wayl ti hate khee klaawe.