Lukas 21

₁Yeesus waar uf em hoof fom Thëmpel, am kuke was am paseere waar, un siit ti rayche kelt in te opfer khaste tuun. ₂Hot aach en aarem witfraa kesiin, woo tswaay kleene nikle woo weenich kekilt hon rin ketuun hot. ₃Tan saat er:

— Ich fersichere aych tas tii aarem witfraa mee kep hot als ti anere al. ₄Wayl ti anere hon kep fon was iwerich waar. Awer tii, woo soo aarem is, hot ales kep was se hat fer se leewe.

₅Phaar layt waare am xpreche wii te Thëmpel ferputst waar mit xeene xteen un mit tëm tings woo keopfert kep waar. Tan saat Yeesus:

₆— Khomt te taach woo tas ales was teyer siit pis in te pootem fernicht kept. Un playpt khee xteen uf em anere woo net niter khomt.

₇Too, hon se kefroot:

— Mayster, wan sol tas paseere? Was fer sinaal kept tas fer se tsayche wan tas paseere sol?

₈Yeesus antwort:

— Past uf tas nimant aych hinerkeet. Wayl fiil wëre khome un mache wii wëns ich weyer, am saan: “Ich sin te Mesias” ore “Ti tsayt is xon khom”. Awer, keet tëne layt net noo. ₉Khee pang hon wën teyer xpreche heyert iwich kriiche un rewolutsioone. Wayl is neetich tas tas tings eyerxt paseyert. Awer tas wil noch net saan tas te ën ticht is.

₁₀Un Yeesus saat wayter:

— Een natsioon kriicht keeche ti aner, un een lant tuut tas anere iwerfale. ₁₁Uf fiile plets kept es kroose eyert xutre, es ese khomt ans feele un epitemiis wëre foer khome. Xreklich tings wërt paseere, un kroose sinaale wëre am himel kesiin.

₁₂— Awer, eep tas ales peseyert, wërt teyer inkexpërt un keyacht. Teyer wërt ap kep fer julkeyert se kewe in te sinakooke un tëm noo kept teyer in ti katee kexmis. Wayl teyer mayn aanhënger sayt, wërt teyer foer ti kheeniche un foer ti kowerneyer kenom fer julkeyert se kewe. ₁₃Un tas kept aych oportuniteet fer te ewankeelium aan saan. ₁₄Resolweyert yets klaych xon tas teyer aych net khimere tuut, eep ti xtun khomt, was teyer saan solt fer aych se tefenteere. ₁₅Wayl ich kewe aych wërter un wisheet tas ayre faynte net aus hale khëne un net ap saan khëne. ₁₆Ayre aychne eltre, kexwister, ferwante un froynte wëre aych ap kewe fer ti autoriteet, un phaar fon aych kewe toot kemach. ₁₇Al tuun aych hase wayl teyer mayn aanhënger sayt. ₁₈Awer net mool en hoer faatem fon aych wërt ferloer keen. ₁₉Playpt fest im klaawe, wayl soo kept teyer keret.

₂₀Yeesus saat noch:

— Wën teyer ti xtat fon Yeruusalëm siit umkekrayst fon militeere, wërt teyer kewaar tas se klaych fernicht kept. ₂₁Tan, tii woo in te rechioon fon Yutëya sin sole aus rayse, uf tas përiche lant. Weyer in te xtat is sol klaych raus keen. Weyer uf em khamp is sol net in ti xtat rin keen. ₂₂Wayl tii taache sin ti “Xtroof Taache”, un in tëne taache paseyert ales was ti Hayliche Xrifte saan. ₂₃Ay fon te fraae woo khiner am waarte sin un fon te motre woo noch se trinke am kewe sin in tëne taache! Wayl khomt iwich ti eyert en kroos laytung, un falt iwich tii mënxe en xrekliche Hërkots xtroof. ₂₄Fiil kewe toot kemach torich ti xwaart, anere kewe als kefangne noo ale natsioone fon te welt kexikt. Un tii woo khee yute sin wëre Yeruusalëm iwerfale, pis ti tsayt rom keet fer tas se mache.

₂₅Un Yeesus saat wayter:

— Es kept sinaale an te sun, am moont un an te xtërne. Un, uf te eyert, ale natsioone kewe hofnungs loos, fol mit pang fom xrekliche ratau fom meer un fon te wele. ₂₆Uf te kans welt tuun fiile layt samer fale fon xreke wën se tënke an was paseere khan, wayl ti macht fom himel kept aan kexitelt. ₂₇Tan khomt te Soon fom Man runer, uf en wolek, mit macht un kroos kloor. ₂₈Wën tas tings aanfangt se paseere, playpt fest im klaawe un mit ayre khop kehoop, wayl klaych kept teyer keret.

₂₉Klaych tëm noo hot Yeesus tii ferklaychung kemach:

— Kukt te payxpiil fom fayche xtok aan ore ti anere peem. ₃₀Wën teyer siit tas ti pleter aanfange ausxlaan, wist teyer tas te sumer am khome is. ₃₁Soo aach, wën teyer tas tings paseere siit, tan wist teyer tas te Hërkots Raych am aan khome is. ₃₂Ich fersichere aych tas tas woer is: tas tings wil paseere eep al tii woo yets leewent sin xtërwe. ₃₃Te himel un ti eyert wëre ferxwine, awer mayn wërter playwe fer imer.

₃₄Un Yeesus macht xlus, am saan:

— Playpt am wache! Lost net tas ti feste, ore tas trinke, ore ti propleeme fon tëm leewe aych soo fol soriche lose tas tee taach aych unferhoft fange tuut, ₃₅wii wëns en fal weyer. Wayl tee taach falt pletslich iwer yeete mënx uf te kans welt. ₃₆Soo, playpt am wache un peet imer, tas teyer ausrayse khënt fon tëm tings woo paseere tuut un tas teyer uf xteen khënt foer em Soon fom Man, wën tee khome tuut.

₃₇Yeete taach hot Yeesus uf em hoof fom Thëmpel keuntericht. Awer nachts is eyer imer pis an te Oliiwe Përich kang un is oft too keplip pis moynts. ₃₈Un tas kanse folek is foer taach xon pis an te thëmpel kang fer em aan se heere.